1 इतिहास 13

बिधाते करारो मणशू आणअ एरुशलेम नगरी लै

1 राज़ै दाबेदै शादै सैनापति अर खास-खास शूरबीर ज़ुंण शौ-शौ अर हज़ार-हज़ारे दला प्रैंदै दलपति थिऐ। 2 तेखअ बोलअ तैहा सभा दी दाबेदै इहअ, "ज़ै थारी ज़ाज़त आसा, ज़ै म्हारअ परमेशर बिधाता बी इहअ ई च़ाहा होए, तै खोज़ा एऊ समादा प्रोहत, लेबी गोत्रा आल़ै ज़ुंण तिन्‍नें नगरी अर घैहणीं आसा बस्सै दै अर सारै देशै सोभी इज़राईली का। तिन्‍नां लै बोला इहअ कि सोभ लोल़ी आऐ अर इधी करनअ हाम्हां बडअ झाल़अ। 3 तेखअ डेऊणअ हाम्हां बिधाते करारो मणशू आणदै, ज़ुंण राज़ै शाऊले राज़ा दी नकदरअ आसा किअ द।" 4 सभा दी बेठै दै सोभ लोग हुऐ ऐहा गल्‍ला लै राज्ज़ी कि इहअ ई करनअ आसा ठीक।

5 दाबेदै किऐ मिसर देशे दखणा बाखा शिहोर गाडा ओर्ही उतरा बाखा हमात नगरी तैणीं सोभ इज़राईली कठा कि तिंयां किर्यात-ज़रीम नगरी का बिधाते करारो मणशू आणे। 6 तेखअ डेऊऐ दाबेद अर तेऊ संघै आऐ दै सोभ इज़राईली यहूदा मुल्खै बाला नगरी ज़ेता लै किर्यात-ज़रीम बी बोला, बिधाते करारे मणशू बापस आणदै ज़सरअ आसन फैंखा आल़ै स्वर्ग दूता प्रैंदै आसा। 7 तिन्‍नैं बशैल़अ बिधाते करारो मणशू कोरी बैल गाड्डी दी संघा आणअ अबीनादाबे घअरा का आप्पू संघै। उज्ज़ा अर आहीऊ लागै बैल गाड्डी आजू नढैऊंदै। 8 दाबेद अर तिधी आऐ दै होर सोभ इज़राईली लागै बिधातो अदर करना लै गिहा बोल्दै अर नाच़दै। तिंयां थिऐ कैलीए काठा करै बणाऐं दै बींन, बशूरी, ढोल नगारै, गुझू अर डफाला बाज़ी नाच़दै लागै दै।

9 ज़ांऊं तिंयां कदोन नाओंए मणछे खहल़ै पुजै, तिधी लागी बल्दा ठोहल़ अर उज्ज़ा दैनी बिधाते करारे मणशू आपणैं हाथा करै थम्हणीं कि ढूल़अ निं लोल़ी। 10 तेऊ लै पल़अ तेभी बिधातो कोप अर सह मूंअ तिधी हेरा-हेरी करारे मणशू सेटा किल्हैकि तेऊ लाअ त आपणअ हाथ करारे मणशू दी। इहअ करै मूंअ उज्ज़ा तिधी बिधाता सम्हनै धरनीं। 11 दाबेद हुअ खास्सअ नराज़ किल्हैकि बिधातो कोप पल़अ उज्ज़ा लै, तिधा का बोला तैहा ज़ैगा लै आझ़ तैणीं बी फिरिस-उज्ज़ा।

12 तधू डरअ दाबेद बिधाता का खास्सअ संघा लागअ इहअ बोल्दअ, "ऐबै मुंह बिधाते करारो मणशू आप्पू संघै किहअ करै निंणअ?" 13 तेखअ निं दाबेदै बिधाते करारो मणशू दाबेदपूर नगरी लै निंयं आथी अर सह फिरअ तिधा का गात नगरीए ओबेद-एदोमे घअरा बाखा लै संघा पजैल़अ करारो मणशू तिधी। 14 तिधी रहअ बिधाते करारो मणशू चिई भिन्‍नैं तैणीं अर बिधाता दैनी ओबेद-एदोम अर तेऊए टबरा लै खास्सी बर्गत।