1 Owo mme Farisi kiet ama odu emi ekekerede Nikodimọs, ada usuñ kiet ke esop ukara mme Ju. 2 Enye ama ebine Jisọs ke okoneyo, onyuñ ọkọdọhọ ete, "Andikpep, ñnyin imọfiọk ite ke afo edi Andikpep emi otode ke Abasi. Koro baba owo ndomokiet ikemeke ndinam mme utibe idiọñọ emi afo akade iso ndinam edieke Abasi midaha ye enye." 3 Jisọs ama ọbọrọ enye ete, "Ami nda ofuri esit mi ntiñ emi nnọ fi nte, ke osiode owo amana obufa, enye ikemeke ndikut Obio Ubọñ Abasi."

4 Nikodimọs ama obup Enye ete, "Owo emi ama okokpon ama ekeme didie nditọñọ ntak mmana obufa? Eyighe iduhọ nte enye ikemeke nditọñọ ntak nduk eka esie idibi man enye ọtọñọ ntak amana ọyọhọ ikaba!"

5 Jisọs ọbọrọ enye ete, "Se Ami ntiñde emi edi akpanikọ, ibọhọke owo amana oto ke mmọñ ye Spirit enye ikemeke ndiduk Obio Ubọñ Abasi. 6 Owo amana oduk ererimbot oto Ete ye Eka, edi enye enyene emana Spirit oto ke Spirit. 7 Kuyak idem akpa fi ke emi ndọhọde fi nte, mbufo enyene ndimana obufa. 8 Ofum ofume aka nte enye amama; afo okop uyom emi enye anamde, edi afo udiọñọke ebiet emi enye otode edi mme ebiet emi enye akade. Ukem ukem ke edi ye owo kiet ekededi emi amanade oto Spirit."

9 Nikodimọs obup Jisọs ete, "Ñkpọ ntem ekeme didie nditibe?"

10 Jisọs ama ọbọrọ enye ete, "Afo edi andikpep ke Isrel, ndien afo udiọñọke ñkpọ emi? 11 Akpanikọ ke Ami ntiñ nnọ mbufo nte ñnyin itiñ ibaña se ñnyin ifiọkde, inyuñ itie ntiense ibaña se ikutde; tutu ye oro owo mbufo ndomokiet ibeñeke idem ndinyime etop ñnyin. 12 Mbufo inimke Mi ke akpanikọ ke ini ntiñde ikọ nnọ mbufo mbaña mme ñkpọ isọñ emi; didie ndien ke edinim Mi ke akpanikọ ke ini ntiñde ikọ nnọ mbufo mbaña mme ñkpọ enyọñ? 13 Ndien baba owo ndomokiet akananam idọkke enyọñ ke ebede Eyen Owo, emi okotode enyọñ ọsuhọrede edi isọñ. 14 Kpasuk nte Moses ekemenerede urukikọt okpoho ke enyọñ ke ọkọkọk ke isọñ utatan, kpasuk ntre ke edimenerede Eyen Owo ke enyọñ, 15 man otodo owo ekededi emi edinimde Enye ke akpanikọ ekpenyene nsinsi uwem. 16 Koro Abasi akamama ererimbot, oro akanam Enye osio ikpọñ ikpọñ Eyen Esie ọdọñ, ete owo ekededi emi ọbuọtde idem ye Enye okutak, edi enyene nsinsi uwem. 17 Abasi ikọdọñke Eyen Esie ke ererimbot ndidi ekpe ikpe esie, edi ekedi man anyaña ererimbot oto ke Enye.

18 Koro owo ekededi emi onimde Enye ke akpanikọ ididaha ke ikpe; edi owo ekededi emi minimke Enye ke akpanikọ, ikpe ama etetip enye ama, koro enye minimke enyiñ ikpọñ ikpọñ Eyen Abasi ke akpanikọ. 19 Ndien emi edi ntak utib ikpe: Uñwana edi ke ererimbot, edi mme owo ekema ekim ekan uñwana, koro mme edinam mmọ ekedide idiọk. 20 Owo ekededi emi anamde idiọk, asasua uñwana, ndien enye idinyuñ idighe ke itie uñwana, koro enye miyomke mme oburobut edinam esie ewọrọ ewut idem. 21 Edi owo ekededi emi odude uwem akpanikọ, ọwọrọ owut idem ke uñwana, do ke etim ekut ete se enye akanamde okoto ndausuñ Abasi."

22 Ke ñkpọ emi ama ekebe, Jisọs ye mme mbet Esie ema ekpọñ Jerusalem eka ke usuk obio Judia, Enye ama odu do ye mmọ ke esisit ini, ndien onyuñ enim mme owo babtisim.

23 Jọn ñko ama aka iso ndinim mme owo babtisim ke ebiet emi ekekotde Enọn, emi mikeyomke usuñ ikpọñ ebiet emi ekekotde Salim, koro ata ediwak mmọñ ama odu do. Mme owo ke ekeka ebine enye, enye ñko ke ekenim mmọ babtisim. 24 Ñkpọ emi ama otibe mbemiso emum Jọn esin ke ufọk ñkpọkọbi. 25 Usen kiet eneni ama etibe ke ufọt mme mbet Jọn ye owo Ju kiet abaña edu unam idem asana nte asañade ekekem ye ukpepñkpọ ido ukpono mmọ. 26 Ntre mmọ ema ebine Jọn ndien ekedọhọ enye ete, "Andikpep, owo oro okodude ye afo ke edem akpa Jọdan oko, kpa Enye emi afo eketiede ntiense abaña, sese Enye ke onim mme owo babtisim ndien kpukpru owo ke ebine Enye."

27 Jọn ama ọbọrọ ete, "Owo ekeme ndibọ kpọt se enọde enye oto enyọñ." 28 Mbufo ke idem mbufo emekeme ndidi ntiense nte ke mma ntiñ nte ke ami ndighe Kraist, edi ekedọñ mi ete ndinọ ntọt mbaña edidi Esie. 29 Ñwan ndọ enyene ebendọ. Ufan emi esede ñkpọ abaña ebendọ enyene ndibet ñnyuñ ñkpañ utọñ, ñnyuñ ndara ke ini emi enye okopde uyo ebendọ. Kpa ntem ke enam idara Mi ọyọhọ. 30 Enye enyene ndidọdiọñ ñkọri ñka iso, kadaña emi ami nsuhọrede.

31 Enyemi otode enyọñ okoñ akan kpukpru owo, ndien owo emi otode isọñ enyene isọñ, onyuñ etiñ ikọ abaña mme ñkpọ isọñ. Enyemi otode enyọñ okoñ akan kpukpru owo. 32 Enye etiñ abaña se Enye okokutde ye se Enye okokopde, edi baba owo ndomokiet ikenyimeke ikọ ntiense Esie. 33 Ndien owo ekededi emi enyimede ikọ ntiense Esie ayarade owut nte ke Abasi anam akpanikọ. 34 Enyemi Abasi okosiode ọdọñ etiñ mme ikọ Abasi, koro Abasi ọnọde Enye uyọhọ Spirit. 35 Ete ama Eyen Esie ndien ayak kpukpru ñkpọ esin ke ukara Esie. 36 Owo ekededi emi ọbuọtde idem ye Eyen enyene nsinsi uwem, edi owo ekededi emi esinde Eyen idikwe uwem oro, koro iyaresit Abasi odorode enye ke idem.