आयूब 38

बिधातो आयूबा लै ज़बाब

1 तेखअ बोलअ बिधाता ढिश-बागरी जैंदरा का आयूबा लै इहअ,

2 "तूह कुंण हआ मेरी अक्लीए बारै सुआल करनै आल़अ?

ताखा कुंणी खोज़ी एही नथोघी गल्‍ला बोल़णीं?

3 मर्धा ज़ेही बान्ह कुछी गाची

संघा दै मेरी गल्‍लो ज़बाब ज़ुंण हुंह पुछ़ा।

4 ज़धू मंऐं धरतीए आथरी पाई तधू किधी त तूह?

ज़ै ताखा थोघ थिअ तै लअ एते बारै मुखा खोज़ी।

5 धरतीओ घेरअ कुंणी नापअ अर

तेथ कुंणी खिंच़अ सूत?

6 पृथूईए आथरी किज़ू करै आसा थम्हीं डाही दी?

एते आथरीए ज़ानीं कुंणी लाई?

7 भैणीं दोत्ती लागा तारै बी कठा गिहा बोल्दै,

बिधाते स्वर्गे दूत लागा ज़ै-ज़ैकार करदै।

8 पृथूईए ओदरा का ज़ांऊं समुंदर निखल़अ,

तेथ कुंणी आसा फेरा-फेर रोक्‍कअ डाहअ द लाई।

9 सह आसा हुंह भाल़! ज़ुंणी बादल़ा करै आसा समुंदर ढोपी

अर नटिप्प न्हैरै करै आसा पल़ेटी डाहअ द।

10 मंऐं आसा समुंदरा फेर सिअं डाही दी

कि सह तेते प्रऊल़ी पिछ़ू ई रहे।

11 मंऐं बोलअ समुंदरा लै,

‘तूह एछै इधी तैणीं एता आजू निं डेऊई,

तेरी बडी-बडी छ़ाल्‍ली बी लोल़ी इधी पुजी शांत हुई।’

12 आयूब, तंऐं आपणीं ज़िन्दगी इहअ हुकम किअ कि

राच लोल़ी भैई या सान्ह लोल़ी पल़ी?

13 कि सुरज़ा लै तंऐं किअ ढेअ कि तेतो प्रैश्शअ लोल़ी सारी धरती पुजअ

कि तै शुझणैं कदुष्ट मणछ कि किधी आसा लुक्‍कै दै,

संघा ठुल़्हकणै तिंयां तिधा का पोर्ही?

14 धुप्पै करै शुझिआ धारा अर खाग-खाग इहै कि,

तिन्‍नैं आसा होए झिकल़ै बान्हैं दै,

तिंयां शुझिआ च़कणाट माट्टै प्रैंदै लाई दी मोहरा ज़िहै निम्बल़ै।

15 कदुष्ट मणछे निं धुप्पअ ज़िर्हदअ आथी

किल्हैकि तेता करै गछ़ा तिन्‍नां ज़ुल्म करनै का।

16 तूह कधू तिधी पुजअ ज़िधा का समुंदरे सोबल़ निखल़ा?

तूह कधू समुंदरे थाल्‍लै हांढअ?

17 कै ताखा इहअ थोघ आसा कि जम्परीए प्रऊल़ी किधी आसा?

18 ताखा आसा थोघ ऐ, कि अह संसार केतरअ आसा?

ज़ै ताखा थोघ आसा, तै खोज़ मुखा।

19 ताखा इहअ बी आसा थोघ ऐ कि प्रैश्शअ किधा का एछा

अर न्हैरैओ मूल़ किधी आसा?

20 कै तूह तेता लै बोली सका कि इधी तैणीं डेओऐ

कि तूह तेता पिछ़ू फरेऊई सका।

21 मेरै खैलै ज़ाणा तूह सोभै गल्‍ला!

किल्हैकि तूह आसा हणअ इना सोभी का आजी हुअ द

अर तूह हुअ इना गल्‍ला भाल़दी प्रोढअ!

22 तूह कधू तेऊ भढारा भाल़अ बी डेऊअ,

ज़ेथ मंऐं हिंअं अर शरू हआ डाहै दै?

23 ईंयां च़िज़ा हआ मंऐं आफ़ते बगती,

झ़गल़ै अर जुधे धैल़ लै तैर डाहै दै।

24 तूह कै कधू तैहा ज़ैगा डेऊअ ज़िधा का सुरज़ निखल़ा

अर पुर्बा बाखे बागरी एछा?

25 लोदल़-छ़ोदल़ पाणीं लै कुल्ह कुंणी फरेऊई?

कुंणी बणाईं गुल़ूबिज़ल़ू लै बात?

26 उज़र रेगीस्तानै ज़ेथ कोहै मणछ निं हंदअ बस्सअ द, तेथ कुंण बरशाऊआ पाणीं?

27 शुक्‍की-रुखी ज़िम्मीं कुंण भेऊआ पाणीं करै

ताकि घाह टिर्खिए?

28 सरगा का हणैं आल़ै पाणींओ बाब कुंण आसा,

ओश कुंणी आसा बणाअं द?

29 हिंअं कसरै ओदरा का निखल़ा,

पाल़े ईज कुंण आसा?

30 पाणीं किहअ करै बणा पात्थरा ज़िहअ लड्ड करदअ

अर समुंदरा प्रैंदै लागा हिंऊंओ शाण?

31 सरगै कृतिका तारैओ छ़ुंढ कै तूह बूणी सका

अर मृग नक्षत्रो ज़ोल़ कै तूह खोल्ही सका?

32 तूह कै तारै लै बोली सका कि आपणीं ऋता निखल़ै बगती?

सात ऋषी तारै अर तिन्‍नां संघै होरी होछ़ै तारै लै तूह दैआ सलाह।

33 ताखा आसा थोघ ऐ, भ्रमंडै कुंण बधान आसा?

तेऊ ई बधाना कै तूह धरती दी मनणा लै बोली सका?

34 तूह कै बादल़ा लै हाक्‍का लाई सका

कि ताह प्रैंदै लोल़ी पाणींओ हर्ल्ह रिंगअ।

35 तूह कै सरगै बीजा हुकम दैई सका

कि ज़िधी तूह बोला, सह पल़ा ताक्‍की करै तिधी।

36 बादल़ा लै पाणीं बरशाऊंणे बुध कुंण दैआ?

धूँईं का कुंण खोज़ा कि उझै लागा उझ़णअ?

37 एतरी अक्ल कहा आसा ज़ुंण बादल़ गणी सके?

सह कुंण आसा ज़ुंण सरगे पाणींए शिंगी तरैल़ी बरशाऊआ

38 ज़ेता करै धूल़ै-माट्टे गार बणा?

39 तूह कै सिहा लै शकार लोल़ी सका,

भुखै खारकै सिहा कै तूह तेभै रज़ैऊई सका

40 ज़ेभै तिंयां आपणीं जुहल़ी न्हैल़ै

शकारा खाणां लै च़ैहनूई करै ताखुई हआ रहै दै?

41 काऊड़ै लै तेभै रोटी कुंण दैआ

ज़ेभै तिंयां भुखै ठुल़्दै रहा लागी अर

ज़ेभै तिन्‍नें होछ़ै बच़ै रोटी लै मुंह परमेशरा सेटा लेरा लाआ?"