1 राज़ै दाबेदै बणाऐं आप्पू लै एरुशलेम नगरी कई मैहल अर भबन। तेऊ डाही तिधी छ़ांटी करै बिधाते करारे मणशू लै बी ज़ैगा संघा किअ तिधी खास खिम्भ खल़अ। 2 तेखअ बोलअ राज़ै दाबेदै इहअ, "लेबी का सुआई निं होर कोहै बिधाते करारो मणशू च़की, किल्हैकि बिधाता आसा तिंयां ई छ़ांटै दै कि तिंयां एऊ कामां करे अर सदा तेऊए च़ाकरी करे। 3 तेखअ किअ राज़ै दाबेदै एरुशलेम नगरी इज़राईलीओ बडअ झाल़अ कि बिधातो करारो मणशू आणनअ तैहा ज़ैगा लै ज़ुंण तेऊ छ़ांटी करै ज़ुदी आसा डाही दी बणाईं।" 4 तेखअ शादै राज़ै दाबेदै हारणे आद-लुआद अर होर लेबी। 5 लेबी गोत्रे टोली मांझ़ै ज़ुंण तिधी आऐ, तिंयां थिऐ कहाती टोली का एक शौ बिह ज़ण्हैं अर तिन्‍नां प्रैंदै सैणअ थिअ ऊरीएल। 6 मरारी टोली का आऐ दूई शौ बिह ज़ण्हैं अर तिन्‍नां प्रैंदै सैणअ थिअ असाया। 7 गर्शोनी टोली का आऐ एक शौ तिह ज़ण्हैं अर तिन्‍नां प्रैंदै सैणअ थिअ जोएल। 8 एलीसापान टोली मांझ़ै आऐ दूई शौ अर तिन्‍नों सैणअ थिअ शमयाह। 9 हेब्रोनी टोली का आऐ अश्शी ज़ण्हैं अर तिन्‍नों सैणअ थिअ एलीएल। 10 उज्जीएले टोली मांझ़ा का आऐ एक शौ बारा ज़ण्हैं अर तिन्‍नों सैणअ थिअ अमीनादाब।

11 राज़ै दाबेदै शादै सदोक प्रोहत, अबतार अर लेबी मांझ़ै छ़ह सैणैं ऊरीएल, असाया, जोएल, शमयाह, एलीएल अर अमीनादाब। 12 तेखअ बोलअ तिन्‍नां लै इहअ, "तम्हैं आसा लेबी गोत्रा मांझ़ै आपणीं-आपणीं टोलीए सैणैं। तम्हैं करा आप्पू अर आपणैं भाई-बंधा शुचै, संघा आणा इज़राईले परमेशर बिधातो करारो मणशू तैहा ज़ैगा लै ज़ुंण मंऐं तेता लै आसा डाही दी बणाईं। 13 किल्हैकि पिछ़ली बारी निं तम्हैं तेता च़कदै आथी तै अर म्हारै परमेशर बिधाता दैनी हाम्हां लै तेते सज़ा कि हाम्हैं निं सह काम तैहा बिधीए साबै किअ ज़िहअ हुअ लोल़ी त।"

14 तेखअ हुऐ सोभ प्रोहत अर लेबी च़ांगै-च़ोखै कि इज़राईले परमेशर बिधातो करारो मणशू आणी सके। 15 लेबी च़कअ करारो मणशू लोहल़ी लाई करै आपणीं कान्हा प्रैंदै ज़िहअ बिधाता आपणैं गूर मोसा बाती खोज़ी बोली त डाहअ द।

16 राज़ै दाबेदै किअ लेबी मांझ़ै सोभी सैणैं लै हुकम कि गाज़ै-बाज़ै आल़ैओ एक छ़ुंढ छ़ांटा ज़ुंण, दंतारै, बींन, छ़छ़ाल़ा बाज़दी ज़ोरै-ज़ोरै खुशीए गिहा बोल्दै होए। 17 लेबी सैणैं छ़ांटअ मरारी टोली का जोएलो शोहरू हमान तेऊए होरी साथी-संघी। बरेक्याहो शोहरू असाप अर कुशायो शोहरू एतान। 18 तिन्‍नां पिछ़ू गिहा बोल्दै छ़ांटै तिन्‍नें भाई-बंधा मांझ़ै: जकर्या, बेन, जाजीएल, शमीरामोत, जेहीएल, ऊनी, एलीआब, बेनियाह, मासेया, मत्तितियाह, एलीपलेह, मिकनेया अर ओबेद-एदोम अर जेइल ज़ुंण करारे मणशूए फाज़त करनै आल़ै पहरी थिऐ।

19 हमान, असाप अर एतान छ़ांटै कांस्से छ़छ़ाल़ा बाज़दै। 20 जकर्या अजीएल, शमीरामोत, जेहीएल ऊनी, एलीआब, मासेया अर बेनियाह छ़ांटै कि तिंयां अलमोत नाओंए रागा दी दंतारअ बाज़े। 21 मत्तितियाह, एलीपलेह, मिकनेया अर ओबेद-एदोम, जेइल अर अजाया छ़ांटै बींना बाज़दै।

22 कननया त लेबी मांझ़ै सैणअ, राग-बाज़ा दी सज़ाण कलाकार। सह छ़ांटअ तिन्‍नें सोभी घैरी अर साज़-बाज़ बाज़णैं आल़ै प्रैंदै प्रधान।

23,24 तेखअ छ़ांटै लेबी ओबेद-एदोम अर जेइला संघै बिधाते करारे मणशूए फाज़त करनै आल़ै दूई होर पहरी बरेक्याह अर एलकाना।

शेबानयाह, जोशापात, नतनेल, अमासा, जकर्या, बेनियाह, एलीआजर, ईंयां सोभै तै प्रोहत। ईंयां लागै करारे मणशू आजू-आजू नर्शिंगै बाज़दी-बाज़दी हांढदै। ओबेद-एदोम अर जेहीया थिऐ करारे मणशूए पहरी।

25 तेखअ डेऊऐ राज़अ दाबेद, इज़राईली सैणैं अर सैने सैनापति अर दलपति ओबेद-एदोमे घअरा लै बिधाते करारे मणशू आणदै अर तिन्‍नें मनाऊंईं तैहा खुशी बडी जाच। 26 तिन्‍नैं किऐ तिधी सात बाछ़ू अर सात गाभू बल़ीदान कि लेबी ज़ुंण बिधाते करारे मणशू च़कदै आसा लागै दै, तिन्‍नां बिधाता राज्ज़ी-राम्बल़ै डाहे। 27 राज़ै दाबेदै त किम्मती बाछो च़ोल़अ बान्हअ द, तिहै ई च़ोल़ै थिऐ गाज़ै-बाज़ै आल़ै अर तिन्‍नां प्रैंदै प्रधान कननया, करारे मणशू च़कणै आल़ै लेबी बान्हैं दै। दाबेदै थिई बाछे सदरी बी बान्हीं दी। 28 इहअ करै आणअ दाबेदै अर होरी सोभी इज़राईली बिधाते करारो मणशू ज़ै-ज़ैकार करदी, नर्शिंगै, छ़छ़ाल़ा, बींन बाज़दी अर खुशी-खुशी गांदी-बज़ांदी एरुशलेम नगरी लै।

29 ज़ांऊं बिधाते करारो मणशू दाबेदपूर नगरी बाखा लै एछदअ त लागअ द, राज़ै शाऊले शोहरी मिकल ती तीरू बाती बागै दाबेदा नाच़दै-खेल्हदै भाल़ी लागी दी, तैहा समझ़अ दाबेदो सह तिहअ करनअ बृथा।