1 Edi Jisọs ama afiak aka obot Ọlif. 2 Tughi tughi usen ubọk ke ndañnsiere, Jisọs ama afiak aka Edisana Ebiet. Mme otu owo ema ekanade Enye ekuk, ndien Enye ama etetie onyuñ ọtọñọ ndikpep mmọ ñkpọ 3 Nte Enye okosuk etiñde ikọ, ikpọ owo mme Ju ye mme Farisi ema eda eyen añwan emi ekemumde nte esinde efibe edi, enyuñ enam enye ọwọrọ ada ke iso kpukpru owo.

4 Ndien ema ekot Jisọs ete, "Andikpep, ñnyin ikomum eyen añwan emi ke idem itie emi enye esinde efibe. 5 Ke mbet ñnyin Moses ama owuk ete yak etọñ utọ añwan oro ke itiat. Idahaemi Afo ọdọhọ didie?"

6 Mmọ ekeda mbume emi nte afia ndida ñnyene isọñ ndidori Enye ikọ. Edi Jisọs ama ọnuhọ ke isọñ onyuñ ọtọñọ ndiwet ñkpọ ye nnuenubọk Esie ke isọñ. 7 Nte mmọ ekekade iso ndibup Enye mbume, Enye ama emenerede idem onyuñ ọdọhọ mmọ ete, "Edieke odude owo mbufo ndomokiet emi akananam minamke idiọkñkpọ, yak enye ebem iso emen itiat ọtọ eyen añwan emi."

8 Do ke Enye ọkọtọñọ ntak ọnuhọ onyuñ ewet ñkpọ ke isọñ. 9 Ke ini mmọ ema ekekop mme ikọ emi, mmọ ema etọñọ ndidiañade kiet kiet ñnyọñọ, ọtọñọde ke mme ikpọ oku, tutu Jisọs ọkọsuhọ ikpọñ ye eyen añwan oro.

10 Jisọs ama emenerede idem onyuñ obup eyen añwan oro ete, "Eyen añwan, enye mmọ? Nte, owo ndomokiet ibiomke fi ikpe?"

11 Enye ama ọbọrọ ete, "Ete, baba mmọ ndomokiet ibiomke mi ikpe." Jisọs ama ọdọhọ enye ete, "Ke ntre, Ami ñko mbiomke fi ikpe, nyọñ idahaemi, edi sana uwem idiọkñkpọ fo yak."

12 Ke ini Jisọs ọkọtọñọde ntak etiñ ikọ ọnọ mme otu owo, Enye ama ọdọhọ ete, "Ami ndi uñwana ererimbot, owo ekededi emi etienede Mi enye enyene uñwana uwem, ndien enye idisañake ke ekim."

13 Mme Farisi ema efaña ye Enye ete, "Ke emi Afo etie ntiense idem Fo, se Afo etiñde isọñọke baba ñkpọ kiet."

14 Jisọs ama ọbọrọ mmọ ete, "Ekpededi Ami ntie ntiense idem Mi, se Ami ntiñde edi akpanikọ koro Ami ndiọñọde ebiet emi Ami ntode ndi mi, ñnyuñ ndiọñọ ebiet emi Ami ñkade. Edi mbufo inyeneke ifiọk ibaña ebiet emi Ami ntode ndi mi, mme ebiet emi Ami ñkade. 15 Mbufo ebiere ikpe ke idaha ifiọk owo, Ami mbiomke owo ndomokiet ikpe. 16 Edi edieke Ami ñkpebiomde mbufo ikpe, edibiere Mi edi nnen nnen koro Ami mmendaha ikpọñ. Ami nda ye Ete emi ọkọdọñde Mi. 17 Emewet ke mbet mbufo ete, ke ntiense iba ema etiñ ikọ kiet, se mmọ etiñde edi akpanikọ. 18 Ami ntie ntiense mbaña idem Mi, ndien Ete Mi emi ọkọdọñde Mi onyuñ etie ntiense abaña Mi."

19 Mmọ ema ebup Enye ete, "Enye Ete Fo?" Jisọs ama ọbọrọ ete, "Mbufo idiọñọke Mi, mme ndidiọñọ Ete Mi, edieke mbufo ekpediọñọde Mi, mbufo ekpediọñọ Ete Mi ñkọ."

20 Jisọs eketiñ mme ikọ emi ke ini Enye akade iso ekpep ñkpọ ke Edisana Ebiet ke nde emi ekperede itie usin enọ. Kpa ye oro owo ndomokiet ikemumke Enye koro ini Esie ikọyọhọke.

