1 लेबी गोत्रा मांझ़ै तै तिन्‍नें टोलीए साबै पहरीए ज़ुदै-ज़ुदै दल। कोराह टोली का थिअ असापे आद-लुआदा मांझ़ै कोरो शोहरू मशलेमयाह। 2 मशलेमयाहे तै सात शोहरू तिंयां थिऐ तिन्‍नें अमरे साबै ज़ेठै का कान्हैं तैणीं ईंयां: जकर्या, जदीएल, जबदीया, जतनीएल, 3 एलाम, जहोहनान अर एलीहोना।

4 ओबेद-एदोमा लै दैनी बिधाता खास्सी बर्गत अर तेऊए हुऐ आठ शोहरू तिंयां थिऐ तिन्‍नें अमरे साबै ज़ेठै का कान्हैं तैणीं ईंयां: शमयाह, जोजबाद, जोआह, साकार, नतनेल, 5 अमीएल, इस्साकार अर पलती।

6,7 ओबेद-एदोमे ज़ेठै शोहरू शमयाहे थिऐ छ़ह शोहरू: ओतनी, रपाएल, ओबेद, एलजाबाद एलीहू अर समाकयाह। इना सोभिओ त तिन्‍नें टोली दी खास्सअ अदर किल्हैकि ईंयां मशूर शूरबीर अर खिरीए दूई ज़ण्हैं तै होर बी खास्सै छ़ल़ैघ।

8 ओबेद-एदोमे आद-लुआदा मांझ़ै तै बाहठ ज़ण्हैं पहरै लै बलबान मणछ।

9 मशलेमयाहे आद-लुआदा मांझ़ै तै ठारा बलबान मणछ।

10,11 मरारी टोली का थिअ होसाह अर तेऊए तै च़ार शोहरू: शिम्री, हिलकिया, तबलयाह अर जकर्या। शिम्री निं होसाहो ज़ेठअ शोहरू आथी त पर सह थिअ तेऊ आपणैं टबरो सैणअ बणाअं द। होशे टबरा मांझ़ै छ़ांटै पठी तेर्हा ज़ण्हैं बिधाते भबने पहरी।

12 भबने पहरी बी थिऐ तिन्‍नें टोलीए सैणें साबै ज़ुदै-ज़ुदै दला दी बांडै दै अर तिन्‍नां लै बी दैनअ होरी लेबी ज़िहअ बिधाते भबने पहरै करनैओ काम बांडी। 13 सोभी लै दैनअ बिधाता सेटा परच़ी पाई काम बांडी। तेथ निं तिन्‍नैं होछ़अ-बडअ भाल़अ। 14 पुर्बा बाखा प्रऊल़ीए पहरै करने परच़ी निखल़ी शेलेमयाहे नाओंऐं। तेऊओ शोहरू जकर्या त बडअ समझ़कार बज़ीर अर तेखअ निखल़ी तेऊए नाओंऐं परच़ी उतरा बाखा प्रऊल़ीए पहरै करना लै। 15 दखणा बाखा प्रऊल़ीए पहरै करने परच़ी निखल़ी ओबेद-एदोमे नाओंऐं अर तेऊए शोहरू छ़ांटै भढारा पहरी। 16 तेखअ निखल़ी शुप्पी अर होसाहे नाओंऐं परच़ी, तिन्‍नां लै सभाल़ी पछ़मा बाखे प्रऊल़ अर प्रैंधल़ी बाता शलकेत नाओंए प्रऊल़ी दी पहरै करने ज़िम्मैंबारी। पहरी लागा त एकी बाद दुजै बारी-बारी आपणैं-आपणैं बगता दी पहरअ करनअ। 17 हर धैल़ै हआ तै लेबी मांझ़ा का बिधाते भबनै पुर्बा बाखा छ़ह पहरी, उतरा बाखा च़ार, दखणा बाखा च़ार पहरी। दूई भढारै हआ तै दूई-दूई पहरी डाहै दै। 18 पछ़मा बाखा हआ तै च़ार पहरी डाहै दै। दूई धरनीं प्रऊल़ी आजू बाता अर दूई हआ तै प्रैंदै च़बारू दी। 19 एही थिई कोराह अर मरारी टोली लै पहरै करने ज़िम्मैंबारी सभाल़ी दी।

