1 Ke ini esisit ama ekebe, Jisọs ama aka Jerusalem man akabuana ke usọrọ mme Ju. 2 Ke esit Jerusalem, ke nsaña-nduk emi ekotde lnua Otop mme erọñ, ñkpọdiọhọ mmọñ emi ekenyenede mme itie ndọknda ition ama odu, emi ekekotde ke usem mme Hibru Betesda. 3 Ata ediwak udim mbio udọñọ ema ena ke mme itie ndọknda emi, mme nnan, mme mbuñọ ye mme mbio akpaubeñ. Mmọ ekebet mmọñ oro etimede. 4 Koro kini, kini, enjel Abasi esisuhọde oduk onyuñ etimede mmọñ oro ndien ata akpa owo udọñọ emi ọsuhọrede oduk ñkpọdiọhọ mmọñ emi ke ini ema eketimede mmọñ emi, esinyene ndibọ edikọk nto oruk udọñọ kiet ekededi emi enye ọkọdọñọde.

5 Owo kiet ama odu ke otu mmọ emi ọkọdọñọde ke ñkpọ nte isua edip ye efuteta. 6 Ke ini Jisọs okokutde enye anade do, Enye ama ọfiọk inikiet nte ke enye ama ana do ye udọñọ esie ke ediwak isua. Do ke Jisọs okobup enye ete, "Nte afo omoyom ndikop nsọñidem?"

7 Owo udọñọ ama ọbọrọ ete, "Ete ami ñnyeneke owo emi emende mi esin ke ñkpọdiọhọ mmọñ ke ini asañautom Abasi (enjel) etimerede mmọñ. Kadaña ini emi ññwanade ndiduk, owo efen esibem mi iso oduk."

8 Jisọs ama ọdọhọ enye ete, "Daha ke enyọñ, fut mbri fo, nyuñ saña." 9 Ndo ndo oro, owo oro ama okop nsọñidem. Enye ama ofut mbri esie onyuñ ọtọñọ ndisaña isañ. Utibe ñkpọ emi eketibe ke usen Sabat. 10 Do mme ikpọ owo mme Ju ema edọhọ owo oro ekekọkde enye udọñọ ete, "Mfin edi usen Sabat, ndien mbet ñnyin akpan afo ndimen mbri fo."

11 Edi enye ama ọbọrọ mmọ ete, owo emi akanamde udọñọ okure mi ọkọdọhọ mi ete, "Daha ke enyọñ, fut mbri fo nyuñ saña."

12 Do mmọ ema ebup enye ete, "Anie edi owo oro ọkọdọhọde fi ete, ofut mbri fo, onyuñ adaha asaña?"

13 Owo emi ikọdiọñọke andikọk enye Udọñọ, koro otu owo ama okpon eti eti, ndien ñko Jisọs ama ọfiọnọde ọwọrọ. 14 Edi edikem, Jisọs ama okokut enye ke itie ukpono mme Ju, onyuñ ọdọhọ enye ete, "Sese idem ọsọñ fi idahaemi. Sana mme idiọkñkpọ fo yak, ke midighe ntre, se idiọkde ikan emi ekeme ndisim fi."

15 Owo emi ama ọnyọñ ndien eketiñ ọnọ mme Ju nte ke ekedi Jisọs ọkọkọk.

16 Ke ntak emi, mmọ ema etọñọ ndikọbọ Jisọs koro Enye ọkọkọkde owo oro udọñọ ke usen Ederi mme Ju. 17 Edi Jisọs ama ọbọrọ mmọ ete, "Ete Mi ananam utom Esie kpukpru ini, ndien Ami ñko ana nte nnam utom Mi."

18 Ikọ Esie emi ama anam ukara mme Ju etetim ebiere ndiwot Enye. Idighe koro Enye abiatde Sabat ikpọñ, edi ye emi Enye ọdọhọde ete, ke Abasi edi Ete Imọ, ke ntre, Enye anam idem Esie ukem ukem ye Abasi.

19 Jisọs ama ọbọrọ mmọ ete, "Ami ntiñ akpanikọ nnọ mbufo: Eyen inamke baba ñkpọ ndomokiet ke idem Esie, Enye anam kpasuk se Enye okokutde se Ete anamde. Se Ete anamde, oro ke Eyen anam ñko. 20 Koro Ete ama ama Eyen Esie, onyuñ owut Enye kpukpru ñkpọ emi Enye anamde. Ndien eyesuk akpa mbufo idem koro Enye eyewut Enye ediwak ñkpọ emi okponde akan mmọ emi ndinam. 21 Kpa nte Ete emenerede mme akpaña ñkpa onyuñ ọnọ uwem, ke ukem usuñ oro ke Eyen onyuñ ọnọ mmọ emi Enye oyomde uwem. 22 Ke ndidian do, Ete ke idem Esie ikpehe ikpe baba owo ndomokiet. Enye ama ayak ọyọhọ odudu ọnọ Eyen Esie ndikpe ikpe, 23 man otodo kpukpru owo ekpono Eyen ukem ukem kpa nte ekponode Ete. Owo kiet ekededi emi mikponoke Eyen, ikponoke Ete emi ọkọdọñde Enye."