21 Jisọs ama ọtọñọ ntak etiñ ọnọ mmọ ini kiet efen ete, "Ami mmọñ ñnyọñ ndien mbufo eyeyom Mi, ndien mbufo eyekpa ke idiọkñkpọ mbufo. Ebiet emi Ami ñkade mbufo ikemeke ndisim do."

22 Mme ikọ emi ama anam mme Ju ebup ete, "Nte Enye oyom ndiwot idem Esie? Mme oro ekpedi ntak emi enye ọdọhọde ete, ebiet emi Ami ñkade mbufo ikemeke ndisim do?"

23 Edi Jisọs ama aka iso nditiñ ete, "Mbufo eto ke ererimbot mi ke isọñ, Ami nto ke enyọñ. Mbufo edi eke ererimbot; Ami ndighe eke ererimbot. 24 Ntak edi oro ñkọdọhọde mbufo nte ke eyekpaña ke mme idiọkñkpọ mbufo, edieke mbufo minimke ite ke Ami ndi Enyemi Ami ndide, ke akpanikọ mbufo eyekpaña ke idiọkñkpọ mbufo."

25 Mmọ ema ebup Enye ete, "Afo emi ededi anie?" Jisọs ama ọbọrọ ete, "Kpa se Ami mma ñketetiñ nnọ mbufo toto ke editọñọ ke Ami ndi. 26 Mme ata ediwak ñkpọ edu emi Ami ñnyenede nditiñ ñnyuñ nda mbiom mbufo ikpe. Enye emi ọkọdọñde Mi, ke usuñ kiet ekededi edi anam akpanikọ, ndien Ami ñko ñnyuñ ntiñ nnọ ererimbot kpa se Ami ñkopde nto Enye." 27 Mmọ ikọdiọñọke ite ke Enye eketiñ ikọ emi ọnọ mmọ abaña Ete Esie.

28 Do ke Jisọs ọkọdọhọ mmọ ete, "Ke ini mbufo ema emenede Eyen Owo ke enyọñ, mbufo eyediọñọ ete ke Ami ndi Enyemi Ami ndide; ini oro ke mbufo edifiọk ete ke Ami nnamke ñkpọ baba kiet ke idem Mi, edi ntiñ kpasuk se Ete ekekpepde Mi. 29 Enyemi ọkọdọñde Mi odu ye Ami, Enye ikpọñke Mi ikpọñ koro Ami nnamde se inemde Enye esit kpukpru ini."

30 Ke adañaemi Enye okosuk etiñde ikọ, ediwak owo ema ebuọt idem ye Enye. 31 Jisọs ama ọdọhọ mme Ju oro ekebuọtde idem ye Enye, ete, "Edieke mbufo edisukde ibuot inọ ukpepñkpọ Mi, mbufo eyetim edi mme mbet Mi. 32 Mbufo eyefiọk akpanikọ, ndien akpanikọ eyenam mbufo ewọrọ ke ufin."

33 Mmọ ema ebọrọ Enye ete, "Ñnyin idi ubon Ebraham ndien akananam ñnyin idukke ufin inọ owo baba kiet. Afo ekeme didie ndien ndidọhọ ete ke eyenam ñnyin iwọrọ ke ufin?"

34 Jisọs ama ọbọrọ mmọ ete, "Ami ntiñ akpanikọ nnọ mbufo, nte, owo ekededi emi anamde idiọkñkpọ edi ofin idiọkñkpọ.

35 Ofin inyeneke iwuk itie ke ekpuk, edi eyen edi inyene ekpuk ke nsinsi. 36 Ke ntre edieke Eyen Owo anamde mbufo ewọrọ ufin, mbufo eyewọrọ ufin ke akpanikọ. 37 Ami mmọfiọk nte ke mbufo eto ubon Ebraham, kpa ye oro mbufo ke eyom usuñ ndiwot Mi, koro mbufo esinde ukpepñkpọ Mi. 38 Ami ntiñ mbaña se Ete Mi ama okowut Mi, edi mbufo enam se ekopde eto ete mbufo."

