1 Ekedi ke usen emi ekebemde usọrọ uwọrọ ufin iso, ke Jisọs ọkọdiọñọ ete ke ini edikem emi anade nte imọ ikpọñ ererimbot emi inyuñ itiene Ete. Ke Enye ama akama ikọt Esie emi ekedude ke isọñ, Enye ndien ama owut mmọ uyọhọ ima Esie ke edima mmọ tutu esim utit. 2 Ke ini emi Jisọs ye mme mbet Esie ekediade udia mbubreyo, Setan ama ekesin ke esit Judas Iskariọt eyen Saimọn ete atap Jisọs. 3 Jisọs ama ọdiọñọ ete ke Ete ama ayak kpukpru ñkpọ esin ke idak odudu Imọ, ndien ke Imọ ikoto ke Abasi inyuñ iyom ndi fiak ntiene Abasi. 4 Do ke Enye akadaha ada ọkpọñ udia, osio ọfọñ enyọñ idem Esie, ndien emen tọwid, (ọfọñ ukuọhọrede idem) awaña ke isin. 5 Ke Enye ama akanam emi ama, Enye ama añwaña mmọñ esin ke besin onyuñ ọtọñọ ndiyet mme mbet Esie ukot ndien ada tọwid emi Enye akawañade ke isin ọkwọhọrede.

6 Enye ama edisim Saimọn Pita, emi ọkọdọhọde enye ete, "Ọbọñ mi, nte Afo oyom ndiyet mi ukot?"

7 Jisọs ama ọdọhọ enye ete, "Afo udiọñọke idahaemi se Ami nnamde, edi ọyọdiọñọ ke ini iso."

8 Pita ama ọdọhọ ete, "Baba, Afo uduyetke ukot mi." Jisọs ama ọbọrọ enye ete, "Ibọhọke Ami ñyet fi ukot, afo ududighe aba mbet Mi."

9 Saimọn ama ọbọrọ ete, "Ọbọñ kuyet mme ukot mi ikpọñ, edi yet mme ubọk ye ibuot mi dian."

10 Jisọs ama ọbọrọ, ete, "Owo emi ama ekeyere mmọñ, enyene ndiyet ukot ikpọñ man enye asana ofuri idem. Mbufo emesana ke ebede owo kiet." 11 Koro Jisọs ama ọdiọñọ owo emi editapde Enye inọ ñkpa, ndien emi ekedi ntak emi Enye ọkọdọhọde ete ke idighe kpukpru owo esana.

12 Ke Enye ama ekeyet mmọ ukot okure, Enye ama emen ọfọñ Esie esine onyuñ akada itie Esie. Enye ama obup mmọ ete, "Nte mbufo emediọñọ se Ami ñkenamde ye mbufo?" 13 Mbufo ekot Mi Andikpep ye Ọbọñ; emi edi nnen nnen mbufo ndinam ntre koro Ami ndide se mbufo ekotde oro. 14 Ke emi Ọbọñ ye Andikpep mbufo ama ekeyet mbufo ukot, mbufo ñko enyuñ eyet kiet eken ukot. 15 Ami mmọnọ mbufo uwutñkpọ nte yak mbufo enam nte Ami mma ñkanam ye mbufo. 16 Ami ntiñ akpanikọ nnọ mbufo nte eyen ufọk ndomokiet ikponke ikan Ete ufọk esie, mme asañautom ndikpon ñkan enye emi ọkọdọñde enye utom. 17 Ke emi mbufo ema ekefiọk mme ñkpọ emi, eyefọn ye mbufo edieke mbufo enamde mmọ.

18 Ami ntiñke emi mbaña kpukpru mbufo, ami mmetim ndiọñọ kpukpru mme mmọ emi ñkemekde. Edi, emi edi ndisọñọ se ñwed Abasi etiñde ete, "Owo emi abuanade uyo ye Ami eyewọñọde añwana ye Ami." 19 "Ami ntiñ emi nnọ mbufo idahaemi mbemiso editibe, man ke adaña ini emi mme ñkpọ emi editibede mbufo ekpenim ke akpanikọ nte ke Ami ndi Enye.

