आयूब 33

1 "आयूब, ऐबै शुण धैन दैई

सोभी गल्‍ला ज़ुंण मंऐं बोली लाई।

2 ऐबै लाअ मंऐं खोज़ी कि मेरै मन्‍नैं किज़ै आसा।

3 हुंह करा सिधी सांऊंई गल्‍ला,

तेथ निं हुंह किछ़ै हेर-फेर करदअ।

4 सह परमेशर ज़हा का सारअ बल आसा,

तेऊए ई शाह करै आसा मुंह ज़िन्दगी भेटी दी।

5 ज़ै ताखा होए, तै लऐ तूह मुल्है ज़बाब दैई,

मुंह संघै हठ करना लै लऐ तूह आपणीं गल्‍ला तही-जोखी।

6 परमेशरा सेटा आसा हुंह अर तूह दुहै एक्‍कै ज़िहै,

हाम्हैं आसा तेऊ दुहै माट्टी का बणाऐं दै।

7 ताह निं मुखा डरने ज़रुरत आथी,

हुंह निं तेरअ बरोध करै ताह छेऊंदअ आथी आअ द।

8 हुंह त शूणअ लागअ द ज़ुंण तंऐं इहअ बोलअ,

9 ‘मेरअ निं किछ़ै कशूर आथी, मंऐं निं किछ़ै गलती किई।

मंऐं निं किछ़ै पाप किअ आथी।

10 परमेशर हआ मुंह संघै हठल़णा लै किज़ू नां किज़ू भान्‍नै लोल़अ लागअ द,

सह करा मुंह संघै दुशमणा ज़िहअ बभार।

11 तंऐं डाहै मेरै खूर शांघल़ी करे काठा दी बान्हीं,

संघा रहा तूह हर घल़ी मुंह भाल़अ लागी।’

12 पर आयूब, हुंह बोला ऐहा गल्‍ला लै आसा तूह गलत,

परमेशर आसा सोभी मणछा का महान।

13 तूह किल्है लाआ परमेशरा लै इहअ दोश कि सह निं म्हारी

खरी अर गल्‍लो ज़बाब दैंदअ?

14 परमेशर रहा भिई-भिई पै बोल्दअ लागी,

पर लोग निं तेऊए गल्‍ला दी धैन दैंदै।

15 राची करा परमेशर सुपनै एछी गल्‍ला,

ज़ेभै मणछ घणीं निंजा दी हआ सुत्तै दै।

16 सह करा इहअ कि तिन्‍नां का तेऊए गल्‍ला कानै शुण्हिंए,

तिन्‍नां छ़ुटा तेऊए चतैनगी शूणीं दर्छ़णअ।

17 परमेशर करा एते तैणीं गल्‍ला कि तिंयां मणछ पाप करनअ छ़ाडे

अर तिंयां घमंडी हणैं का बच़े।

18 सह निं तिन्‍नां बरैबाद हणैं दैंदअ,

इधी तैणीं कि सह बच़ाऊआ तिन्‍नां मौता का।

19 परमेशर नैरा हाम्हां रोग दैई

अर देही दी दाहे झोशा झ़ैऊई।

20 ज़ुंण रोगी हआ, तिन्‍नों निं रोटी खाणां लै बी ज़िऊ बोल्दअ,

बधिया का बधिया खाणैं-पिणैं का बी फिरा तिन्‍नां च़िल़्ह।

21 तिंयां हआ च़ार काठ शुक्‍कै अर

तिन्‍नें लागा हाडकै अर गल़ा बाती पाणीं शुझदअ।

22 तिन्‍नें एछा मर्हुई अर

तिन्‍नें ज़िन्दगी हआ जम्परीए बशै।

23 हई सका कि तिन्‍नां मणछे मज़त करना लै कुंण स्वर्ग दूत एछे,

सह हणअ परमेशरे हज़ारो स्वर्ग दूता मांझ़ै कुंण एक,

ज़हा हाम्हां का आद फरेऊंणी कि म्हारअ असली काम किज़ै आसा।

24 तेऊ स्वर्ग दूता फिरनी झींण संघा बोल़णअ इहअ,

‘परमेशर, एऊ बच़ाऊ जम्परी डेऊणैं का,

मुंह भेटी एऊ आज़ाद करने बात।’

25 तेखअ हणीं तेऊ मणछे देही होछ़ै लान्हैं ज़ेही नरोगी

अर तेऊ एछणैं भिई ज़ुआनी ज़िहै ज़ोर-ज़ाहण।

26 ज़ेभै सह मणछ प्राथणां करे, परमेशरा हेरनी तेऊए शूणीं।

तेऊ करनी खुशी-खुशी परमेशरे ज़ै-ज़ैकार,

किल्हैकि तेऊ करनअ सह मणछ सोभी दाह-बमारी का भिई नरोगअ।

27 तेऊ खोज़णअ सोभी का इहअ,

‘मंऐं किअ पाप अर हुंह त सत्ता का कबाता पेठअ द,

पर परमेशरै निं मुल्है तेते सज़ा दैनी

ज़ुंण मुंह भुगतणी पल़णीं ती।

28 तेऊ बच़ाऊअ हुंह जम्परी का अर

हुंह आसा ज़िऊंदअ राज्ज़ी-राम्बल़अ।’

29 इहै काम करा परमेशर भिई-भिई,

30 अर हर बारी बच़ाऊआ परमेशर तेऊ मणछे ज़िन्दगी जम्परी का,

ताकि तेऊ मणछा ज़िन्दगी ज़िऊंणें खुशी भेटे।

31 आयूब, ऐबै शुण मेरी गल्‍ला धैन दैई,

तूह रहै च़ुपच़ाप मेरी गल्‍ला शूणअ लागी।

32 ज़ै ताह किज़ै बोल़णअ रहअ तै लअ बोली, हुंह लऊं तेता शूणीं

हुंह च़ाहा ऐहा गल्‍ला पाक्‍की करनअ कि तेरअ निं किछ़ै कशूर आथी।

33 ज़ै नांईं, तै लाग च़ुपच़ाप मेरी गल्‍ला शूणअ,

हुंह खोज़ूं ताखा कि किहअ करै हणअ अक्ली आल़ै।"