1 Nte ami ndighe enyemi ama ọkọwọrọ ufin? Nte ami ndighe isuñutom Abasi (Ọbọsuru)? Nte ami ñkekwe Jisọs Ọbọñ ñnyin? Nte mbufo idighe ibọrọ utom emi ami nnamde nnọ Ọbọñ? 2 Edieke ami mme ñkpedighedi isuñutom Abasi nnọ mbon efen, ke akpanikọ ami mmedi isuñutom nnọ mbufo sia mbufo emi edi idiọñọ ndiwut nte ke ami ndi isuñutom Ọbọñ. 3 Emi edi ibọrọ ndinyaña idem mi ke ini mme owo etiñde mme nsio nsio ikọ edian mi.

4 Nte ami ñnyeneke unen nte enọde mi udia ye ediñwọñ ñkpọ ke utom mi? 5 Nte ami ñnyeneke unen ndinam nte mme isuñutom Abasi eken enamde, ye eyen eka Ọbọñ, ye Pita, ke ndidọ ñwan kiet ke otu iban emi enimde ke akpanikọ ñnyuñ nda enye ñka mme isañ mi? 6 Ndi Banabas ye ami ikpọñ inyene ndiñwana udia idem ñnyin? 7 Ewe owo ekọñ akananam ada okuk esie abiat akama idem esie ke ekọñ? Ewe ọtọ iñwañ edi emi midiaha mfri itọ ke iñwañ esie? Ewe ekpeme erọñ edi emi miñwọñke mmọñeba emi otode ke mme erọñ esie? 8 Nte ami ntiñ mme ñkpọ emi nte ekikere ibuot owo? Nte ibet itiñke kpa ntre? 9 Koro ewet ke ibet Moses ete, "Kubọp enañ inua ke ini enye edighide ibokpot." Nte edi enañ ekpebehe Abasi? 10 Nte idighe ñnyin ke Enye eketiñ ikọ emi abaña? Ih, ekewet emi enọ ñnyin, owo emi ofuñde isọñ ye enye emi ọdọkde idọk, enyene ndinam utom mmọ ye idorenyin edinyene udeme ke mme mbuñwum.

11 Edieke ñnyin ikọtọde mme mfri Spirit ke otu mbufo, nte akpawak akaha edieke ñnyin idọkde idọk ñkpọ uwem emi ito mbufo? 12 Edieke mme mmọ efen enyenede unen uñwam eto mbufo, nte ñnyin ikpenyeneke se iwakde ikan oro? Edi ñnyin ikadaha unen oro isin ke edinam, edi ikabade iyọ kpukpru ñkpọ, mbak ñnyin idinim idiọkñkpọ ubiọñọ ke usuñ Eti Etop emi nnọ mme mmọ efen, ke akpanikọ emi otukde Ọbọñ Jisọs Kraist.

13 Mbufo emetim efiọk emi ete, mme owo emi enamde utom ke Edisana Ebiet (temple) enyene udia eto Edisana Ebiet oro, ndien mme mmọ emi ewade uwa ke itie uwa enyene udeme mmọ ke uwa oro. 14 Kpa ke ukem usuñ oro Ọbọñ ama ọnọ uyo ete yak mmọ emi ekwọrọde ikọ Abasi enyene udia mmọ eto ke esit. 15 Edi akananam ami ndaha unen emi ndomokiet nsin ke edinam, ami ñnyuñ ñwetke ñkpọ emi idahaemi man oto do ami ñyom utọ unen oro nnọ idem mi. Ñkpama ndikpa utu ke owo baba kiet ọbiọñọ mi nditaña ase emi. 16 Ami ñnyeneke unen nditaña ase ke emi ami ñkwọrọde Eti Etop, kadaña emi enyikde nyik mi ndikwọrọ Eti Etop emi. Ọdọdiọk ọnọ mi edieke ami mme ñkwọrọke Eti Mbuk emi.

17 Edieke ñkpekwọrọde Eti Etop emi ke ima idem mi, ami ñkpedori enyin ke ukpe okuk; edi ami ñkwọrọ ikọ nte utom emi anade ami nnam, koro Abasi akayakde ubiọñ utom emi esin mi ke ubọk. 18 Nso ndien idi utib mi? Utib mi edi emi: ke edikwọrọ Eti Mbuk emi ami mbọhọ utib ndomokiet ke esit, ke ntre ami ndaha mme unen mi ndomokiet ke edikwọrọ Eti Mbuk emi nsin ke edinam.

19 Okposuk edi emi ami mendighe ofin, ñnyuñ ndighe eyen ofin owo ndomokiet, edi ami nnam idem mi ofin nnọ kpukpru owo, man otodo ñkeme ndimum ediwak owo nte ñkekeme nnọ Abasi. 20 Ke ini emi nnamde utom ke otu mme Ju, ami ndu uwem mi nte mme Ju man otodo nda mmọ nnọ Abasi. Okposuk edi emi mbet Moses mibọpke mi, ami ndu uwem nte ọbọp mi, ke ini ami nnamde utom ye mme mmọ emi edude ke ukara mbet Moses, man otodo mmum mmọ nnọ Abasi. 21 Ke ukem usuñ oro, ke ini ndude ye mme mmọ emi midighe mme Ju, ami ñnyuñ ndu uwem nte mmọ, ñwọrọ ñkpọñ ibet mme Ju, man otodo mmum mmọ nnọ Abasi. Emi iwutke nte ke ami nnimke ibet Abasi; ami ndu ofuri ofuri ke idak ukara ibet Kraist.

22 Ke otu mbon mmemidem ke mbuọtidem ami nnam idem nte owo mmemidem man otodo ami mmum mmọ nnọ Abasi. Ke ntre ami ndedi kpukpru ñkpọ nnọ kpukpru owo man otodo ñkeme ndinyaña ubak mmọ ke usuñ eke ñkekeme. 23 Ami nnam kpukpru emi ke ntak Eti Mbuk emi, man ami ñkpabuana ke mme edidiọñ Esie.

24 Mbufo emediọñọ ete ke itọk edi kpukpru mme efehe itọk efehe, edi ñkpasip owo kiet ọbọ enọ? Efehe ke usuñ emi edibọde enọ. 25 Kpukpru owo emi eyomde ndiduk mbre mbuba, enyene ndiduk ọkpọsọñ ukpep ye mbeñeidem. Mmọ enam emi ndibọ anyanya emi midibighike; edi ñnyin inam emi man ibọ anyanya emi edidude ke nsinsi. 26 Ntak edi oro ami mmemfeheke itọk emi ọyọñ ọyọñ; ami mfehe mbine uruk edikan. Nte eti otop ita ami nduọñọke mme ita emi. 27 Ami nnọ idem mi ufen, ñnyuñ ntọñọ enye ita, ñnyuñ nsin enye ke idak ukara mi, ñnyuñ nnam enye osuk ibuot ọnọ mi, man ke mma ñkọkwọrọ nnọ mme mmọ efen edidọhọ mi ke idem mi ete, "sik da ko," ke afo udotke ndibọ enọ.