आयूबै दैनअ इहअ ज़बाब
1 आयूबै दैनअ इहअ ज़बाब,
2 "तंऐं बोल्दअ ठीक,
मंऐं आसा ईंयां गल्ला शूणीं दी।
पर मणछ किज़ै सका करी कि सह परमेशरा का धर्मीं शुझिए?
3 तेऊ संघै कुंण सका हठ करी?
सह सका हज़ार सुआल पुछ़ी अर
तेतो ज़बाब निं कोहै दैई सकदअ।
4 परमेशरा का आसा अक्ल अर
तेऊ का आसा सारअ बल,
तेऊ सेटा निं कोहै खल़अ टेक्की सकदअ।
5 सह सका नच़ानक बडै-बडै पर्बता
ओर्ही-पोर्ही सकैऊई,
रोश्शै सका सह तिन्नां कज़ेभल़ी खतम करी।
6 परमेशर करा सारी पृथूई दी ज़ाज़री,
तेते आथरी सकैऊआ सह ओर्ही-पोर्ही।
7 सह सका सुरज़ा बी निखल़णैं का रोक्की अर
ज़ै सह च़ाहे, तारै निं दैणअ तेऊ राची च़मकणै!
8 तेऊ आसा सारअ भ्रमंड एकी ज़ण्हैं डाहअ द छैई,
सह हांढा समुंदरे बडी-बडी छ़ाल्ली प्रैंदै।
9 तेऊ आसा सरगै सोभै तारै बणाऐं दै,
सात ऋषी तारै, मृग नक्षत्र,
कृतिका तारे छ़ुंढ अर
दखण दिशा बाखा नक्षत्र आसा तेऊ ई डाहै दै टकैल़ी।
10 तेऊए महान कामें निं हाम्हैं थह ई लोल़ी सकदै,
नां हाम्हैं तेऊए च़मत्कारा गणी सकदै।
11 परमेशर हांढा मेरै मुंहां बाती पोर्ही,
हुंह निं तेऊ भाल़ी सकदअ नां तेऊए छ़ेल़-छ़ुणक शुण्हदी!
12 ज़ै सह किछ़ै पोर्ही छ़ड़ैऊए, तेता लै निं तेऊ कोहै रोक्की सकदअ,
तेऊ का निं कोहै इहअ सुआल करी सकदअ,
‘तंऐं किल्है लाअ इहअ करी?’
13 परमेशरो रोश्श निं फांभअ हंदअ,
सह कच़ुंच़रा समुंदरे बडै-बडै करबैऊंणैं
दैंत्तर ज़ीबा बी आपणैं खूरा हेठै।
14 तेखअ हुंह तेऊ सेटा किज़ै च़ीज़ आसा कि हुंह तेऊ लै ज़बाब काढूं?
तेऊ संघै किधी सका हुंह हठ करी?
15 ज़ै मेरअ किछ़ै कशूर बी निं हंदअ,
तैबी सका हुंह परमेशरा सेटा लेर-पकार पाई सिधअ इहअ बोली कि झींण करी कर मेरअ नसाफ।
16 ज़ै सह मुंह बोल़णैं बी दैए,
तैबी बी निं मुंह भरोस्सअ आथी कि तेऊ हेरनी मेरी गल्ला शूणीं।
17 सह छ़ाडा थोघै बाझ़ी मुंह हारना लै ढिश-डुआल़अ
ताकि मुल्है होर बी खास्सै ज़खम पल़े।
18 सह निं मुंह शाह बी दैंदअ काढणैं,
तेतरी जाआ मुल्है होर आफ़त पल़ी!
19 ज़ै ज़ोरो साब भाल़े, मुंह निं परमेशरा सान ज़ोर आथी,
ज़ै नसाफे गल्ल करनी होए, सह आसा एही कि
परमेशरा निं समन दैई कोहै दालता लै शादी सकदअ!
20 मेरअ च़ाऐ किछ़ै कशूर बी निं होए, मेरै निखल़णीं आपणीं ई खाखा का खोट,
मेरी आपणीं गल्ला बी ज़ाण्हणीं मुखा मुल्है ई कशूर काढणैं आल़ी।
21 मेरअ निं किछ़ै कशूर आथी,
पर तेतो निं मुल्है किछ़ै फरक आथी।
हुंह गअ आपणीं ज़िन्दगी ई का हिछ़ुई।
22 मेरअ कशूर होए, च़ाऐ नां होए, तेता करै निं किछ़ै फरक पल़दअ,
हुंह आसा रोगी बृथा ज़िन्दगी ज़िऊंदअ लागअ द,
तैही बोला हुंह परमेशर करा खरै अर बूरै दुही खतम।
23 ज़ेभै कुंण भलअ मणछ नच़ानक मरा,
तेभै फुक्का परमेशरा बी हास्सी।
24 सारी पृथूई दी आसा कदुष्ट मणछो राज़,
नसाफ करनै आल़ै पांच़े आछी आजू बी आसा न्हैरअ किअ द!
इहअ करनै आल़अ परमेशर निं आथी तै होर कुंण आसा?
25 मेरी ज़िन्दगी आसा बाझ़ी आशा अर
बाझ़ी खुशी दी बेघै छ़ेक्कै ठुहर्दी लागी दी।
26 मेरी हर धैल़ी डेओआ छ़ेक्कै ठुहर्नै आल़ी मोट्टै नगाल़े किश्ती ज़ेही,
ज़िहअ छ़ेक्कै मुक्षरलअ आपणैं शकारा लै झ़ाफल़ी दैआ,
तिहै छ़ेक्कै बिता मेरै धैल़ै।
27 कई बारी किई मंऐं दाह बिस्सरी
खुश रहणें कोशिश,
28 पर आपणीं दाह भाल़ी छ़ुटा मुंह दर्छ़णअ,
किल्हैकि मुंह फिरा एही आद कि
परमेशरा सम्हनै निं हुंह नर्दोश आथी!
29 तेखअ सोठा हुंह इहअ, ज़ै हुंह दोशी हणअ ई हणअ,
तै आसा मेरी आप्पू बाखा इहअ खोज़णें मैन्थ करनी बृथा कि मेरअ निं किछ़ै कशूर आथी!
30 इहअ निं किज़ै साबण ई आथी
ज़ुंण मेरै पाप धोई सके।
31 परमेशरा पाणअ हुंह डुघी खात्ती दी
च़िक्करै जैंदरी ज़ेथ बेघै बूरी बास्स हआ लागी दी,
मेरै झिकल़ै बी लागणीं मुखा च़िल़्ह।
32 ज़ै परमेशर मुंह ज़िहअ मणछ हंदअ, तै सका त हुंह तेऊ लै ज़बाब दैई,
तै सका त हुंह दालता दी डेऊई तेऊ संघै हठ करी।
33 मुंह अर परमेशरा मांझ़ै निं कोहै पांच़ी करी सकदअ अर
नां कुंण हाम्हां दूईओ नसाफ करी सकदअ।
34 हे परमेशर, ऐबै कर हुअ!
ऐबै च़िक्कअ तंऐं हुंह बतेर्हअ,
ऐबै पा मुंह डरैऊंणे छ़ाड़।
35 तै निं मुंह ताह संघै गल्ला करना लै डअर रहणीं,
पर एही हालता दी निं हुंह ताह संघै चिंज़ी सकदअ।"