1 Ke ọyọhọ usen ita, usọrọ ndọ ama odu ke Kenan ke Kalili. Eka Jisọs ama odu do, 2 ndien ema ekot Jisọs ye mme mbet Esie ñko ete edibuana ke usọrọ emi. 3 Ke ini wain ama okokure ke ufọt usọrọ, eka Jisọs ama ọdọhọ Enye ete, "Wain isuhọke aba inọ mmọ."

4 Jisọs ama ọbọrọ enye ete, "Eka, ñkemeke ndinam baba ñkpọ kiet kaña ke emi, ini Ami ndinam utibe ñkpọ ikemke kaña."

5 Ndien eka Jisọs ọdọhọ mme asañautom ete, "Enam se ededi emi Enye ọdọhọde mbufo ete enam."

6 Ndien mme abañ mmọñ itiokiet emi edade itiat ebot ema ediọhọ ekpere do, nte asañade ekekem ye ido edinam idem asana mme Ju. Ndien abañ mmọñ kiet okoduk ñkpọ nte ekpeme mmọñ ikie ye ata, mme ikie ye anañ. 7 Jisọs ama ọdọhọ mme asañautom ete, "Esin mmọñ eyọhọ ke mme abañ emi." Mmọ ema esin mmọñ ọyọhọ ke mme abañ emi tutu osim inua mmọ. 8 Ke ini mmọ ema ekekure, Enye ama ọdọhọ ete, "Ekoi ubak enyuñ emen esọk Etubom usọrọ." Mmọ ema enam nte Enye ọkọdọhọde.

9 Ndien ke ini Etubom usọrọ akatabide mmọñ emi ama akabade edi wain, enye ikọfiọkke ebiet emi wain emi otode, (edi mme asañautom emi ekekoide mmọñ ema efiọk). Do ke enye okokot ebendọ ada ñkañ kiet, 10 onyuñ ọdọhọ enye ete, "Emi edi eti wain, afo amanam ọkpuhọde ye mbon efen. Etubom usọrọ esibem iso ọnọ isenowo ata eti wain, ndien ke ukperedem ke adañaemi kpukpru owo eyuhọde wain minyuñ iyomke aba efen, ndien enyene ndida wain emi minemke ndi. Edi afo ama onim inem wain tutu ke utit usọrọ emi."

11 Akpa utibe ñkpọ emi Jisọs akanamde ekedi ke Kena, obio emi odude ke Kalili. Enye ama ayarade Ubọñ Esie, ndien mbet Esie ebuọt idem ye Enye.

12 Ke usọrọ ndọ emi ama okokure, Jisọs ye Eka Esie, ye nditọ eka Esie, ye mme mbet Esie ema esuhọde eka ke Kapanọm, ndien ema edu do ke ñkpọ nte usen ifañ. 13 Ndien ke usọrọ uwọrọ ufin mme Ju ama ekekpere, Jisọs ama ọdọk aka Jerusalem ndidia usọrọ oro.

14 Ke esit okure Edisana Ebiet mme Ju, Enye ama okut mme anyam urua nte enyamde enañ, erọñ ye ibiom emi edade ewa uwa, ye mme ọkpuhọ okuk etiede ye okpokoro urua mmọ. 15 Jisọs ama ada uruk anam ikpa ndien ebin kpukpru mmọ osioño ke Edisana Ebiet oro, onyuñ ebin enañ ye mme erọñ osioño. Ndien Enye ama onuk okpokoro mme ọkpuhọ okuk onyuñ asuan kpukpru mme okuk mmọ ọduọñọ. 16 Ndien Enye ama asaña ekpere mme irenowo emi enyamde ibiom, onyuñ ọdọhọ mmọ ete, "Etañ kpukpru ñkpọ emi efep mi. Ekuda Ufọk Ete Mi enim itie urua."

17 Mme mbet Esie ema eti ebaña se ekewetde ke ñwed Abasi ete, "Ifiopesit ñnyenede nno ufọk Fo esak ke esit mi nte ikañ."

18 Ikpọ owo mme Ju ema ebup Enye ete, "Nso unen ke Afo enyene ndibin mmọ nsioño? Edieke Afo enyenede unen emi oto Abasi, nam utibe ñkpọ nte idiọñọ da sọñọ."

19 Jisọs ama ọbọrọ mmọ ete, "Ọfọn, emi edi utibe ñkpọ emi ndinamde ñwut mbufo: Ewuri itie ukpono emi, ndien ke usen ita Ami ñyemenerede enye ñwuk."

20 Mme Ju ema ebọrọ Enye ete, "Ekeda isua aba ye itiokiet ebọp Edisana Ebiet Ukpono Abasi emi, ndien Afo emekeme ndibọp enye ke usen ita?" 21 Edi Edisana Ebiet Ukpono emi Enye eketiñde abaña ekedi Edisana Ikpọkidem Esie. 22 Ke Enye ama ekeset ke ñkpa mme mbet Esie ema eti se Enye eketiñde. Do ke mmọ ekenim ñwed Abasi ye mme ikọ emi Jisọs ekesitiñde ke akpanikọ.

23 Ke ntak mme utibe ñkpọ emi Enye akanamde ke Jerusalem ke ini usọrọ uwọrọ ufin, mme Ju ye mme ediwak owo ema enim ke enyiñ Esie ke akpanikọ, nte ke Enye edi "Andinyaña." 24 Edi Jisọs ikeyakke idem Esie inọ mmọ, koro Enye otimde ọdiọñọ se mme owo edide. 25 Ikanaha owo baba kiet etiñ ọnọ Enye se owo edide, koro Enye ọdiọñọde se idude ke esit owo kiet kiet.