1 इतिहास 10

राज़ै शाऊले मौत

1 पलिश्ती किअ इज़राईली संघै गिलबा नाओंए धारा मकाबलअ। तिधी पाऐ पलिश्ती कई इज़राईली मारी। बाकी ज़ुंण बच़ै, तिंयां ठुर्है तिधा का राज़ै शाऊल अर तेऊए शोहरू संघी दूर। 2 पर पलिश्ती निं शाऊल अर तेऊए शोहरूओ पिछ़अ छ़ाडअ, पलिश्ती पाऐ शाऊले चअन शोहरू जोनातान, अबीनादाब अर मोलकीशूआ मारी। 3 राज़ै शाऊला फेर लागअ घणअ जुध अर तेऊ लै खुभै दुशमणे कतीर, तेता करै हुअ सह खास्सअ ज़खमी। 4 तेखअ बोलअ शाऊलै आपणैं अस्त्र-शास्त्रा ढोणै आल़ै लै, "तूह खिंच़ आपणीं तलबार संघा मार मुंह आप्पै! इहअ निं हआ कि ईंयां पलिश्ती ज़सरअ खतैर निं हंदअ हुअ द, तलबार मेरी देही आर-पार करी मुंह मारे! तेखअ हणअ हुंह सुहांगा लै!" पर सह ज़ुआन मणछ डरअ खास्सअ संघा किअ तेऊ मारना लै नांह। तेखअ काढी शाऊलै आपणीं तलबार संघा किई धरनीं खल़ी अर तेखअ दैनअ ज़ोरै तेते च़ुंज़ी प्रैंदा लै जुंघू। 5 ज़ांऊं तेऊ अस्त्र-शस्त्रा ढोणै आल़ै ज़ुआन मणछै भाल़अ कि शाऊल गअ मरी, तेऊ बी दैनअ शाऊला ई ज़िहअ आपणीं तलबार खल़ी करी तेथ प्रैंदै जुंघू संघा मूंअ तिधी राज़ै शाऊला संघै। 6 इहअ करै मूंऐं शाऊल, तेऊए चअन शोहरू अर तेऊए लुआद पठी ज़ुंण आजू तेऊ बाद राज़ सका तै करी। 7 ज़ुंण इज़राईली जज्रेल खागै जरदण नदीए दुजै बाढै थिऐ, ज़ांऊं तिन्‍नां का इहअ थोघ लागअ कि इज़राईली सैना ठुर्ही जुधा का, शाऊल अर तेऊए शोहरू बी पाऐ पलिश्ती मारी, तिंयां ठुर्है तेखअ आपणीं-आपणीं नगरी छ़ाडी। तेखअ आऐ पिछ़ू पलिश्ती संघा गिम्मी तिंयां नगरी आप्पू लै।

8 दुजै धैल़ै ज़ांऊं पलिश्ती मारै दै इज़राईलीए माला लुटदै आऐ, तिन्‍नां भेटी शाऊल अर तेऊए चिई शोहरूए ल्हासा गिलबा धारा पल़ी दी। 9 तिन्‍नैं काटअ शाऊलो मूंड, तेऊए अस्त्र-शस्त्र बी लुटै, संघा छ़ाडै तिन्‍नैं सारै पलिश्ती देशै दूत कि ऐहा खुशीए खबरा खोज़ा सोभी देअए देहुरै अर सोभी आम लोगा का। 10 तेखअ डाहै तिन्‍नैं शाऊले अस्त्र-शस्त्र आपणैं देहुरै अर तेऊओ मूंड डाहअ आपणैं दगोन देअए देहुरै छ़ड़ाऊई। 11 ज़ांऊं गलाद मुल्खे जबेश नगरीए लोगा का इहअ थोघ लागअ कि पलिश्ती किअ शाऊला संघै इहअ-इहअ, 12 तिन्‍नें शूरबीर डेऊऐ राचो-राच, संघा आणी शाऊल अर तेऊए शोहरूए ल्हासा जबेश नगरी लै। तिधी डाहै तिन्‍नैं शाऊल अर तेऊए शोहरूए ल्हासा दहई करै तिन्‍नें हाडकै एकी महरूए बूटा हेठै दाबी, संघा मनाऊंअ तिन्‍नैं साता धैल़ै तैणीं कहतू रही शोग।

13 शाऊल मूंअ किल्हैकि तेऊ किअ बिधाता लै विश्वास घात। तेऊ निं ज़िहअ बिधाता बोलअ तिहअ हुकम मनअ अर सह रहअ बिधाता छ़ाडी डांऊं-च़ेल्‍लै अर मणशाण झ़ैऊंणै आल़ै पुछ़दअ लागी। 14 तैही दैनअ बिधाता तेऊ मरनै अर तेऊए ज़ैगा बणाअं ईशैईओ शोहरू दाबेद इज़राईल मुल्खो राज़अ।