1 Kemi, ke se itukde udia emi ewade enọ mme abasi ubọk owo, nte mme ndem, edi ofuri akpanikọ nte ke kpukpru ñnyin imenyene ifiọk nte mmọ edọhọde. Edi utọ ifiọk oro anam owo atañ idem; edi ima anam ñkọri odu. 2 Owo emi ekerede ete ke imọ imọfiọk ñkpọ ke akpanikọ enye itimke ifiọk ñkpọ nte enye ọkpọfiọkde. 3 Edi owo emi amade Abasi ke ofuri esit, ke Abasi ọdiọñọ.

4 Ke se itukde edidia udia emi ewade enọ mme ndem: Ñnyin imọfiọk ite ke ndem ada ọnọ se miduhọ uwem; ñnyin imọfiọk ite ke Abasi kiet odu. 5 Ekpededi se ekotde ñkpri abasi emi edude ke enyọñ mme ke isọñ, mmọ ekpededi mme uwak ñkpri abasi, kpa nte mme eteufọk mmọ ewakde, 6 kpa ye oro Abasi kierakiet odu ọnọ ñnyin, Ete emi edide Andibot kpukpru ñkpọ, ndien ñnyin idu uwem inọ Enye; Ọbọñ kiet ñko odu, Jisọs Kraist, emi ekanamde kpukpru ñkpọ eto Enye, emi inyuñ idude uwem ñnyin ito Enye.

7 Edi idighe kpukpru owo efiọk akpanikọ emi. Ubak owo emehe ye mme ndem tutu esim idahaemi mmọ ediade udia emi nte edi udia emi ewade enọ ndem ke akpanikọ; sia esit mmọ ememde, mmọ ekere ete ke udia oro asabarede mmimọ. 8 Udia inyeneke ñkpọ ndinam ye ebuana ñnyin ye Abasi; inyeneke se itakde ñnyin edieke ñnyin midiaha, mme se ikemede ndidoro ñnyin edieke ñnyin idiade. 9 Ekpeme eti eti, ekuyak uwọrọ ufin mbufo anam mmọ emi enyenede mmemmem mbuọtidem eduọ eduk idiọkñkpọ.

10 Kere se, edieke owo emi ememde esit kabaña ñkpọ emi okutde fi enye emi enyenede ifiọk, nte adiade udia ke efe ndem, nte emi idinọhọ enye isọñesit ndidia udia emi ewade enọ ndem? 11 Ndien ke ntre, owo mmemidem emi, edide eyen ete fo emi Kraist akakpade abaña, eyetak oto ke "Ifiọk fo"! 12 Kadaña emi afo eduede nditọ ete fo ke utọ usuñ emi, onyuñ ọnọde esit emi ememde unan, afo emedue Kraist ñko. 13 Ke ntre, edieke se ami ndiade anamde eyen ete mi ọduọ oduk idiọkñkpọ, ami nditaha unam aba, mbak ami ndinam enye ọduọ oduk idiọkñkpọ.