1 च़ैत्रै ज़ेभै राज़ै जुधा लै निखल़ा तै, राज़ै दाबेदो सैनापति जोआब निखल़अ आपणीं सैना संघी अमोनी संघै जुधा लै अर राज़अ दाबेद त एरुशलेम नगरी। जोआब अर तेऊए सैना गोटी अमोनीए राज़धानी रबाह नगरी संघा किई पठी बरैबाद। 2 अमोनी देअए मोलके मुहुर्तीए मुंडै थिअ सुन्‍नेंओ मुगट। सह थिअ तोली करै कोई पैंईंती किलू अर तेथ ती किम्मती मणीं लागी दी। राज़ै दाबेदै लाई तेता का तिंयां मणीं आपणैं मुगटा दी संघा लुटी तिन्‍नैं सह नगरी पठी। 3 तिधी बस्सै दै लोग डाहै तिन्‍नैं आरै, कदाल़ी अर खराल़ै करै नगरी दी कामां लाई। अमोनी लोगे होरी नगरी संघै बी किअ दाबेदै इहअ ई। तेखअ आऐ तिंयां एरुशलेम नगरी लै बापस फिरी।

4 थोल़ै धैल़ै बाद हुअ भिई गज़ेर ज़ैगा पलिश्ती संघै जुध। तेऊ जुधा लै पाअ हुशाई नगरीए सिबकै पलिश्तीओ रपाईए लुआदा मांझ़ै एक सिपाई नाओं जोधअ मारी अर पलिश्ती हारै एऊ जुधा लै बी बाख।

5 पलिश्ती संघै एकी होरी जुधा दी पाअ बेतलेम नगरीए याईरे शोहरू एलहानै गात नगरीए गोलियाथो भाई लाहमी जोधअ मारी, तेऊए बर्छ़े डैंढी ती राछ़े लाठै ज़ेही मोट्टी।

6 तेखअ हुअ पलिश्ती संघै गात नगरी एक होर जुध, तेथ त एक दैंत्तर जोधअ, तेऊए ती हाथै-खूरै छ़ह-छ़ह गुंठी पठी गणी करै च़ौबी। सह थिअ रपाईए खिंबा का। 7 तेऊ पाई इज़राईली संघै मकाबलै लै हाक, अर सह पाअ दाबेदे भाई शिमे शोहरू जोनातानै मारी।

8 ईंयां चअन पलिश्ती ज़ुंण दाबेद अर तेऊए आदमी मारै, ईंयां तै गात नगरी रपाईए आद-लुआद।