1 "Ekuyak esit etimede mbufo, mbufo ekaiso ndibuọt idem ye Abasi, enyuñ ebuọt idem ye Ami. 2 Ediwak ufọk edu ke ufọk Ete Mi ko ke enyọñ, ke mikpedighe ntre, Ami ñkpetiñ nnọ mbufo. Ami mmọñ ñka do nditim itie nnim nnọ mbufo. 3 Ndien Ami mma ñka ñketim itie nnọ mbufo, Ami ñyefiak ndi ndien ndida mbufo ekedu ye Ami man mbufo ñko ekpedu ye Ami ke ebiet emi Ami ndude. 4 Mbufo emediọñọ usuñ emi esimde ebiet emi Ami ñkade."

5 Tọmọs ama ọdọhọ Enye ete, "Ọbọñ, ñnyin idiọñọke ebiet emi Afo akade, ñnyin ikeme ndien didie ndidiọñọ usuñ?"

6 Jisọs ama ọbọrọ enye ete, "Ami ndi usuñ ye akpanikọ ye uwem. Owo baba kiet idighe itiene Ete ke mibọhọke ke Ami. 7 Edieke mbufo ekpediọñọde ke akpanikọ enye emi Ami ndide, mbufo ekpediọñọ Ete Mi nde. Ọtọñọde ke emi mbufo emediọñọ Enye, emenyuñ ekut Enye."

8 Filip ama ọbọrọ Enye ete, "Ọbọñ, wut ñnyin Ete oro ndien ñnyin iyeyuhọ."

9 Jisọs ama ọbọrọ ete, "Nte afo udiọñọke Mi, Filip?" Kpa ye Ami emi mma ñkodu ye mbufo ke utọ anyan ini oro? Owo ekededi emi okutde Mi okut Ete. Afo ekeme didie ndidọhọ ete, "Wut mi Ete ndien? 10 Nte mbufo inimke ke akpanikọ ite ke Ami ndu ke Ete ndien Ete ñko onyuñ odu ke Ami? Mme ikọ emi Ami ntiñde ye mbufo idighe okim, edi eke Ete emi oduñde Mi ke idem, edi Enye akaiso ndinam utom Esie. 11 Enim Mi ke akpanikọ ke ini ndọhọde nte ke Ami ndu ke Ete ñko ke Ete odu ke Ami; ke midighe ntre enim ke akpanikọ kabaña mme nnam-ñwut utibe ñkpọ emi mbufo ekutde.

12 Ami ntiñ akpanikọ nnọ mbufo nte, owo ekededi emi ọbuọtde idem ye Ami, enye eyenam se Ami ñkekade iso ndinam. Enye eyenam mme ñkpọ emi ekande oro, koro Ami mmọñ ñka mbine Ete Mi. 13 Ndien Ami ñyenam se ededi emi mbufo edibupde ke enyiñ Mi, man otodo Eyen ada ubọñ ọnọ Ete. 14 Mbufo eyebup Mi ñkpọ kiet ekededi ke enyiñ Mi, ndien Ami ñyenam enye."

15 "Edieke mbufo emade Mi eyenam se Ami ñwukde nte mbufo enam. 16 Ami ñyebup Ete ndien Enye eyenọ mbufo ọnọ-item efen emi edidude ye mbufo ke nsinsi. 17 Kpa Spirit emi ayararede akpanikọ abaña Abasi. Ererimbot ikemeke ndibọ Enye ñnyene, koro mmọ mikemeke ndikut Enye mme ndidiọñọ Enye. Edi mbufo ema ediọñọ Enye, koro Enye oduñde ye mbufo, ndien Enye eyeduk oduñ mbufo ke idem. 18 Ami ndikpọñke mbufo nte nditọ akpa; Ami ñyefiak ndi ntiene mbufo. 19 Idibighike, ererimbot idikwe Mi aba, edi mbufo eyekut Mi; ndien sia Ami ndude uwem, mbufo ñko eyenyuñ edu uwem. 20 Ke usen oro ama edi, mbufo eyefiọk ete ke Ami ndu ke Ete, ndien ke mbufo ñko edu ke Ami, kpa nte Ami ndude ke mbufo. 21 Owo ekededi emi enyimede onyuñ enimde mme ibet Mi enye edi enyemi amade Mi. Ete Mi eyema enyemi amade Mi; Ami ñko ñyema enye ñnyuñ ñyarade idem Mi nnọ Enye."

22 Judas (idighe Judas lskariọt) ama ọdọhọ ete, "Ọbọñ ntaha anade nte Afo ayarade idem fo ọnọ ñnyin muyarakede unọ ererimbot-e?"

23 Jisọs ama ọbọrọ enye ete, "Edieke owo ndomokiet amade Mi, enye eyenim mme ukpepñkpọ Mi. Ete Mi eyema enye, ndien ñnyin iyedi itiene enye inyuñ inam ebiet iduñ ñnyin ye enye. 24 Owo emi mimaha Mi, idinamke mme ukpepñkpọ Mi. Mme ikọ emi mbufo ekopde eto Mi idighe eke idem Mi; mmọ enyene Ete emi ọkọdọñde Mi. 25 Ami ntiñ emi nnọ mbufo ke adañaemi Ami nsuk ndude ye mbufo. 26 Edi andiñwam, Edisana Spirit, emi Ete edidọñde ke enyiñ Mi, eyekpep mbufo kpukpru ñkpọ, onyuñ anam mbufo eti kpukpru se Ami mma ñketetiñ nnọ mbufo.

27 Emem ke Ami ñkpọñ nnọ mbufo, emem Mi ke Ami nnọ mbufo. Ami nnọhọ mbufo nte ererimbot enọde. Ekuyak esit etimede mbufo, ekunyuñ efehe ndik. 28 Mbufo ema ekop Mi ndọhọde nte, Ami ñyekpọñ mbufo, edi Ami ñyefiak ndi mbine mbufo; edieke mbufo ekemade Mi, mbufo eyedara ke ntak emi Ami ñkade mbine Ete, koro Ete okponde akan Mi. 29 Ami mmetiñ nnọ mbufo idahaemi mbemiso ñkpọ emi etibe, man otodo ke ini mmọ editibede mbufo ekpenim ke akpanikọ.

30 Ami nditiñke ikọ ebighi aba ye mbufo, koro andinyene ubọñ ererimbot emi (Setan) ke ededi. Enye inyeneke odudu ndomokiet ke idem Mi, 31 edi ererimbot enyene ndifiọk nte ke Ami mmama Ete, ndien ke Ami nnam ukem ukem se Ete Mi owukde Mi nnam. Edi eyak ñnyin idaha ikpọñ ebiet emi."