20 कोराह अर मरारी टोली मांझ़ै ज़ुंण होर लेबी थिऐ, तिन्‍नां मांझ़ै बणाअं आहिजा बिधाते भबनै भैंट किई दी च़िज़ा अर दुही भढारो दरोगअ।

21 लादान थिअ गर्शोनी टोली का, सह थिअ जेहीएलो बाब। तैहा टोली दी थिऐ तेऊए आद-लुआदा मांझ़ै आपणैं-आपणैं खिंबे कई सैणैं। 22 जेहीएलै तै दूई शोहरू: जताम अर जोएल। तिंयां थिऐ भढारे दरोगै बणाऐं दै।

23 होर थिऐ बिधाते भबने भढारै च़ाकरी करनै आल़ै कहात, अमराम, इसहार, हेब्रोन अर उज्जीएले टोली मांझ़ै।

24 शबूएल थिअ मोसे शोहरू गर्शोमे टोली का। सह थिअ बिधाते भढारो सैणअ। 25 गर्शोमे भाई एलीआजरे आद-लुआद थिऐ बाबा का आजू शोहरू इहै: रहाबयाह, ईशायाह, जोराम, ज़िक्री अर शेलोमीत। 26 शेलोमीत अर तेऊए भाई-बंध थिऐ राज़ै दाबेदै, सैनापति, दलपति, खिंबे खास-खास मणछ अर टोलीए सैणैं बिधाता लै भैंट किई दी सोभी च़िज़े भढारी डाहै दै। 27 ज़ेभै बी जुधा का किज़ै किम्मती च़िज़ा ज़िती आणा तै, तेता मांझ़ै डाहा तै ईंयां बिधाते भबने मराम्मती करना लै धख-धख ज़ुदअ। 28 ज़ुंण च़िज़ा शमूएल गूरै, कीशे शोहरू राज़ै शाऊलै, नेरीए शोहरू अबनेरै अर सरूयाहे शोहरू जोआबै ज़ुंण च़िज़ा बिधाते भबने कामां लै ज़ुदी पबित्र थिई डाही दी, तिन्‍नां च़िज़े भढारी बी थिऐ शेलोमीत अर तेऊए भाई-बंध।

29 इसहारी टोली का थिऐ कननया अर तेऊए शोहरू, तिंयां थिऐ राज़े दरोगै अर पांच़। तिन्‍नां लै हआ त इज़राईली परज़ा मांझ़ै झ़गल़े फैंसलै करनै अर तिन्‍नां सोभी गल्‍ला लिखी डाहणेंओ काम।

30 हेब्रोन टोली का थिअ हशाबिया, तेऊए भाई-बंधा मांझ़ै थिऐ एक हज़ार सात शौ। तिंयां थिऐ सोभ ज़ाण-प्रबीण अर राज़े पांच़। तिन्‍नां लै थिई जरदण नदी पछ़मा बाखा परज़े फैंसलै अर इज़राईले परमेशर बिधाते होर काम काज़ करने ज़िम्मैंबारी सभाल़ी दी। 31 हेब्रोन टोली दी आसा जरीयाह सैणअ। राज़ै दाबेदे राज़ा दी च़ाल़्हुई साला पल़ी हेब्रोने आद-लुआदे पुछ़ अर गलाद मुल्खै ज़जार भेटै तिन्‍नें खास्सै शूरबीर। 32 जरीयाहे भाई-बंधा मांझ़ै निखल़ै तै दूई हज़ार सात शौ शूरबीर। राज़ै दाबेदै छ़ाडै तिंयां जरदण नदी पुर्बा बाखा संघा सभाल़ी तिन्‍नां का तिधी बस्सै दै बिधाते सोभी कामां लै रूबेन, गाद अर आधै मनिश्शे गोत्रे ज़िम्मैंबारी।