1 मोसा बोलअ इहअ, "इज़राईलीओ, थारै परमेशर बिधाता हेरनी थारी तैहा पाखलै देशे ज़ैगा हित्ती, गिर्गाशी, अमोरी, कनानी, परिजी, हिब्बी अर जबेशी का ज़ितणा लै मज़त करी। इना साता देशे लोग आसा तम्हां इज़राईली का खास्सै अर बलबान, पर ज़ेभै तम्हैं इना संघै जुध करे,✝ 2 बिधाता काढणैं तिंयां ज़ोरा-ज़ोरी तैहा ज़ैगा का पोर्ही, तम्हैं करै तिन्‍नां पठी खतम अर तिन्‍नां लै निं ल्हैज़ करी, नां तिन्‍नां संघै किज़ै करार करदै लागी, 3 नां तिन्‍नें शोहरीओ बैह आपणैं शोहरू संघै करी अर नां आपणीं शोहरीओ बैह तिन्‍नां संघै दैई हणैं। 4 किल्हैकि ज़ै तम्हैं इहअ करे, तेखअ सका तिंयां थारी आद-लुआदा होरी देअआ-देबीए पूज़ा कराऊई कबाता पाई। तिहअ करै हणअ बिधाता नराज़ अर तेखअ निं किधी इहअ हआ कि बिधातो कोप तम्हां इज़राईली लै पल़े अर तम्हैं हणैं छ़ेक्‍कै खतम।

5 "एता लै बोला हुंह इहअ कि ज़ेभै तम्हैं तिन्‍नां देशा ज़िते, तिन्‍नें बेदी पाऐ ढोल़ी ज़िधी तिंयां तिन्‍नें देअआ-देबीए पूज़ा करा। पात्थरे ओडै ज़ेता तिंयां पूज़ा तेता बी पाऐ फाल़ी। अशेरा देबीए पूज़ा करना लै ज़ुंण तिन्‍नैं डौंड आसा खल़ै किऐ दै तिन्‍नां बी पाऐ ढोल़ी अर तिन्‍नें मैहरै अर मुहुर्ती पाऐ आगी जैंदरी दहई।✝

6 "इज़राईलीओ, तम्हैं आसा थारै परमेशर बिधाता आपणीं पबित्र परज़ा बणाऐं दै, ज़ुंण तेऊ आप्पू लै आसा छ़ांटै दै। सारी धरती दी आसा कई देश पर तेऊ छ़ांटै तम्हैं इज़राईली आप्पू लै।✝ 7 सारी धरती दी थिऐ सोभी देशा मांझ़ै तम्हैं इज़राईली सोभी का कमज़ोर, 8 पर बिधाता छ़ांटै तम्हैं ई किल्हैकि सह आसा तम्हां लै झणैल़ू अर तेऊ आसा थारै दादा-बाबा संघै करार किई दी। तेऊ आणै तम्हैं आपणीं महान बाहे बला करै मिसर देशे माहा राज़ै का छ़ड़ैऊई ज़ुंणी तम्हैं गलाम थिऐ बणाऐं दै।

9 "तम्हां का आसा आप्पै थोघ कि थारअ बिधाता ई आसा असली परमेशर। तम्हैं डाहै तेऊ ई संघै झ़ूरी अर तम्हैं करै तिहअ ई ज़िहअ सह हुकम दैआ। ऐहा गल्‍लो आसा पाक्‍कअ भरोस्सअ कि बिधाता निं तम्हां अर थारी आद-लुआदा संघै आपणीं करार हज़ार पोस्ती तैणीं बी चोल़दअ अर सह रहणीं सदा तम्हां लै बणी।✝ 10 पर ज़ै तम्हैं बिधाता छ़ाडी होर्ता लै फिरे, इहअ करै हणैं तम्हैं बिधाते दुशमण अर बिधाता निं आपणैं दुशमणा खतम करना लै बल़ैग पांदअ। 11 तैही बोला हुंह तम्हां लै बिधाते तिन्‍नां बधाना अर बिधी मनणैओ डाहै तम्हैं खैल ज़ुंण मंऐं आझ़ तम्हां का लाऐ खोज़ी।

12 "ज़ै तम्हैं इना बधाना अर बिधी पठी मने, तै रहणीं सदा तम्हां लै थारै परमेशर बिधाते झींण अर सह करार बी रहणीं तम्हां संघै बणी ज़ेते तेऊ थारै दादा-बाबा लै ज़बान आसा दैनी दी।✝ 13 तै रहणअ बिधाता तम्हां लै झणैल़ू अर तेऊ दैणीं तम्हां लै एही बर्गत कि थारी हणीं आजू खास्सी आद-लुआद, नाज़, खास्सी साल-फसल, हर साल खास्सअ दाखो रस, खास्सअ घिऊ, खास्सअ जैतूनो तेल अर थारै हणीं खास्सै डागै-चैणें हेल़्ही। 14 बिधाता दैणीं तम्हां लै होरी देशे लोगा का खास्सी बर्गत। तेखअ नां तम्हां मांझ़ै कसरी अत्री हणीं अर नां थारै डागै-चैणैं बांढै हणैं। 15 बिधाता करनी तम्हां मांझ़ा का सोभै दाह-बमारी दूर, नां तम्हां लै तिंयां आफ़ता पल़णीं ज़ुंण तम्हैं मिसर देशै भाल़ी, तिंयां पाणीं बिधाता थारै दुशमणा लै।