24 Ami ntiñ akpanikọ nnọ mbufo nte, owo eke akpañde utọñ ọnọ etop Mi, onyuñ onimde Abasi emi ọkọdọñde Mi ke akpanikọ, enyene nsinsi uwem, ndien enye ididaha ke ikpe ke ntak idiọkñkpọ esie, koro enye ama ebe ọkpọñ ñkpa oduk ke uwem. 25 Ami ntiñ akpanikọ nnọ mbufo, nte ke ini ke ededi, ini oro onyuñ ededi ama, emi mme akpaña ñkpa edikopde uyo Eyen Abasi, ndien mmọ emi ekopde eyetọñọ ntak edu uwem. 26 Kpa nte Ete enyenede uwem ke idem Esie, ntre ñko ke Enye ọnọ Eyen unen ndinyene uwem ke idem Esie. 27 Ndien Enye omonyuñ ọnọ Enye odudu ndidi ekpe ikpe kpukpru idiọkñkpọ ofuri ubon owo, koro Enye edide Eyen Owo. 28 Ekuyak emi akpa mbufo idem, koro ini ke ededi emi kpukpru mme mmọ emi edude ke mme udi mmọ eyekop uyo Esie, 29 ndien ewọñọ ke udi: mme mmọ emi ekenamde eti eyedaha eda eduk ke uwem, ndien mme mmọ emi ekenamde idiọk, eyedaha eda eduk ke utib ikpe.

30 Ke idem Mi, Ami ñkemeke ndinam baba ñkpọ ndomokiet; Ami ñkpe ikpe ntiene nte Ami ñkopde ndien ubiere ikpe Mi edi unen koro Ami mmeñnyeneke ndinem idem Mi esit, edi ndinem Enye emi ọkọdọñde Mi esit.

31 "Edieke Ami ntiede ntiense mbaña idem Mi, inaha nte eda mme ikọ emi nte akpanikọ. 32 Edi owo efen odu emi etiede ntiense abaña Mi, ndien Ami mmọfiọk nte ke mme ikọ ntiense esie emi enye etiñde abaña Mi edi akpanikọ." 33 Mbufo ema edọñ mme isuñutom mbufo eka ebine Jọn Babtis ndien enye ama etie ntiense abaña akpanikọ emi. 34 Idighe nte ana Ami ñnyene ntiense emi edide owo; Ami ntiñ emi man otodo mbufo enyene edinyaña. 35 Jọn ekebiet utueneikañ emi asakde onyuñ ayamade emi mbufo ekemade uñwana esie ke esisit ini. 36 Edi ami mmenyene ntiense emi okponde akan eke Jọn: mme utom emi Ami nnamde, mme utom emi Ete Mi ọkọdọñde Mi ete nnam, kpukpru emi etie ntiense ebaña Mi, enyuñ esio ewut nte ke Ete ọkọdọñ Mi. 37 Ndien Ete emi ọkọdọñde Mi ke idem Esie etie ntiense abaña Mi. Edi akananam mbufo ikopke uyo Esie inyuñ ikwe iso Esie; 38 ndien mbufo idipke mme etop Esie ke esit mbufo, koro mbufo minimke Enyemi Enye ọkọdọñde ke akpanikọ. 39 Mbufo esuk esin ifik eduñọde ñwed Abasi koro mbufo ekerede ete ke mmimọ iyenyene nsinsi uwem ito ke edinam ntre. Mme ikọ Abasi oro etiñ ikọ ebaña Mi. 40 Kpa ye oro, mbufo inyimeke ndidi ntiene Mi, man mbufo enyene uwem.

41 "Ami ñyomke itoro nto owo ndomokiet. 42 Edi Ami mmọdiọñọ mme uduot owo emi mbufo edide, mmonyuñ ndiọñọ nte ke mbufo inyeneke ima ke esit mbufo ibaña Abasi. 43 Ami mmedi ke otu mbufo ke odudu enyiñ Ete Mi, ndien mbufo edidide ke odudu idem esie, mbufo eyedara enye. 44 Mbufo emema ndibọ itoro nto kiet eken, edi mbufo idomoke ndibọ itoro nto Abasi kierakiet; didie ndien ke mbufo ekeme ndinim ke akpanikọ?

45 Edi ekukere ete ke Ami ñyetiñ ikọ ndian mbufo ke iso Ete. Moses edi enyemi editiñde ikọ idian mbufo, kpa Moses emi mbufo enyenede idorenyin ke enye. 46 Edieke mbufo ekpenimde Moses ke ata akpanikọ, mbufo ekpenyuñ enim Mi ke akpanikọ, koro enye ekewetde abaña Mi. 47 Edi sia mbufo mikenimke se enye ekewetde, ekeme didie ndinim ke akpanikọ se Ami ntiñde?"