20 Ami ntiñ akpanikọ nnọ mbufo nte, owo ekededi emi enyimede enye emi Ami ndọñde, enyime Mi, ndien owo ekededi emi enyimede Mi enyime Enyemi ọkọdọñde Mi."

21 Ke Jisọs ama eketiñ mme ikọ emi ama, esit ama etimede Enye, ndien Enye ama osio owut añwa añwa ete, "Ami ntiñ akpanikọ nnọ mbufo, owo kiet ke otu mbufo eyetap Mi ọnọ ñkpa." 22 Mme mbet Esie ema ewọñọde enyin ese kiet eken ye ọkpọsọñ eyighe ete mme anie owo ke Enye etiñ abaña. 23 Kiet ke otu mmọ, mbet emi Jisọs akamade, eketie adiana Enye. 24 Saimọn ama ọnọ enye idiọñọ ke ibuot ete yak enye obup Jisọs owo emi ekemede ndinam oruk ñkpọ emi etiede ntre.

25 Enye ama esik ekpere Jisọs, onyuñ obup Enye ete, "Ọbọñ, anie edi owo oro?"

26 Jisọs ama ọbọrọ ete, "Edi owo emi Ami ndinọde ibio uyo emi ke mma ndebi enye ke usan." Do ke Enye edebi ibio uyo oro ndien ayak ọnọ Judas Iskariọt, eyen Saimọn.

27 Ndo ndo oro Judas ọkọbọde uyo oro, Setan ama oduk enye idem. Jisọs ama ọdọhọ enye ete, "Se afo oyomde ndinam, nam usọp usọp."

28 Edi baba owo ndomokiet ke okpokoro udia oro ikọfiọkke ntak emi Jisọs eketiñde ikọ ye enye. 29 Sia Judas ekedide akama okuk, ubak mmọ ekekere ete ke Jisọs ọkọdọhọ enye edep se ediyomde ke usen usọrọ, mme ndinọ mme mbio ubuene ñkpọ. 30 Judas okonyuñ ọbọbọ uyo oro, enye ama adaha ada ọwọrọ añwa. Ndien ekedi ke okoneyo.

31 Ke ini enye ama akaka ama, Jisọs ama ọdọhọ ete, "Idahaemi ke enọ Eyen Owo ubọñ ndien Ete onyuñ ọbọ ubọñ ke Eyen. 32 Edieke Ete ọbọde ubọñ ke Eyen, Ete ñko eyenọ Eyen ubọñ ke idem Esie, ndien eyenọ Enye ubọñ inikiet." 33 "Mme nditọ Mi, ami ndidu ye mbufo ke esisit ini. Mbufo eyeyom Mi, ndien kpa nte ñketiñde nnọ mme Ju, kpa ntre ke ntiñ ñko nnọ mbufo, ebiet emi Ami ñkade mbufo ikemeke nditiene Mi.

34 Obufa ewuhọ ke Ami nnọ mbufo! Ema kiet eken. Nte Ami ñkamade mbufo, ntre ke mbufo enyene ndima kiet eken. 35 Edieke mbufo emade kiet eken, do ke kpukpru owo edidiọñọ ete ke mbufo edi mme mbet Mi."

36 Saimọn Pita ama obup Enye ete, "Ọbọñ, Afo oyom ndika mmọñ?" Jisọs ama ọbọrọ ete, "Afo ukemeke nditiene Mi idahaemi ñka ebiet emi Ami ñkade, edi ke ini iso afo eyedi etiene Mi."

37 Pita ama obup ete, "Ọbọñ, ntaha ami mmeñkemeke nditiene Fi idahaemi-e? Ami ñyeyak uwem mi nnọ ke ntak Fo."

38 Do ke Jisọs ọkọbọrọ ete, "Nte afo eyeyak uwem fo ke akpanikọ ọnọ ke ntak Mi? Ami ntiñ akpanikọ nnọ fi, nte, mbemiso ekikọ ọkpọk, afo eyekañ Mi ikata."