1 Ke ini Jisọs ama eketiñ mme ikọ emi okure, Enye ama emenede enyin ese enyọñ, onyuñ ọbọñ akam ete, "Ete ini oro edisim. Nọ Eyen Fo ubọñ, man Eyen Fo ñko ọkpọnọ Fi ubọñ. 2 Koro Afo ọkọnọde Enye odudu ndikara kpukpru owo, man otodo Enye ọkpọnọ kpukpru mme mmọ emi Afo ọkọnọde Enye nsinsi uwem. 3 Ndien emi edi nsinsi uwem oro; nte mmọ ekpekam ediọñọ Fi, ñkpasip Abasi akpanikọ kierakiet, ye Jisọs Kraist, emi Afo ọkọdọñde. 4 Mmemenede ubọñ fo ke isọñ ke ndinam utom emi Afo ọkọnọde Mi mma. 5 Ndien idahaemi Ete, nọ Mi ubọñ ke iso Fo, ukem ubọñ emi Ami ñkenyenede ye Afo mbemiso ekenanam ererimbot."

6 "Ami mmanam mme mmọ emi Afo okosioñode ke ererimbot ọnọ Mi ediọñọ Fi. Mmọ ekedi inyene Fo; ndien Afo amayak mmọ ọnọ Mi, ndien mmọ ema esuk ibuot enọ ikọ Fo. 7 Ndien idahaemi mmọ efiọk ete ke kpukpru ñkpọ emi Afo ọkọnọde Mi eto Fi. 8 Koro Ami mma nnọ mme ikọ emi Afo ọkọnọde Mi, ndien mmọ ema ebọ mme ikọ emi, mmọ ema efiọk ke akpanikọ ete ke Ami ñkoto ke Afo, enyuñ enim ke akpanikọ ñko ete ke edi Afo ọkọdọñ Mi."

9 Ami mbọñ akam mbaña mmọ, Ami mbọñke akam mbaña ererimbot, edi mbọñ mbaña mme mmọ emi Afo ọkọnọde Mi, koro mmọ edide okuo. 10 Kpukpru se Ami ñnyenede edi okuo, ndien kpukpru se Afo enyenede edi Okim. Ndien ubọñ esim Mi oto mmọ. 11 Ami ndiduhọ aba ke ererimbot, edi mmọ ke ededu ke ererimbot, ndien Ami ke ñnyọñ mbine Fi, Edisana Ete, kpeme mmọ to ke odudu enyiñ Fo, enyiñ emi Afo ọkọnọde Mi, man otodo mmọ edi kiet kpa nte emi ñnyin idide kiet. 12 Kadaña ini emi Ami ñkodude ye mmọ, Ami mma ñkpeme mmọ ñnyuñ nnim mmọ ke ifure ke enyiñ oro Afo ọkọnọde Mi. Ndomokiet ikosopke ke ebede eyen nsobo, man otodo ọkọsọñọ se ekewetde ke Ñwed Abasi.

13 Ndien idahaemi Ami ke ñnyọñ mbine Fi, ndien Ami ntiñ mme ñkpọ emi ke ini Ami nsuk ndude ke ererimbot, man otodo mmọ ekpenyene ọyọhọ udeme idara Mi ke esit mmọ. 14 Ami mma nnọ mmọ ikọ Fo, ndien ererimbot ema esua mmọ, koro mmọ midighe eke ererimbot aba kpa nte Ami mme ndighe eke ererimbot. 15 Mbeñeke nte yak Afo osioño mmọ efep ke ererimbot, edi mbeñe nte yak Afo ekpeme mmọ man andidiọk (Setan) edituk mmọ. 16 Mmọ idighe eke ererimbot kpa nte Ami mme ndighe eke ererimbot. 17 Da akpanikọ yet mmọ esana, ikọ Fo edi akpanikọ. 18 Kpa nte Afo ọkọdọñde Mi ke ererimbot, kpasuk ntre ñko ke Ami ndọñ mmọ ke ererimbot. 19 Ke ntak mmọ Ami mmanam idem Mi asana, man mmọ ñko ekpesana ke ofuri akpanikọ.

20 "Ami mbọñke akam Mi nnọ mmọ emi ikpọñ, edi mbọñ akam ñko mbaña mme mmọ emi edikabarede esit enim Mi ke akpanikọ ke ini iso, eto ke etop Eti Mbuk emi mmọ edikwọrọde. 21 Mbeñe nte yak mmọ kpukpru edi kiet, Ete, kpa nte emi Afo odude ke Ami ndien Ami ñko ndude ke Afo, yak mmọ ñko edu ke ñnyin man otodo ererimbot ekpenim ke akpanikọ ete ke edi Afo ọkọdọñ Mi. 22 Ami mmọnọ mmọ ubọñ emi Afo ọkọnọde Mi, man mmọ edi kiet kpa nte emi ñnyin idide kiet. 23 Ami ke mmọ, ndien Afo ke Ami, man otodo mmọ edi kiet ọyọhọ ọyọhọ, man ererimbot ediọñọ ete ke edi Afo ọkọdọñ Mi, ndien ke Afo amama mmọ nte Afo amade Mi." 24 "Ete, Ami ñyom mmọ emi Afo ama ọkọnọ mi ekpedu ye Ami ke ebiet emi Ami ndude, ndien enyuñ ekut ubọñ Mi, ubọñ emi Afo ọkọnọde Mi, koro Afo ama ama Mi mbemiso Afo obobot ererimbot."

25 "Edinen Ete, okposuk edi nte ererimbot midiọñọke Fi, Ami mọdiọñọ Fi, ndien mmọ efiọk ete ke edi Afo ọkọdọñ Mi. 26 Ami mma ñyarade Fi nnọ mmọ, ndien Ami ñyeka iso ndinam mmọ ediọñọ Fi, man ima oro Afo enyenede ọnọ Mi ekpedi eke mmọ ñko, ndien man Ami ke idem Mi ñkpodu ke mmọ."