16 "ज़ेभै बिधाता तेऊ देशै पुजी थारै दुशमणा थारै कबज़ै दी करे, तिन्‍नां करै तम्हैं तेता का पठी खतम। तेता लै निं तम्हैं तिन्‍नां लै झणैल़ू फिरी! नां तिन्‍नें देअ-देबी पूज़दै लागी, नांईं ता तम्हां लै हणीं तेखअ सह फाही।

17 "तम्हां सका एही सोठ बी पल़ी, ‘हाम्हैं किहअ करै सका इना देशा पठी खतम करी? ईंयां आसा हाम्हां का खास्सै अर बलबान!’ 18 तिन्‍नां का डरदै निं तम्हैं लागा! तम्हैं डाहै सिधी ऐहा गल्‍ला आद कि थारै परमेशर बिधाता मिसर देशे लोगा अर तिन्‍नें माहा राज़ै लै किहअ-किहअ किअ त। 19 तम्हैं भाल़अ आपणीं आछी कि बिधाता किअ आपणीं महान शगती करै महान च़मत्कार अर कई नछ़ैण रहैऊई आणै तम्हैं तेऊ मिसर देशा का छ़ड़ैऊई। सह बिधाता आसा आझ़ बी तिहअ ई अर तेऊ हेरनै तिन्‍नां लै बी तिंयां महान नछ़ैण अर च़मत्कार करी ज़हा दुशमणा का तम्हैं खास्सै डरदै आसा लागै दै। 20 तिन्‍नां थारै दुशमणा मांझ़ै ज़ुंण तम्हां का लुक्‍की करै ज़िऊंदै बी बच़े, तिन्‍नां लै छ़ाडणैं बिधाता दाह-बमारी* संघा हणैं तिंयां बी खतम। 21 तैही बोला हुंह तम्हां लै ज़ेभै तम्हैं तिन्‍नां सम्हनै जुधा लै खल़ै होए, तम्हैं निं डरदै लागी किल्हैकि तम्हां बाखा हणअ जुधा लै सह महान परमेशर बिधाता ज़हा का सोभी लागा डरनअ।

22 "ज़ेभै तम्हैं इना देशा संघै जुध छ़ेल़े, बिधाता काढणैं तिंयां लोग सुलै-सुलै तेऊ देशा का ज़ोरा-ज़ोरी पोर्ही। सोभै निं तिंयां एकी बारी तेऊ देशा का पोर्ही काढणैं, किल्हैकि ज़ै इहअ करे, तेऊ देशै रहणैं मणछ बेघै थोल़ै अर सह देश हणअ बणें ज़ीबा करै भरी अर तिन्‍नां करनअ थारअ नकसान।

23,24 "पर ज़ेभै तम्हैं थारै दुशमण राज़ै संघै जुधा लै डेओए, बिधाता पाणीं तिन्‍नां जैंदरी दाह अर झाख अर तेखअ हणैं तिंयां खतम करनै तम्हां लै सान। तम्हैं रहणैं तिन्‍नां एक-एक करी ज़ितदै लागी ज़ेभै तैणीं तिंयां पठी तेऊ देशा का डेऊई निं जाए, तेऊ देशै निं तेखअ तिन्‍नों नाअं नछ़ैण बी रहणअ कि तेथ हंदै कधू तिंयां बी बस्सै दै।

25 "ज़ेभै तम्हैं तेऊ देशे मालक जाए बणी, तेखअ पाऐ तिन्‍नें देअए मुहुर्ती आगी जैंदरी दहई। तिन्‍नां मुहुर्ती दी महल़ै दै सुन्‍नैं-च़ंदीओ मांण निं तम्हैं करी, सह बी हणीं तम्हां लै फाही, किल्हैकि बिधाता करा तेता का बी नफरत। 26 तै बोला हुंह तम्हां लै, तम्हैं करै तिन्‍नां सोभी पठी खतम। ज़ै तम्हैं इना च़िज़ा आपणैं घअरा लै आणे, तेता पिछ़ू हणैं तम्हैं अर थारअ घअर दुहै बरैबाद। इना च़िल़्हखरी च़िज़ा का रहै तम्हैं दूर!"