1 राज़ै दाबेदै बोलअ इहअ, "इधी ऐहा खहल़े ज़ैगा ई बणाणअं बिधाता लै भबन। इज़राईली परज़ा लै हूम बल़ीदान करने बेदी बी हणीं इधी।"
बिधाता लै भबन बणाणें तैरी
2 राज़ै दाबेदै किअ हुकम कि ज़ेतरै बी परदेसी इज़राईल देशै आसा बस्सै दै, तिन्नां सोभी शादा एरुशलेम नगरी लै। ज़ांऊं तिंयां आऐ, राज़ै दाबेदै डाहै तिंयां कामां लाई, तिन्नां मांझ़ै डाहै थोल़ै बिधाते भबन बणाणां लै पात्थरा काढदै अर छ़िणीं करै च़कोर बणाऊंदै लाई। 3 तेखअ आणअ राज़ै दाबेदै प्रऊल़ीए पाल्लै दी लागणै आल़ै कील अर कबज़ै बणाणां लै एतरअ खास्सअ लोहअ अर कांस्सअ कि तेता निं तोली ई सकदै तै। 4 सूर अर सदोने लोगा का डाहै खास्सै केल़ुईए काठ आणी। 5 राज़ै दाबेदै सोठअ इहअ, "मेरै शोहरू सुलैमाना ज़ुंण बिधाता लै भबन बणाणअं, सह लोल़ी महान अर सारै संसारै मशूर हुअ, तेते तैरी डाहणीं मुंह आप्पै करी।" तैही डाही तेता लै राज़ै दाबेदै आपणीं ज़िऊंदी ज़िता खास्सी च़िज़ा आप्पै आणी।
6 तेखअ शादअ राज़ै दाबेदै आपणअ शोहरू सुलैमान संघा किअ तेऊ लै हुकम कि तूह बणाऐं इज़राईले परमेशर बिधाता लै भबन। 7 दाबेदै बोलअ सुलैमाना लै इहअ, "हुंह च़ाहा त इहअ कि मुंह बणाणअं आपणैं परमेशर बिधाता लै भबन ज़िधी तेऊओ अदर होए। 8 पर बिधाता बोलअ मुल्है इहअ, ‘तंऐं किऐ खास्सै जुध अर तंऐं मारै खास्सै मणछ। ताल्है लागअ धरती दी लोधल़े छेरा लाणैंओ दोश अर तैही निं ताह तेरी ज़िऊंदी ज़िता मुल्है भबन बणाणेंओ मोक्कअ भेटणअ। 9 पर ज़ेभै आजू तेरअ शोहरू राज़अ बणें, मुंह डाहणीं तेऊए राज़ा दी शांती। तेऊ नाअं हणअ सुलैमान किल्हैकि तेऊए ज़मानै डाहणीं मुंह इज़राईला देशै शांती अर तिन्नां निं दुशमणे डअर-भगैर हणीं। 10 सुलैमाना ई बणाणअं मुल्है भबन अर तेऊए ई आद-लुआदा मांझ़ै एछणअ एक इहअ ज़ुंण इज़राईला प्रैंदै सदा लै राज़अ हणअ। सह हणअ मुल्है मेरै शोहरू ज़िहअ अर तेऊ लै हणअ हुंह बाबा ज़िहअ।’
11 "सुलैमान, मेरै शोहरूआ, हुंह करा ऐबै एही अरज़ कि म्हारअ परमेशर बिधाता लोल़ी ताह संघै रहअ अर तेऊ लोल़ी तूह आपणैं भबन बणाणां लै सफल किअ ज़िहअ तेऊ बोलअ द आसा। 12 बिधाता लोल़ी ती ताल्है एही अक्ल अर समझ़ दैनी कि तूह बिधाते बधाने साबै इज़राईला प्रैंदै राज़ करे। 13 ज़ै तूह बधाने तिन्नां सोभी बिधी मने ज़ुंण बिधाता आपणैं दास मोसा का दैनअ, तै जाणअ तूह सफल हई। तूह डाहै हिम्मत, हैअ निं चोल़ी अर नां किछ़ी गल्ला का डरदअ लागी। 14 मंऐं आसा भाल़ै बिधाते भबना बणाणां लै सोभै गल्ला डाही दी कठा करी। चअन शौ कुंटल़ आसा सुन्नअ, चऊती हज़ार कुंटल़ आसा च़ंदी डाही दी झाल़ी। एता का लाऊआ आसा लोहअ अर कांस्सअ एतरअ कि तेता निं कुंण तोली सकदअ। काठ अर पात्थर बी आसा बतेर्है डाहै दै आणी, तिन्नां आणै तूह होर बी। 15 कारीगीरे काम्मी निं ताह पल़णीं, पात्थरे मिस्त्री बी आसा, काठे कारीगीर बी आसा अर होरी कामां लै बी आसा ज़ाण-प्रबीण मणछ बतेर्है। 16 सुन्नैं, च़ंदी, कांस्सै अर लोहे कामां करनै आल़ै आसा सनार, ठठार अर लुहार खास्सै। ऐबै कर तूह आपणअ काम शुरू अर बिधाता लोल़ी ताह संघै सदा रहअ।"
17 राज़ै दाबेदै किअ सोभी इज़राईली टोलीए सैणैं लै हुकम कि तिंयां सोभै करै सुलैमाने मज़त। 18 दाबेदै बोलअ तिन्नां लै इहअ, "थारअ परमेशर बिधाता आसा तम्हां संघै अर तेऊ आसा तम्हां लै दुशमणा का फेर-फिरदी शांती डाही दी करी। तेऊ किऐ तिंयां सोभ मेरै बशै ज़ुंण एऊ देशै हाम्हां का आजी तै बस्सै दै। ऐबै आसा एऊ देशे मालक बिधाता अर तेऊए परज़ा। 19 ऐबै करा तम्हैं तन-मन्न लाई आपणैं परमेशर बिधाते च़ाकरी। ज़ोर-ज़ाहण लाई बणाआं बिधाता लै भबन, संघा डाहै बिधाते करारो मणशू अर सोभी चाण-भांडै तेथ ज़ुंण तेऊए पूज़ा-गाज़ा लै कामैं एछा।"