1 Eyak ima edi akpan ñkpọ emi mbufo ekerede ebaña, nte ededi, ebeñe ñko mme enọ Edisana Spirit, akpan akpan enọ edisiak uduak Abasi.

2 Koro owo emi esemde usem itiñke inọ owo, edi etiñ ọnọ Abasi; koro baba owo ndomokiet ifiọkke se enye etiñde ọwọrọde. Enye etiñ ndibe ndibe ikọ akpanikọ oto ke odudu Spirit. 3 Edi owo emi asiakde uduak Abasi etiñ ọnọ mme owo, ndien ọnọ mmọ uñwam, ndikọri ke ifiọk, anam mmọ enyene nsọñidem esie ikpọñ, ke ndikọri ke ifiọk, edi enye emi asiakde uduak Abasi añwam ofuri ufọk Abasi ndikọri.

4 Owo emi esemde usem ke edeme efen ọdiọñ idem esie; edi owo emi asiakde uduak Abasi ọdiọñ ofuri ufọk Abasi.

5 Ñkpamama kpukpru mbufo enyene enọ ndisem usem ke mme esen edeme; edi ami ñkpetim mma kpukpru mbufo esiak uduak Abasi, koro owo emi asiakde uduak Abasi adia akamba udori akan enye emi esemde usem, ibọhọke owo odu emi ekemede ndikabade se enye esemde, man oto do añwam ufọk Abasi ndikọri ke ifiọk.

6 Ntre nditọ ete, edieke ami ñkpedide ke otu mbufo, ndien ntọñọ nditiñ ikọ ke usem, nso ufọn ke emi akpada ọsọk mbufo? Ufọn iduhọ ibọhọke ami nda ediyarade emi otode Abasi, mme ndida ifiọk, mme etop emi otode Abasi, mme ukpepñkpọ, nsọk mbufo. 7 Etie ukem ukem nte mme ñkpọ mbre emi minyeneke uwem, ñkpọ nte ifiom ye ndido uruk emi esiorode uyo, edieke mmọ mitimke inam nsio nsio uyo mmọ eñwaña, edinam didie ifiọk se efride ke ifiom, mme se ebrede ke ndido uruk. 8 Edieke ofuri obukpoñ mifrike obukpoñ añwaña, anie owo edidiọñọ se ọwọrọde inyuñ ibeñe idem inọ ekọñ? 9 Kpasuk ke usuñ ntre, edieke mbufo etiñde ikọ enọ owo ke usem emi enye mikopke, didie ke enye ekeme ndifiọk se mbufo etiñde? Ọwọrọ mbufo etiñ ikọ mbufo esuan ke ofum.

10 Ediwak nsio nsio usem edu ke ererimbot, ndien kpukpru mmọ kiet kiet enyene se mmọ ewọrọde. 11 Edi edieke ami mendiọñọke usem emi owo esemde ye ami se ọwọrọde, ami nditie nte esen owo ke enyin anditiñ, anditiñ edinyuñ edi esen owo ke enyin mi: 12 Sia mbufo enyenede akwa udọñ ndinyene mme enọ emi nto Edisana Spirit edomo ndida enọ Spirit emi ediñwamde ufọk Abasi ndikọri esin ke edinam.

13 Ke ntak emi yak owo emi esemde usem, ọbọñ akam ebeñe ukeme edikabade se enye esemde. 14 Koro edieke ami mbọñde akam ke usem edi Spirit mi ọbọñ akam; edi ikike mi inyeneke udeme ke akam oro. 15 Nso ndien ke ami ndinam? Ami ñyebọñ akam ke Spirit, ñyenyuñ mbọñ akam ke ikike mi; ñyekwọ ikwọ ke Spirit, ñyenyuñ ñkwọ ke ikike mi. 16 Edieke afo ọnọde Abasi ekọm ke Spirit ikpọñ, owo emi odude ke otu mbufo emi mikopke se afo etiñde, edinam didie ọdọhọ ete "Amen" idian ke akam ekọm fo, koro enye inyeneke ukeme ndifiọk se afo etiñde. 17 Akam ekọm emi ọnọde Abasi ekeme ndifọn eti eti, edi idiñwamke owo efen ke usuñ ndomokiet.

18 Mọkọm Abasi koro ami mesem usem ke mme edeme efen ñkan kpukpru mbufo. 19 Edi ke ntuak ibuot ke esit ufọk Abasi, ñkpama nditiñ ikọ ition emi mme owo etimde ekop ọfọn, emi edinyuñ ikpepde mbon efen ñkpọ, ñkan nditiñ tọsin ikọ duop ke usem.

