1 Ke editọñọ Ikọ okodu, ndien ikọ oro okodu ye Abasi. Ikọ oro okonyuñ edi Abasi. 2 Enye (Ikọ) okodu ke editọñọ ye Abasi. 3 Abasi akanam kpukpru ñkpọ oto ke Enye. Ndien ke mikpotoho ke Enye ikpanamke baba ndomo ñkpọ kiet emi ekenamde. 4 Uwem okodu ke Enye, ndien uwem emi ekedi uñwana ọnọ kpukpru owo. 5 Uñwana emi ayama ke ekim, edi ntiense, nte ke Jisọs Kraist edi Uñwana emi, man oto ke Enye ekim ikemeke ndimen uñwana oro mfep.

6 Abasi ama ọdọñ isuñ Esie emi ekekerede Jọn. 7 Enye ekedi nditie ntiense, nte ke Jisọs Kraist edi Uñwana emi, man oto ke Enye kpukpru owo ekpenim ke akpanikọ. 8 Jọn ke idem esie ikedighe uñwana emi, enye ekedi nte ntiense kpọt ọnọ uñwana emi. 9 Enye ekedi ata uñwana emi ayamade ọnọ kpukpru owo emi edukde edi ke ererimbot.

10 Enye ama odu ke ererimbot, ndien okposuk edi emi ekebede ke Enye enam ererimbot, ererimbot ikọdiọñọke Enye. 11 Enye ekedi etiene oruk esiemọ, edi oruk esiemọ ikenyimeke Enye. 12 Edi kpukpru mmọ emi ekedarade Enye enyuñ enimde enyiñ Esie ke akpanikọ, Enye ama ọnọ mmọ unen ndikabade ndi nditọ Abasi; 13 mme nditọ emi emande itoho ke iyip, inyuñ itoho ke udọñitọñ obukidem, edi emana eto Abasi.

14 Edi ikọ emi ama akabade edi obukidem, onyuñ oduñ ke otu ñnyin ke esisit ini ke ererimbot. Ñnyin inyuñ ikut ubọñ Esie, ubọñ ikpọñ Eyen emi okotode ke Ete ke enyọñ, emi ọyọhọde ye mfọn ye akpanikọ.

15 Jọn etiñ ikọ ntiense abaña Enye, onyuñ ofiori, ete, "Emi edi Enyemi ñketiñde mbaña nte, Enye emi etienede mi ke edem okpon akan mi, koro Enye ekebemde mi iso odu." 16 Kpukpru ñnyin imọbọ edidiọñ ikọrọ ye edidiọñ emi otode ke uyọhọ mfọn Esie. 17 Abasi ọkọnọ mme ibet oto Moses; edi mfọn ye akpanikọ eketo ke Jisọs Kraist. 18 Akananam owo baba kiet ikwe Abasi, ñkpasip Eyen Esie kierakiet, emi edide ukem nte Abasi, onyuñ etiede ke ñkañ Ete, Enye anam ñnyin idiọñọ kpukpru ñkpọ ibaña Ete.

19 Emi edi ikọ ntiense emi Jọn eketiñde kini mme ikpọ owo mme Ju ekedọñde mme oku ye mme udiana mmọ ke Jerusalem eka ekebup Jọn mme enye edi anie?

20 Enye ama akañ añwa añwa ete, "Ami ndighe Kraist."

21 Mmọ ema ebup enye ete, "Ndien afo edi anie? Nte afo edi Elaiya?" Enye ama ọbọrọ ete, "Ami ndighe Elaiya." "Nte afo edi Asiak Uduak Abasi?" Enye ama ọbọrọ ete, "Ami ndighe Asiak Uduak Abasi."

22 Ke akpatre mmọ ema ebup enye ete, "Afo edi anie? Nọ ñnyin ibọrọ ida isọk mme mmọ emi ekedọñde ñnyin. Afo etiñ nso abaña idem fo?"

23 Jọn ama ọbọrọ mmọ etiene nte se Prọfet Aisaya eketiñde, ete, "Ami ndi uyo andifiori ke akpa utatan, ete, eneñede usuñ Ọbọñ."

24 Ndien kpukpru mme mmọ emi mme Farisi ekedọñde, 25 ema edibup enye ete, "Ntaha afo enimde mme owo babtisim, edieke afo mudighe Andinyaña, mme Elaiya, mme Asiak Uduak Abasi-e?"

26 Jọn ama ọbọrọ mmọ ete, "Ami nda mmọñ nnim mbufo babtisim," "edi owo odu ke ufọt mbufo idahaemi, emi mbufo midiọñọke. 27 Enye edi Enyemi etienede mi ke edem, emi ami mmendotke nditat uruk ikpaukot Esie."

28 Ofuri mme ñkpọ emi eketibe ke Betani, obio emi odude ke edem inyañ akpa Jọdan eken, ke ebiet emi Jọn okonimde mme owo babtisim.

