दाबेद ज़ितअ अमोनी अर अरामी का
(2 शमूएल 10:1-9)
1 तेखअ हुअ इहअ कि बादा का मूंअ अमोनी लोगो राज़अ नहाश अर आजू बणअ तेऊओ शोहरू हनून तेऊए ज़ैगा राज़अ। 2 दाबेदै सोठअ इहअ कि ज़िहअ मुल्है नहाश झ़ूरा त, तिहअ ई रहणअ आजू मुंह संघै तेऊओ शोहरू हनून बी। दाबेदै छ़ाडै आपणैं कार-करिंदै हनूना सेटा लै अमोनी देशै चिंजदै कि दाबेदा हुअ राज़ै नहाशा मरनैओ खास्सअ दुख।
पर ज़ांऊं तिंयां राज़ै हनूना सेटा मिलदै अमोन नगरी पुजै, 3 तेऊए कार-करिंदै लागै राज़ै हनूना लै इहअ बोल्दै, "तूह कै सोठा, आपणैं कार-करिंदै चिंजदै छ़ाडी कै दाबेदै तेरै बाबो अदर किअ? ज़ाथी निं किछ़! तेऊ आसा ईंयां म्हारी नगरीए भेख लंदै छ़ाडै दै! ताकि बादा का सह एथ कबज़अ करी सके!"
4 हनूनै किऐ दाबेदे कार-करिंदै कैद संघा डाही तिन्नें एकी बाखा दाल़्ही-मुछ़ा काटी अर पिछ़ू बाखा गूल़ी का बझ़ैल़ै तिन्नें च़ोल़ै दी काटी छिझै पाणै ताकि तिंयां पिछ़ू का नांगै शुझिए! तेखअ दैनअ तिन्नां डेऊणैं! 5 तिन्नें निस्सअ शरमैं आपणैं देशा घअरा बाखा हांढुई बी। ज़ांऊं ऐहा गल्लो थोघ राज़ै दाबेदा का लागअ कि इहअ हुअ, तेऊ छ़ाडै जेरिहो नगरी तैणीं तिन्नां लै इहअ समाद पजैल़ै, "ज़ेभै तैणीं थारी दाल़्ही निं बझ़े, तेभै तैणीं रहै तम्हैं इधी जेरिहो नगरी अर तेता बाद लागै तम्हैं एछदै।"
6 तेखअ गअ राज़ै हनून अर अमोनी का ज़ाण्हुंई कि ऐबै पाई तिन्नैं दाबेदा संघै ज़ीद, तिन्नैं दैनी चऊती हज़ार किलू च़ंदी उझलै मेसोपोटामिया अर सिरीया देशे माकाहा अर सोबा नगरी लै। 7 तेते बदल़ै शदाऊऐ तिन्नैं बत्ती हज़ार रथ अर माकाहा नगरीए राज़े सैना आई जुधा लै तिन्नें साथ दैंदी अर तिन्नैं पाऐ मेदबा नेल़ डेरै। अमोनी बी निखल़ै तिन्नें सोभी नगरी का संघा हुऐ जुधा लै मकाबलै करदै तैर।
8 दाबेदा का गअ इना गल्लो थोघ लागी अर तेऊ छ़ाडअ तिन्नें मकाबलै लै आपणअ सैनापति जोआब सारी सैना संघी। 9 अमोनी निखल़ै जुधा लै बागै संघा बान्हीं आपणीं राज़धानी रबाह नगरीए प्रऊल़ी आजू जुधा लै लगैग अर ज़ुंण राज़ै तिन्नें साथ दैंदै आऐ तै, तिन्नैं लाई खुल्ही सऊंई ज़ैगा आपणीं-आपणीं लगैगा।
10 ज़ांऊं जोआबै भाल़अ कि तिन्नां आजू-पिछ़ू आसा दुही बाखा दुशमणे सैने लगैग अर तिंयां सका कज़ेथी बाखा मारदै एछी, जोआबै छ़ांटै इज़राईली मांझ़ै खास-खास जोधै संघा लाई तिन्नें लगैग अरामी बाखा स्मोहरी। 11 बाकी सैनो दलपति बणाअं तेऊ आपणअ भाई अबीशै अर तिन्नें लगैग लाई तेऊ अमोनी बाखा स्मोहरी। 12 जोआबै बोलअ अबीशै लै, "ज़ै अरामी का हुंह हारदअ शुझिए, तै लोल़ी तूह मेरी मज़त करदअ आअ, अर ज़ै मुखा अमोनी का तूह हारदअ शुझिए, तै आअ हुंह तेरी मज़त करदअ। 13 तूह डाहै हैअ, हिम्मत निं हारी! हाम्हां करनअ आपणैं लोगा अर आपणैं परमेशरे नगरी लै पूरअ ज़ोर लाई जुध। आजू आसा बिधाते मरज़ी, तेऊ ज़िहअ करनअ होए, हणअ सह तिहअ।"
14 जोआब अर तेऊए सैना पल़ी पैहलै ई अरामी संघै मकाबलै करना लै चुटी अर अरामी ठुर्है तिन्नां सेटा का दूर! 15 अमोनी भाल़अ कि अरामी गऐ जुधा का ठुर्ही, तिंयां बी ठुर्है अबीशै सम्हनै का पिछ़ू संघा पेठै नगरी भितरी। तेखअ आअ जोआब आपणीं सैना संघी बापस एरुशलेम नगरी लै फिरी।
16 ज़ांऊं अरामी का ज़ाण्हुंअ कि तिंयां हारै इज़राईली का, तिन्नैं झाल़ी भिई आपणीं सारी सैना। तिन्नैं शादै तिन्नां सैनो दल ज़ुंण फरात दरैऊआ पुर्बा बाखा थिऐ, तिन्नैं बणाअं आपणअ सैनापति शोपाक ज़ुंण राज़ै हदादेज़ेरो सैनापति थिअ। 17 ज़ांऊं दाबेदा का इना सोभी गल्लो थोघ लागअ, तेऊ झाल़ी आपणीं इज़राईली सैना संघा डेऊअ जरदण पार संघा किई आपणीं सैना अरामीए मकाबलै करना लै स्मोहरी खल़ी। ज़ांऊं जुध लागअ, 18 इज़राईली खद्रेल़ै अरामी पिछ़ू। तधू पाऐ दाबेद अर तेऊए सैना अरामीए सात शौ रथ, च़ाल़्ही हज़ार शुंआर मारी अर तिन्नों सैनापति शोपाक बी पाअ तिन्नैं मारी। 19 ज़ेतरै राज़ै हदादेज़ेरे गलामी करा तै, ज़ांऊं तिन्नैं भाल़अ कि तिंयां हारै इज़राईली का, तिन्नैं किई तेखअ इज़राईली संघै मेल़-ज़ोल़े करार संघा लागै दाबेदे गलामी करदै। तेखअ डरै अरामी खास्सै संघा निं तिंयां अमोनीए मज़त करदै भिई आऐ।