1 एलीहू लागअ आजू इहअ बोल्दअ,

2 "तम्हैं खास्सै अक्ली आल़ै ज्ञैनी मणछ

शूणां मेरी गल्‍ला धैन दैई।

3 ज़ेही ज़िभ सुआद परखा,

तिहै हआ कान गल्‍ला परखणां लै।

4 अह हआ म्हारी आपणीं समझ़ कि

हाम्हैं परमेशरा संघै किज़ै हठ करा।

5 आयूब बोला इहअ कि एऊओ निं किछ़ै कशूर आथी,

परमेशर निं एऊओ नसाफ बोल़अ करी।

6 अह बोला इहअ, ‘सह हणीं झ़ुठी गल्‍ल ज़ै हुंह

इहअ बोलूं कि मेरअ आसा किज़ै कशूर,

मेरी निं गलती ई आथी, तज़ी बी पाऐ

परमेशरै मुल्है इहै डुघै ज़खम कि मेरै च़ाल्‍लअ मर्हुई।’

7 अह आयूब आसा किहअ मणछ?

एऊ लै आसा परमेशरे निंदा करनी पाणींओ घुप्पू झुटणअ।

8 अह डाहा कदुष्ट मणछा संघै संगत अर

एऊओ ज़िऊंण बी आसा पापी मणछा ई ज़िहअ।

9 अह बोला इहअ कि परमेशरे साबै ज़िन्दगी ज़िऊई करै निं

मणछा किछ़ै फाईदअ हंदअ!

10 तैही बोला हुंह, ज़हा समझ़ होए सह शूणां मेरी गल्‍ला!

इहअ निं हई ई सकदअ परमेशर गलती करे

अर नां सह कधू बूरअ करी करदअ।

11 सह दैआ मणछे कर्मे साबै तेतो फल ज़रूर

सोभी मणछा लागा तिन्‍नें कर्मो फल भुगतणअ।

12 परमेशर ज़हा का सारअ बल आसा, सह निं बूरअ करी ई सकदअ,

नां सह कहा लै पक्षपात करदअ।

13 परमेशरा लै शगती दैणैं आल़अ कै कुंण होर आसा?

कि संसारो इंतज़ाम कुंणी होरी आसा तेऊ का सभाल़अ द?

14 ज़ै परमेशर ज़िन्दगी दैणैं आल़अ शाह बापस काढे,

15 तेखअ हणैं सोभै ज़ीब खतम

संघा डेऊणैं सोभै मणछ भिई माट्टी जैंदरी।

16 ज़ै ताह समझ़ आसा, तै शुण मेरी गल्‍ला धैन दैई।

17 तूह तेऊ महान धर्मीं परमेशरा लै फिरा खोट काढदअ?

तूह कै सोठा तेऊओ नसाफ शुचअ आथी निं?

18 परमेशर बोला सोभी राज़ै लै बी, ‘तम्हैं आसा कदुष्ट,’

पांच़ा लै बोला इहअ, ‘तम्हैं करा पक्षपात।’

19 सह निं कार-करिंदैओ पक्ष लंदअ,

नां सह सेठ अर दाल़जी दी भेदभाब करदअ

किल्हैकि सोभै आसा तेऊ ई बणाऐं दै।✝

20 हाम्हैं सका आधी राची बी कज़ेभल़ी मरी।

परमेशर पाआ मणछा लै मार अर हाम्हैं हआ खतम!

बडै-बडै प्रतप्पी राज़ै मारना लै तोही निं तेऊओ धख ज़िहअ ज़ोर बी लागदअ।

21 परमेशर हआ हाम्हां मणछा भाल़अ लागअ द

कि हाम्हैं किज़ै-किज़ै करा अर केही ज़िन्दगी ज़िऊआ।

22 च़ाऐ ज़िहअ बी नटिप्प न्हैरअ किल्है निं होए,

तेथ बी निं पापी मणछ लुक्‍की सकदै।

23 परमेशरै निं कोही मणछा लै इहअ पाक्‍कअ बगत आथी डाहअ द

कि हाम्हैं तेभै तेऊ सेटा डेओए अर सह म्हारअ नसाफ करे।

24 तेऊ निं बडै-बडै जोधै पदबी का दूर करना लै अर

कहा होरी तैहा पदबी दी बशैल़णा लै

कोही का ज़ाज़त लागदी लणी।

25 किल्हैकि परमेशरा का आसा तिन्‍नें सोभी कामों थोघ,

सह पल़ा राची तिन्‍नां लै चुटी संघा करा तिन्‍नां ज़ातै का खतम।

26 सह दैआ पापी लै एही ज़ैगा सज़ा,

ज़िधी सोभै लोग तिन्‍नां भाल़ै होए लागै दै,

27 किल्हैकि तिन्‍नैं छ़ाडी तेऊ परमेशरे साबै ज़िन्दगी ज़िऊंणीं

अर तिन्‍नैं निं तेऊए हुकम मनै।

28 तिन्‍नैं छेऊऐ रैनै-गरीब इहै कि

तिंयां लागै कारी बाही परमेशरा का मज़त मांगदै

अर परमेशरै शूणीं तिन्‍नें लेर-पकार।

29 ज़ै परमेशर च़ाहे कि तेऊ निं किछ़ै करनअ,

तेऊ लै निं तेखअ कोह लोग बोली सकदै।

ज़ै सह पिठ फरेऊई हेरे, तेखअ निं तेऊ कोह मणछ भाल़ी सकदअ।

30 सह निं पापी मणछा राज़ करनै दैंदअ ताकि

तिंयां लोगा छेऊई नां सके।

31 आयूब, तंऐं कधू परमेशरा सेटा मनअ बी,

‘मेरै भलै हुअ पाप अर आजू निं

हुंह भिई पाप करदअ?’

32 कधू इहअ पुछ़अ,

‘हे परमेशर मुखा खोज़ मंऐं किज़ै गलती किई?

तै लागणअ मुखा थोघ कि इहअ काम आसा गलत, सह निं लागा मुंह करनअ?’

33 ज़ुंण काम परमेशर करा, तेता, तूह मंदअ ई निं आथी,

तेखअ बी कै तूह एही आशा डाह कि

तेऊ करनअ तिहअ ज़िहअ तूह च़ाहा?

ऐहा गल्‍लो फैंसलअ हुअ ताह करनअ नां कि मुंह,

ओर्ही खोज़ हाम्हां का तेरअ किज़ै बच़ार आसा।

34 समझ़कार मणछा जाणै मनी अर

अक्ली आल़ै मणछा बी बोल़णअ मेरी गल्‍ला शूणीं

35 कि आयूबा निं गल्‍ला करने समझ़ ई आथी,

सह डाहा नथोघी गल्‍ला लाई।

36 ज़ै आयूबै बोली दी सारी गल्‍ला भाल़णीं,

तेता का लागा थोघ कि आयूबे गल्‍ला आसा कदुष्ट मणछा ज़ेही।

37 पाप, हुअ पर तेऊ किअ परमेशरा लै द्रोह बी!

सह करा हाम्हां सोभी नदरी परमेशरो सुहांग।"