29 Ko ke ndañnsiere, Jọn ama okut Jisọs nte asañade ọbọiso ebine enye, ndien enye ama ọdọhọ ete, "Sese Eyenerọñ Abasi emi emende idiọkñkpọ ererimbot efep! 30 Enye edi Enyemi ñketiñde mbaña ke ini ñkọdọhọde nte, ‘Owo emi etienede mi ke edem okpon akan mi, koro Enye ekebemde Mi iso odu.’ 31 Ami ke idem mi ñkọdiọñọke Enye edi ñkeka iso ndinim mme owo babtisim man ñyararede Enye ñwut esien Isrel."

32 Ndien Jọn onyuñ ọnọ ikọ ntiense ete: "Ami mmañkut nte Edisana Spirit osuhọrede nte Ibiom oto enyọñ ọsọrọ Enye ke idem.

33 Tutu ye oro ami ñkọdiọñọke Enye, ke ebede emi ọkọdọñde mi nnim babtisim ke mmọñ, ama ọdọhọ mi ete, ‘Owo emi udukutde nte Spirit ọsuhọrede odoro enye ke idem, edi Enye edi Enyemi edinimde babtisim ke Edisana Spirit.’ 34 Ami mma ñnyuñ ñkut nte ñkpọ emi etibede, ñnyuñ ntie ntiense nte ke akpanikọ, emi edi Eyen Abasi."

35 Ke ndañnsiere, Jọn ama ada ye mbet esie iba. 36 Ke ini enye okutde Jisọs nte asañade ebe, enye ama ọdọhọ ete, "Sese Eyenerọñ Abasi!"

37 Ke ini mbet iba oro ekopde nte enye etiñde ntem, mmọ ewọñọde, enyuñ etiene Jisọs.

38 Jisọs ama ọwọñọde okut mmọ nte etienede Enye ndien Enye obup mmọ ete, "Mbufo eyom nso?" Mmọ ema ebọrọ ete, "Andikpep Afo oduñ ke mmọñ?"

39 Edi enye ama ọbọrọ mmọ ete, "Edi, edise." Ke ntre mmọ ema etiene Enye ekediọñọ ebiet emi Enye oduñde, enyuñ ebiat usen oro ye Enye. Ekedi ñkpọ nte ñkanika inañ mbubreyo. 40 Kiet ke otu owo iba emi ekekopde se Jọn eketiñde, onyuñ etienede Jisọs, ekedi Andru eyen eka Saimọn Pita.

41 Akpa ñkpọ emi Andru akanamde ekedi ndiyom eyen eka esie Saimọn, ndien ọdọhọ enye ete, "Ñnyin imokut Andinyaña emi edide Kraist." 42 Ndien enye ama ada Saimọn ọsọk Jisọs. Jisọs ama owuk enyin ese enye ndien ọdọhọ ete, "Afo edi Saimọn eyen Jọn. Eyekot fi Kefas" (emi ke edikabade ọwọrọ Pita) onyuñ ada ọnọ itiat.

43 Ke ndañnsiere, Jisọs ama ebiere ndika Kalili. Enye ama okut Filip, onyuñ ọdọhọ enye ete, "Tiene Mi." 44 Filip okoto Betsaida, obio kiet ye Andru ye Pita!

45 Filip ama okut Nataniel ndien ọdọhọ enye ete, "Ñnyin imọkut enyemi Moses ekewetde ñkpọ abaña ke ñwed ibet, emi mme Asiak Uduak Abasi ñko ekewetde ñkpọ ebaña. Enye edi Jisọs eyen Josef emi otode Nasaret."

46 Nataniel ama obup ete, "Nte baba eti ñkpọ ekeme ndito Nasaret?" Filip ama ọbọrọ enye ete, "Kam di dise."

47 Ke ini Jisọs okutde nte Nataniel asañade ekpere, Enye ama etiñ ikọ otuk enye ete, "Sese ata eyen Isrel mi, emi nsu nsu ñkpọ ndomokiet miduhọ enye ke idem."

48 Nataniel ama obup Enye ete, "Afo asaña didie ọdiọñọ mi?" Jisọs ama ọbọrọ enye ete, "Ami mma ñkut fi tọñọ ini emi afo okodude ke idak eto Fik mbemiso Filip okot fi."

49 Ndien Nataniel ama ọdọhọ ete, "Andikpep, afo edi Eyen Abasi; Afo edi Edidem Isrel."

50 Jisọs ama ọdọhọ ete, "Idighe afo enim ke akpanikọ koro ñkọdọhọde fi nte ke mma ñkut fi ke idak eto Fik? Afo eyekut mme ikpọ ñkpọ emi akande oro." 51 Ndien Enye ama ọdọhọ mmọ ete, "Akpanikọ ke ntiñ nnọ mbufo, nte mbufo eyekut nte ikpaenyọñ ebererede, ye nte mme enjel Abasi edọkde enyuñ esuhọrede ke idem Eyen Owo."