1 Ndien kabaña mme enọ Edisana Spirit, nditọ ete, ñyom mbufo efiọk akpanikọ ebaña mme enọ emi. 2 Mbufo emefiọk ete ke ini mbufo ekedide mme mmọ emi minimke Abasi ke akpanikọ, edi mme ndem emi mikemeke ikọ nditiñ ekekara esit mbufo, enyuñ eda mbufo kpukpru ewaha ekpọñ usuñ. 3 Mmọdo ñyom mbufo efiọk ete, owo ekededi emi Spirit Abasi adade enye usuñ isuñike Jisọs; owo ndomokiet ikemeke ndidọhọ ete, "Jisọs edi Ọbọñ," ibọhọke Edisana Spirit ada enye usuñ.

4 Mme nsio nsio enọ Spirit edu, edi Spirit kiet oro edeme ọnọ mmọ. 5 Enyene ediwak nsio nsio utom emi enamde enọ Abasi, edi kpasuk Ọbọñ kiet oro ke ñnyin inam ñkpọ inọ. 6 Nsio nsio ukeme edinam utom edu, edi Abasi kiet ọnọ kpukpru owo ukeme ke utom emi mmọ enamde. 7 Spirit ayarade enọ esie ọnọ owo kiet kiet, man otodo ọfọn ye kpukpru owo.

8 Spirit ọnọ owo kiet ukeme nditiñ ikọ ye ọniọñ, onyuñ ọnọ owo efen ukeme nditiñ ikọ ye ifiọk, kpasuk ke ukem Spirit oro. 9 Ọnọ owo efen mbuọtidem, kpasuk ke ukem Spirit oro, onyuñ ọnọ owo efen odudu ndikọk udọñọ kpa ke Spirit kiet oro. 10 Spirit ọnọ owo kiet odudu ndinam mme utibe ñkpọ; onyuñ ọnọ owo efen ukeme ndisiak uduak Abasi. Enye ọnọ owo efen ukeme ndiyarade ukpuhọde emi odude ke ufọt mme enọ emi otode Spirit, ye enye emi mitoho Spirit. Enye ọnọ owo kiet ukeme ndisem usem ke mme esen edeme, onyuñ ọnọ owo efen ukeme ndikabade se esemde ke usem. 11 Edi kpa Spirit kiet emi anam kpukpru emi; Enye ọnọ owo kiet kiet nsio nsio enọ, nte Enye amade.

12 Ikpọkidem ñnyin enyene ediwak ndido, edi ediwak ndido emi anam kpa ikpọkidem kiet ke ini etañde mmọ edian ọtọ kiet, kpasuk ntre ke edi ye Kraist. 13 Koro ke Spirit ke ekenim ñnyin babtisim esin ke ikpọkidem kiet, mme ñnyin idi Ju mme Krik, mme idi ifin mme idi nditọ isọñ, ema enọ ñnyin Spirit kiet iñwọñ.

14 Koro ndido kiet kpọt inamke ikpọkidem edi ediwak ndido. 15 Edieke ukot ọkpọdọhọde ete, "Ami nduhọ ke mbak ikpọkidem, koro ami mme ndighe ubọk," oro inamke enye etre ndidi kiet ke otu mbak ikpọkidem. 16 Onyuñ edieke utọñ ọkpọdọhọde ete, "Koro ami mmendighe enyin, ami ndighe mbak ikpọkidem," oro ikemeke ndinam enye etre ndidi mbak ikpọkidem. 17 Edieke ofuri ikpọkidem ekpedide enyin enyin, ukeme edikop ikọ okpoto mmọñ? Edieke ofuri ikpọkidem ekpedide utọñ utọñ, edikop utebe ñkpọ okpoto mmọñ?

18 Edi, oro idighe usuñ nte Abasi okobotde ñnyin. Enye ama anam mme nsio nsio ndido ọnọ ikpọkidem ñnyin ndien Enye obon ndido kiet kiet emi ke mme ebiet emi Enye okoyomde mmọ edu. 19 Ikpọkidem ikpoduho, edieke ekpedide ndido kiet kpọt odu. 20 Nte ñkpọ etiede, ediwak ndido edu, edi ikpọkidem edi kiet.

21 Enyin ikemeke ndidọhọ ubọk ete, "Ñyomke fi!" Ibuot ikemeke ndidọhọ ukot ete, "Ñyomke fi!"

22 Mme mbak ikpọkidem, oro etiede nte ememem ekan, edi se etimde eyom. 23 Ndien mbak ikpọkidem emi ikerede ite ke inyeneke ufọn eti, edi se ñnyin itimde ikpeme eti eti; mme mbak ikpọkidem emi mitimke iye, edi se itimde iyom ukpeme, 24 emi mme ata ndiye ndido eken ke idem ñnyin miyomke ata ọkpọsọñ ukpeme. Abasi ke idem Esie emen mbak ikpọkidem adian oto kiet ke usuñ emi edinọde mme mbak ikpọkidem oro eyomde ukpono, ata ọyọhọ ukpono. 25 Man oto do ubahade okudu ke otu mbak ikpọkidem, edi kpukpru nsio nsio ndido ekere ebaña kiet eken: 26 Edieke mbak ikpọkidem kiet okutde ndutuhọ, kpukpru mbak ikpọkidem ekut ukut ye enye ñko; ndien edieke ekponode mbak ikpọkidem kiet, kpukpru mbak ikpọkidem eken etiene enye edara.

27 Ndien idaha emi mbufo edi ikpọkidem Kraist, mbufo kiet kiet enyuñ edi mme ndido Esie. 28 Abasi enim kpukpru ñkpọ ke itie ke itie ke ufọk Abasi, ke akpa itie, Enye enim mme Mbet, udiana Enye enim mme asiak uduak Abasi, ọyọhọ ita Enye enim mme andikpep, ndien Enye edinim mme anam utibe ñkpọ, adiana ye mme mmọ oro enọde odudu ukọk udọñọ, ye mme mmọ emi enọde ukeme ndinọ uñwam, ye mme mmọ emi edade usuñ, ye mme mmọ emi esemde nsio nsio usem ke edeme efen. 29 Nte ana kpukpru owo edi mme Mbet? Nte kpukpru owo edi mme asiak uduak Abasi? Mme mme andikpep? Nte ana kpukpru owo edi mme anam utibe ñkpọ? 30 Nte kpukpru owo enyene enọ ukọk udọñọ? Nte kpukpru owo esem usem ke edeme? Nte kpukpru owo ekeme ndikabade ikọ emi esemde? 31 Edi esin esit mbufo eyom enọ emi okponde akan, ñyewut mbufo usuñ emi ọfọnde akan kpukpru mmọ.