1 Ke ata usenubọk ke akpa usen ke urua, kadaña emi eyo mikeñwañake kaña, Meri emi ekotde Makdalin ama aka ke udi oro ndien okokut nte ke ema ekpat itiat efep ke inua udi.

2 Do ke enye ekefehe ebine Saimọn Pita ye mme mbet eken, enye emi Jisọs akamade onyuñ ọdọhọ ete, "Mmọ ema esio Ọbọñ ñnyin ke udi, ndien ñnyin idiọñọke ebiet emi mmọ enimde Enye."

3 Ke ntre Pita ye mbet eken ema edaha eka ndise udi. 4 Mmọ mbiba ekefehe itọk edi mbet enye eken ama efehe ebe Pita onyuñ ebem iso ekesim udi. 5 Enye ama ọnuhọ okut ebok afia ọfọñ nte anade do, edi ikedukke esit. 6 Ekem Saimọn Pita emi eketienede enye ke edem ama edisim, ndien ama ebe oduk ke esit udi. Enye ama okut ebok afia ọfọñ emi ekedade ewañ Enye nte anade do, 7 kpa ye ọfọñ ñkpa emi ekedade ebọp Jisọs ke ibuot. Ọfọñ ibuot emi ama ọfọrọde ke idem esie ọkpọñ eken, ọfurọ ke idem Esie ana do. 8 Ke akpatre, mbet eken emi ekebemde iso esim udi ama onyuñ enim ke akpanikọ. 9 Kpa ye oro, mmọ iketighi se ñwed Abasi eketiñde ete, ke akana Jisọs eset ke ñkpa.

10 Do mme mbet ema efiak enyọñọ ufọk mmọ. 11 Edi Meri ama osuk ada ke inua udi ke atua eyet. Nte enye okosuk atuade eyet, enye ama ọnuhọ ete ise esit udi, 12 ndien enye ama okut mme enjel iba esinede mfia ọfọñ idem nte etiede ke ebiet emi okpo Jisọs akanade, kiet ke ñkañ ibuot, ndien enye eken ke ukot.

13 Mme enjel ema ebup enye ete, "Eyen añwan, ntaha afo atuade eyet-e?" Enye ama ọbọrọ ete, "Mmọ emen Ọbọñ mi edaha, ndien ami ndiọñọke ebiet emi mmọ emende Enye ekenim."

14 Meri ke eketetiñ ntem, ye enye ndiwọñọrede, sese Jisọs do ada, edi enye ikediọñọke ite ke ekedi Jisọs.

15 Jisọs ama obup Enye ete, "Eyen añwan nsinam afo atuade eyet? Afo oyom anie?" Enye ekekere ete ke anditiñ ikọ oro ekedi ekpeme ekpri iñwañ oro, oro anam enye ama ọbọrọ ete, "Ete, edieke ekedide afo ekemen Enye efep, tiñ nọ mi ebiet emi afo enimde Enye, ndien ami ñyekemen Enye."

16 Jisọs ama okot enye ete, "Meri!" Enye ama ọwọñọde ese enye onyuñ ofiori ke usem Hibru, ete, "Raboni" (Emi ọwọrọde ete, Andikpep).

17 Jisọs ama ọdọhọ enye ete, "Kutuk Mi ubọk koro Ami ñnyọñke kaña mbine Ete Mi. Edi ka bine nditọ Ete Mi nyuñ dọhọ mmọ ete, ke Ami ke mfiak mbine Ete Mi, ye Ete mbufo, ke mbine Abasi Mi, ye Abasi mbufo."

18 Meri emi okotode Makdala ama ebine mme mbet ye eti mbuk emi nte ke imọ imekut Ọbọñ ndien ke Enye eketiñ mme ikọ emi ọnọ imọ.

19 Ke mbubreyo akpa usen urua oro, ke ini mme mbet ekebonode ebiet kiet ekọbi usuñ esine ke ntak ndik mme Ju, Jisọs ama oduk edida ke otu mmọ onyuñ ọdọhọ ete, "Emem odu ye mbufo." 20 Ke Enye ama eketiñ ntem ama, Enye ama owut mmọ mme ubọk Esie ye ñkañ Esie. Idara ama okpon eti eti ke emi mmọ ekekutde Ọbọñ mmọ.

21 Jisọs ama ọtọñọ ntak ọdọhọ ete, "Emem odu ye mbufo! Nte Ete ọkọdọñde Mi, ami ñko mmonyuñ ndọñ mbufo." 22 Ke Enye ama eketiñ emi, Enye ama eñwek ibifik ọduọk mmọ onyuñ ọdọhọ ete, "Ebọ Edisana Spirit. 23 Edieke mbufo efende owo ekededi mme idiọkñkpọ esie, efen kpukpru enọ owo oro; edieke mbufo mifenke inọ mmọ, idinyeneke edifen."

24 Kiet ke otu mme mbet Esie emi edide Tọmọs, emi ekekotde amanamba, ikọduhọ ye mme mbet eken ke ini emi Jisọs ekedide. 25 Ke ini emi mme mbet eken eketiñde enọ enye ete ke mmimọ ima ikut Ọbọñ, enye ama eneni ete, "Tutu ami ñkut mme nde okpoukwak ke mme ubọk Esie ñnyuñ mmen nnuen ubọk mi nsin ke mme nde oro mme ukwak eketibide, ñnyuñ nsin ubọk ke ñkañ Esie, ami ndinimke ke akpanikọ."

26 Ñkpọ nte urua kiet ama ekebe, mme mbet ema etọñọ ntak ebono ọtọkiet ke esit ufọk, ndien Tọmọs ama odu ye mmọ. Okposuk edi emi ekeberideberi usuñ, Jisọs ama oduk akada ke ufọt mmọ, ndien ọkọdọhọ ete, "Emem odu ye mbufo."

27 Do ke Enye ọkọdọhọ Tọmọs ete, "Sin nnuen ubọk fo mi; se mme ubọk Mi. Nyanarede ubọk fo, nyuñ sin Mi ke ñkañ. Tre eyighe fo ndien, nyuñ nim ke akpanikọ."

28 Tọmọs ama ọdọhọ Enye ete, "Ọbọñ mi ye Abasi mi!"

29 Do ke Jisọs ọkọdọhọ enye ete, "Koro afo ama okokut Mi, afo emenim ke akpanikọ? Ọfọfọn ọnọ mmọ emi mikwe ke enyin edi enim ke akpanikọ."

30 Jisọs ama anam ata ediwak mme utibe ñkpọ efen ke iso mme mbet Esie, emi owo miwetke isin ke ñwed emi. 31 Edi ewet mme mmọ emi man otodo mbufo enim ke akpanikọ nte ke Jisọs edi Kraist Andinyaña ye Eyen Abasi, ndien ke edinim ke akpanikọ mbufo ekpenyene uwem ke enyiñ Esie.