Deuteronômio 3

बाशान मुल्खे राज़ै ओगा संघै जुध

1 "तिधा का फिरै हाम्हैं तैहा बाता ज़ुंण बाशान मुल्खा बाखा लै डेओआ, ओग राज़अ आअ आपणीं सारी सैना लई हाम्हां संघै अद्रोई नाओंए ज़ैगा जुधा लै। 2 पर बिधाता हेरअ त तधू मुखा खोज़ी, ‘मोसा, ओग राज़ै का निं डरी आथी। हुंह आसा तम्हां बाखा आप्पै, राज़अ ओग अर तेऊए सैना हारनी तम्हां का अर तम्हैं करै तेऊए ज़ैगा आपणैं कबज़ै दी। तम्हैं करै ओग राज़ै संघै बी तिहअ ई ज़िहअ तम्हैं हेशबोन नगरीए अमोरी राज़ै सिहोना संघै किअ।’

3-6 "बिधाता किई म्हारी राज़ै ओग अर तेऊए सारी सैना का ज़ितणा लै म्हारी मज़त। हाम्हैं किअ बाशान अर अर्गोब मुल्खा संघी सारै दी कबज़अ ज़ेथ राज़अ ओग राज़ करा त। तेऊए मुल्खै थिऐ खास्सै गराअं अर नगरी।

"शाठ नगरी ती तेता मांझ़ै फेर-फिरदै उछ़टै गहल़ा आल़ी नगरी अर तेथ ती बडी-बडी आगल़ी आल़ी बडी-बडी प्रऊल़ी। हाम्हैं किई तिंयां सोभै बरैबाद अर हाम्हैं किअ तिन्‍नां लै तिहअ ई ज़िहअ हेशबोन नगरीए अमोरी राज़ै सिहोना संघै किअ त। हाम्हैं पाऐ तिंयां सोभ लोग मारी 7 पर तिन्‍नें डागै-धअण अर किम्मती ज़ैदात डाही हाम्हैं आप्पू लै।

8 "सिहोन अर ओग करा तै तिन्‍नां मुल्खै राज़ ज़ेथ अमोरी लोग तै बस्सै दै। तिंयां थिऐ जरदण नदी पुर्बा बाखा बस्सै दै अर सह मुल्ख त अर्नोन गाडा दखणा पोर्ही हर्मोन धारा पुर्बा बाखा तैणीं। हाम्हैं किअ तेऊ सारै मुल्खै कबज़अ।

9 "हर्मोन धारा लै बोला तै सदोनी लोग सिर्योन अर अमोरी बोला तै तेता लै सनीर धार। 10 हाम्हैं किअ उझै धारा आल़ी सोभी नगरी, सारै गलाद मुल्खै अर सारै बाशान मुल्खै सल्का अर अद्रोई इना दूई नगरी तैणीं कबज़अ ज़ेथ ओग राज़अ राज़ करा त।

11 "रपाई लोगा मांझ़ै थिअ खिरी बाशान मुल्खो राज़अ ओग ई रहअ द। ज़ेऊ लोहे सदूका भितरी सह घोरी दाबी डाहअ त, सह आसा आझ़ तैणीं बी अमोनी लोगे रबाह नाओंए नगरी। सह सदूक थिअ एक आम मणछे हाथे नापै नौ हाथ लाम्मअ अर च़ार हाथ बिरलअ।

जरदण नदी पुर्बा बाखा ज़ैगे बांड

12-17 "हाम्हैं ज़ेतरी ज़ैगा आप्पू लै गिम्मी हेरी, तेता मांझ़ै दैनी मंऐं थोल़ी नगरी रूबेन अर गाद गोत्रा आल़ै लै। तिन्‍नें हेस्सै आअ अर्नोन गाडे दखणा बाखा बाढे बस्सी दी अरोर नगरी पोर्ही उतर दिशा गलाद तैणीं। गलाद मुल्ख दैनअ दखण दिशा बाखा आधअ तिन्‍नां लै। ज़ुंण ज़ैगा तिन्‍नां लै दैनी, उतर दिशा बाखा हुई तिन्‍नें सिअं ज़बोग गाडा अमोनी लोगे सिऊंआं तैणीं। तेता संघै दैनअ मंऐं तिन्‍नां लै जरदण नदीए पुर्बा बाखो मुल्ख लाल समुंदरे दखणा दी उंधै पिसगा धारे ढल़ान अराबा गलील समुंदरा तैणीं ज़ेता लै खार समुंदर बी बोला।

