1 Mbufo enyene ndikut ñnyin nte mme asañautom Kraist emi eyakde mme ndibe akpanikọ Abasi esin ke ubọk. 2 Ñkpọ kiet emi eyomde eto asañautom edi enye ndinam akpanikọ ye Enyemi ọkọnọde enye ubiọñ. 3 Ifinake mi ke usuñ baba kiet edieke mbufo ekpede mi ikpe mme ekpede ikpe ye ami ke esop emi mme owo etiede ekpe ikpe. Ami ndikpehe ikpe ye idem mi. 4 Esit mi añwaña, edi oro inamke mi nsana ke ikpe. Edi Abasi edi ekpe ikpe mi.

5 Do mbufo ekubiere ikpe owo ndomokiet kadaña emi ini mikemke, ebet tutu Ọbọñ edi. Enye edisioño kpukpru se idibede ke ekim edi ke uñwana; eyenyuñ ayarade kpukpru ekikere esit mme owo. Ke ini oro, owo kiet kiet eyebọ itoro esie oto Abasi. 6 Ami mmada mme ñkpọ emi nsin ke edinam ke idem mi, ye ke idem Apọlọs man mbufo edia udori. Mmada idem ñnyin owo iba nnam uwutñkpọ, man otodo mbufo ekpep eto ñnyin se etiñde emi ọwọrọde. "Ekunam ebe se ekewetde." Owo mbufo ndomokiet okubure mbure abaña owo kiet ndien esin enye eken ke ndek. 7 Anie ekenam fi ọfọn akan mme mmọ eken? Nte ikedighe Abasi ọkọnọ fi kpukpru se afo enyenede? Didie ndien ke afo ekeme nditañ idem nte mme ñkpọ emi afo enyenede ikedighe enọ?

8 Mbufo ema enyenyene kpukpru se mbufo eyomde ema. Emefoforo ema. Mbufo emededi mme mbọñ ema, ndien esio ñnyin efep! Ọdọñ mi eti eti nte mbufo ekpedide mme mbọñ ke akpanikọ man ñnyin ñko ikpekeme ndidi mme mbọñ ye mbufo. 9 Koro osuk ebiet nte ke Abasi ọmọnọ ñnyin mme asañautom Abasi (Ọbọsuru) akpatre idaha ke udim, nte mme mmọ emi ekebierede ikpe ñkpa enọ ndiwot mmọ ke ufọt añwa, nte ñkpọ ndise ọnọ ofuri ererimbot, ọnọ mme enjel kpa ye mme owo nde.

10 Ñnyin idi mme ndisime ke ntak Kraist, edi mbufo edi mbio ifiọk ke Kraist! Ñnyin idi mbio mmemidem, edi mbufo edi mme okop odudu. Ekpono mbufo ke ini efumide ñnyin. 11 Kpa ke idem ini ñkanika emi ñnyin isaña biọñ ye nsatitọñ; ñnyin isine ntaha ọfọñ; enọ ñnyin ufen obom obom, ñnyin inyeneke ufọk iduñ ifofum ntre isaña. 12 Ñnyin inam utom ke ubọk ñnyin ikpaha mba man inyene se idiade. Ke ini emi esuñide ñnyin, ñnyin ikabade inọ ibọrọ edidiọñ, ke ini ekọbọde ñnyin, ñnyin iyọ. 13 Ke ini esabarede ñnyin, ñnyin ibọrọ ke ifure ifure usuñ, kpa ke idem idaha emi ñnyin imekabade idi mbubio enyọñ mmọñ ke enyin ererimbot. Ñnyin idighe baba ñkpọ kiet ke iso ererimbot ikan mbio emi eduọñọde ke ifum.

14 Ami ñwetke mme ñkpọ emi ndinam but anam mbufo, edi nduri mbufo utọñ nte mme ata ndima nditọ mi. 15 Ekpededi mbufo enyene mme andikpep tọsin duop ke Kraist, mbufo inyeneke mme ediwak ete, koro ke Kraist Jisọs, edi ami ndi ete mbufo oto ke Eti Mbuk Uwọrọ ufin emi ami ñkwọrọde nnọ mbufo. 16 Ke ntre, mekpe mbufo ubọk nte yak mbufo ekpebe mi, enyuñ eda uwutñkpọ eto mi.

17 Ke ntak emi ami ke ndọñ Timoti, eyen mi emi mmade eti eti, emi edide owo akpanikọ ke Ọbọñ. Enye eyeti mbufo usuñ nte ami ndude uwem ke Jisọs, emi asañade ekekem ye se ami ñkpepde ke kpukpru ebiet ke ufọk Abasi kiet.

18 Ubak mbufo emetọñọ ntañidem, koro ekerede ete ke ami ndidighe ndise mbufo. 19 Ke Abasi enyimede, ke usuñ kiet ekededi, ami ñyedi ndise mbufo idibighike, ndien ke ini oro ami ñyefiọk ke idem mi se mme mbon ntañidem oro ekemede ndinam, idighe ke ikọ inua kpọtkpọt. 20 Koro Obio Ubọñ Abasi idighe mbubehe ikọ inua, edi eke odudu. 21 Ewe ke mbufo ekpema? Ami ndidi ntiene mbufo ye ikpa, mme ndidi ye esit ima ye spirit nsuhọde idem?