20 Nditọ ete ekutie nte nditọ ọwọñ ke ekikere; Edi etie nte nsek nditọ ke edinam idiọkñkpọ, ke ekikere etie nte ikpọ owo. 21 Ewet ke ñwed Abasi ete, "Jihofa ọdọhọ ete, ñyeda mmọ emi esemde esen usem ye ñkpọkinua isenowo ntiñ ikọ ye mbio emi, edi kpa ye oro mmọ idikpañke utọñ inọ Mi." 22 Ntem edisem usem ke mme edeme efen edi ntiense ọnọ mmọ emi minimke ke akpanikọ, idighe inọ mme andinim ke akpanikọ. Kadaña emi edisiak uduak Abasi edide ntiense ọnọ mmọ emi enimde ke akpanikọ, idighe inọ mmọ emi minimke ke akpanikọ. 23 Edieke ofuri ufọk Abasi ebohode ọtọ kiet, ndien kpukpru owo etọñọ ndisem mme esen usem, edieke owo emi mikopke se usem oro ọwọrọde, ye owo emi minimke ke akpanikọ edukde edi, nte mmọ ididọhọke ite; ke ibuot abiara mbufo? 24 Edi edieke owo emi mikopke se usem ọwọrọde, mme owo emi minimke ke akpanikọ edukde edi, kini kpukpru owo esiakde uduak Abasi, ikọ mbufo eyeyarade idiọkñkpọ esie owut enye. Eyenyuñ ekpe enye ikpe ke se enye okopde, 25 Mme ndibe ekikere esit esie eyewọñọ ena añwa añwa, ndien enye eyetuk iso esie ke isọñ, onyuñ atuak ibuot ọnọ Abasi, onyuñ etiñ añwa añwa, ete, "Ke akpanikọ Abasi do ke otu mbufo"!

26 Mmọdo nditọ ete mi, kini emi mbufo ebonode ndituak ibuot, owo kiet enyene ikwọ, owo efen enyene ukpepñkpọ; owo efen enyene ediyarade emi otode Abasi, enye eken ọnọ etop ke usem, owo efen ñko ye ukeme edikabade se esemde. Enyene ndinam kpukpru ñkpọ nte adade ñkọri ọsọk ufọk Abasi. 27 Edieke owo esemde usem, yak edi owo iba mme ita ke ñwak ñkaha, enyuñ esem ke adiana ke adiana, ndien owo efen enyene ndikabade se mmọ esemde. 28 Edi edieke owo emi ekemede ndikabade mme usem miduhọ, owo emi esemde mme usem enyene ndikibi inua esie ke esit ufọk Abasi, ndien akabade esem usem ọnọ idem esie ikpọñ ye Abasi.

29 Owo iba mme ita ekem ndisiak uduak Abasi, kini mme mmọ eken etimde eduñọrede se mmọ etiñde. 30 Edieke owo emi etiede tie ọbọde ediyarade, owo enyemi eketiñde ikọ enyene ndidop uyo. 31 Koro kpukpru mbufo emekeme ndisiak uduak Abasi ke adiana ke adiana man otodo owo kiet kiet ekeme ndibọ ukpepñkpọ ñnyuñ ñkop nsọñidem. 32 Mme asiak uduak Abasi enyene ndikara Spirit usiak uduak Abasi mmọ, 33 Koro Abasi ikikotke ñnyin idinam ñkpọ ndutime ndutime, edi ke emem. Nte edide ke kpukpru mme eboho ikọt Abasi.

34 Mme iban enyene nditie ke ndopuyo ke ini emi ufọk Abasi odukde mbono. Inọhọ mmọ unen nditiñ ikọ nte mbet mme Ju etiñde, mmọ inyeneke ndida usuñ, edi enyene nditie ke nsuhọde idem. 35 Edieke mmọ enyenede mbume ndibup mmọ enyene ndibup mme ebe mmọ ke ufọk. Edi ñkpọ obut ñwan nditiñ ikọ ke mbono ufọk Abasi.

36 Nte ikọ Abasi ọkọtọñọ ye mbufo? Mme mbufo edi ñkukure mmọ emi enye esimde? 37 Edieke owo ndomokiet ekerede ete ke imọ idi asiak uduak Abasi mme imọ imọbọ emi Spirit, yak enye enyime ete ke se ñwetde nnọ mbufo emi edi ewuhọ Abasi. 38 Edi edieke enye ofumide emi, enyuñ efumi enye ñkọ.

39 Ke ntre nditọ ete mi, ekop nsatitọñ ebaña edisiak uduak Abasi, ndien ekunyuñ ebiọñọ edisem usem ke mme edeme efen. 40 Edi, ana enam kpukpru ñkpọ ke usuñ emi odotde onyuñ edide nnen nnen.