"ज़ुंण उतर दिशा बाखा गलाद मुल्ख रहअ अर सारअ बाशान मुल्ख दैनअ मंऐं मनिश्शे गोत्रा मांझ़ै आधै लोगा लै। बाशान करा त राज़अ ओग राज़ अर अर्गोब मुल्ख बी एछा त बाशाना दी। बाशाना लै बोला तै रपाई लोगे ज़ैगा। मनिश्शे गोत्रा का याईरै किअ अर्गोब मुल्ख अर पछ़मा बाखा गशूरी अर मकात नगरी तैणीं कबज़अ। इज़राईली डाहअ बाशानो नाअं ‘याईरे नगरी*3:12-17 याईरे नगरी याईरो गराअं’ अर अह नाअं आसा आझ़ तैणीं पल़अ द। गलाद उतर दिशा बाखा सारअ मुल्ख दैनअ मंऐं मनिश्शे गोत्रा मांझ़ै माकीरे टोली लै।

18,19 "तधू बोलअ त मंऐं रूबेन, गाद मनिश्शे गोत्रे लोगा लै, ‘मुल्है बोलअ म्हारै परमेशर बिधाता इहअ कि ऐहा ज़ैगा दैऐ एते नगरी संघी इना लै, तैही किअ मंऐं इहअ। ऐबै सका थारै बेटल़ी-माठै एथ आपणैं डागै-चैणें हेल़्ही संघी रही। पर ज़ेतरै बी तम्हां मांझ़ै जुध बिद्ये ज़ाणकार मर्ध आसा, तिन्‍नें सारी सैना डेऊणीं जरदण नदी पार होरी गोत्रा संघै कनान देशै जुधा लै, किल्हैकि तिंयां आसा थारै ई भाई-बंध।✝3:18-19 ज़ैह. 1:12-15 20 बिधाता हेरनी होरी इज़राईलीए बी तैहा ज़ैगा दुशमणा का ज़ितणा लै मज़त करी ज़ुंण तेऊ जरदण नदी पार पछ़मा बाखा तिन्‍नां लै दैणीं। ज़िहै तम्हैं इधी बस्सै, तिहै ई लोल़ी थारै तिंयां भाई-बंध तिधी बस्सी गऐ। तेता बाद सका तम्हैं आपणीं ऐहा ज़ैगा लै बापस फिरी ज़ुंण मंऐं थारै हेस्सै बांडी दैनी।’

21,22 "तधू बोलअ त मंऐं तेभी ज़ैहसू लै इहअ, ‘तंऐं भाल़अ आपणीं आछी कि बिधाता सिहोन राज़ै अर ओग राज़ै लै हाम्हां करै किहअ-किहअ किअ। तूह निं हैल़अ-फिकर करी! बिधाता रहणअ जरदण नदी पार डेऊई बी तम्हां बाखा अर तेऊ करनी तिन्‍नां मुल्खै थारै दुशमणा खतम करना लै थारी मज़त।’

बिधाता बोलअ मोसा निं जरदण नदी पार कनान पुजणअ

23 ✝ 3:23 गण. 27:12-14; बधा. 32:48-52 "मंऐं किई तधू तेभी बिधाता सेटा लेर-पकार पाई एही अरज़, 24 ‘परमेशर बिधाता मेरै मालक, मुखा शुझिआ इहअ कि ऐबै लागअ तूह आपणैं महान बला रहैऊंदअ, सरग अर धरती दी निं इहअ कोहै देबतै आथी ज़ुंण ताह ज़िहै महान अर नुआहरै काम करी सके। 25 ज़ीबाण, मुंह बी दै जरदण नदी पार तैहा रज़दी-पज़दी ज़ैगा भाल़ै डेऊणैं। मुंह बी भाल़णअ त सह धारा बाखो मुल्ख अर लाबानोन मुल्खे तिंयां धारा आपणीं आछी।’

26 "पर तम्हां पिछ़ू हुअ बिधाता मुखा बी नराज़, तेऊ निं मेरी अह गल्‍ल मनी अर तेऊ बोलअ मुल्है इहअ, ‘ऐबै हुअ बतेर्हअ! ऐबै निं एते बारै मुंह संघै गल्‍ला करी। 27 तूह डेऊ उझै पिसगा धारा प्रैंदा लै संघा भाल़ पुर्ब-पछ़म, उतर दखण च़ऊ दिशा दी राम्बल़ै करै। पर तूह निं ऐबै जरदण नदी पार डेऊणअ। 28 जरदण नदी पार तैहा ज़ैगे मालक बणाणां लै निंणै इज़राईली ज़ैहसू। तूह दै एऊ लै हैअ अर एऊ का डाह खोज़ी कि ताह किज़ै-किज़ै करनअ।’

29 "तेखअ डाहै हाम्हैं बेथ-पोर सऊंऐं मुल्खै डेरै पाई।"