39 Mmọ ema ebọrọ Enye ete, "Ebraham edi ete ñnyin." Jisọs ama ọbọrọ ete, "Edieke mbufo ekpedide ata nditọ Ebraham ke akpanikọ, mbufo ekpenam mme ukem utom emi enye akanamde." 40 Nte edide, idahaemi mbufo emebiere ndiwot Mi koro Ami ntiñde akpanikọ emi ñkopde nto Abasi nnọ mbufo. Ebraham ikanamke utọ ñkpọ eke etiede ntem. 41 "Mbufo enam mme ñkpọ emi ete mbufo anamde." Mmọ ema efaña eti eti ete, "Ñnyin idighe nditọ iban akpara. Ete kiet emi ñnyin inyenede edi Abasi ke idem Esie."

42 Jisọs ama ọdọhọ mmọ ete, "Edieke Abasi ekpedide Ete mbufo, mbufo ekpema Mi, koro Ami ntode ke Abasi, ndien idahaemi, Ami mmọ mi. Ami ñkedighe ke idem Mi, edi Enye ọkọdọñ Mi. 43 Ntak emi usem Mi miñwañake mbufo edi koro mbufo mikemeke ndikop se Ami ntiñde. 44 Mbufo edi inyene ete mbufo, andidiọk (Setan), ndien mbufo eyom ndinam uduak ete mbufo. Enye ekedi owot owo toto ke editọñọ, ikonyuñ inyimeke akpanikọ, koro akpanikọ baba kiet miduhọ enye ke idem. Ke ini emi enye osude nsu, enye esem usem obio emana esie, koro enye edide osunsu ye ete kpukpru oruk nsu. 45 Edi sia ntiñde akpanikọ, mbufo inimke Mi ke akpanikọ."

46 "Nte owo mbufo ndomokiet ekeme ndibiom Mi ikpe kabaña idiọkñkpọ? Edieke Ami ntiñde akpanikọ, ntaha mbufo minimke Mi ke akpanikọ-ọ? 47 Owo ekededi emi edide eke Abasi okokop se Abasi etiñde. Ntak emi mbufo mikopke edi koro mbufo idighe eke Abasi."

48 Mme Ju ebọrọ Enye ete, "Nte ñnyin inenke edieke idọhọde ite ke Afo edi owo Sameria ye enyemi mme ndiọi spirit eduñde ke idem?"

49 Jisọs ama ọbọrọ ete, "Ami ñnyeneke idiọk spirit ke idem Mi. Ami nnọ Ete Mi ukpono edi mbufo ikponoke Mi. 50 Ami ñyomke itie ukpono nnọ idem Mi. Owo kiet odu emi oyomde ukpono oro, emi etebede Mi ikpe. 51 Ami ntiñ akpanikọ nnọ mbufo nte, edieke owo omumde ikọ Mi akama enye idikpaha ñkpa."

52 Mme Ju ema edọhọ Enye ete, "Idahaemi ñnyin imetim idiọñọ ite ke Afo emenyene ndiọi spirit ke idem! Ebraham ama akpa, kpasuk ntre ñko ye mme Asiak Uduak Abasi eken. Kpa ye oro Afo ọdọhọ ete edieke owo enimde ikọ Fo ke akpanikọ enye iditabike ñkpa. 53 Nte Afo omokpon akan ete ñnyin Ebraham? Enye ama akpa, ndien kpa ntre ye mme Asiak Uduak Abasi. Afo ekere ete Imọ idi anie?" 54 Jisọs ama ọbọrọ ete, "Edieke Ami ñkponode idem mi, ukpono oro iwọrọke ñkpọ ndomokiet, Ete Mi emi mbufo edọhọde ete ke onyuñ edi Ete mbufo edi Enyemi emenerede Mi ọnọ itie ukpono. 55 Okposuk edi nte mbufo midiọñọke Enye, Ami mọdiọñọ Enye. Edieke Ami ñkpọdọhọde nte ke Ami ndiọñọke Enye, Ami ñkpedi osunsu nte mbufo, edi Ami mmọdiọñọ Enye, ñnyuñ nnim mme ikọ Esie. 56 Ete mbufo Ebraham ama adara ke ekikere edikut usen Mi; enye ama okut usen oro onyuñ adat esit."

57 Mme Ju ema edọhọ Enye ete, "Afo udighe kaña isua aba ye duop ke emana, ndien afo okut Ebraham?"

58 Jisọs ama ọbọrọ ete, "Ami ntiñ akpanikọ nnọ mbufo nte mbemiso Ebraham akamana, Ami mma ndodu!"

59 Ke ntak emi mmọ ema etañ itiat nditọñ Enye, edi Jisọs ama edibe onyuñ ọfiọnọde ọwọrọ ke añwa Edisana Ebiet.