आयूब 41

1 "ताह कै लिबतान नाओं समुंदरो बडअ ज़ीब

म्हाछ़ली ढाकणें कुंगल़ै कांडै करै खिंच़ी हेरनअ?

या डोरी करै तेऊए ज़िभा झेची सका?

2 तेऊए नाकै कै तूह नकेल लाई सका

या तेऊए जात कै किल्‍ली सका?

3 तेऊ कै ताखा एही पकार लाई पाई कि तेऊ छ़ाड पोर्ही?

तेऊ कै लेरा पाई ताखा एही अरज़ करनी कि झींण कर?

4 तेऊ कै ताह संघै करार करनी

कि इहअ बाहिदअ करनअ कि तेऊ करनी सदा तेरी च़ाकरी?

5 तूह कै तेऊ च़ेल्‍लू ज़िहअ ढाकी पाल़ी सका,

कि तूह तेता आपणीं होछ़ी लान्हीं लै खेल्हणा लै दैए?

6 म्हाछ़ली ढाकणैं आल़ै कै तेऊए बोली लाई सका?

बपारी कै तेऊ छ़िन्हीं करै बेच़ी सका?

7 तूह कै तेऊ म्हाछ़ली ढाकणें कांडै आल़ी तारा करै छ़िन्ह-बिन्ह करी सका,

कि तूह तेऊए मुंडै बर्छ़ी खबेहुई सका?

8 तूह तेऊ एकी बारी छ़ुंह, ता छ़ुंह भाल़ै, ताह निं भिई कधि लागणअ,

तेऊ जुधा निं तूह कधि बिस्सरुई च़ाल्‍लअ!

9 लिबताना ज़िहै पाणींए बडै ज़ीबा भाल़ी छ़ुटा लोगा दर्छ़णअ

अर बेहोश हई बधल़िआ तिंयां धरनीं।

10 एही हिम्मत निं कोही आथी ज़ुंण लिबताना ज़िहै पाणींए बडै ज़ीबा रोल़े,

नां तेऊ सेटा कुंण खल़अ टेक्‍की सकदअ।

11 तेऊ पिछ़ू पल़ी निं कोहै राज्ज़ी रही सकदअ,

सारै संसारै निं तेऊए मकाबलै करदअ कोहै डेऊई सकदअ।

12 हुंह खोज़ूं ताखा लिबतान किहअ बडअ

बलबान आसा अर तेऊए ज़ांघा केचल़ी आसा।

13 तेऊ बागो कवच निं कोहै धेल़ी सकदअ

नां कहा तेऊए दबारै दांदा भितरी डेऊणे हिम्मत हंदी।

14 तेऊए डरैऊंणै दांदा भाल़ी निं

तेऊए जात निं कोहै खोल्ही सकदअ।

15 तेऊए पिठीए तरोल़ै हआ तेऊ लै ढाल़

तेते लगैग हआ पात्थरा ज़ेही लड्ड करदी।

16 तिंयां धारी हआ एकी-दुजै का पिड्डी शाची दी,

तेथ जैंदरी निं बागरी बी निस्सरदी।

17 तेतो ज़ोल़ आसा इहअ कि सह निं कधि फुक्‍कदअ ई आथी।

18 तेऊए छ़िक्‍का का निखल़ा बिज़ल़ी ज़िहअ च़लकार,

तेऊए आछी का निखल़ा धुप्पै ज़िहअ झ़ामण।

19 तेऊए खाखा का हआ ज़ल़दी आगी ज़िहै

लुपल़ै लागै दै निखल़दै।

20 नाका का हआ धूँए मोरी लागी दी

ज़िहअ कांडै-रिंडे ज़ल़दी आगी प्रैंदै लाऐ दै हांडू का भाफ हआ लागअ द।

21 तेऊओ शाहा का लागा आग ज़ल़दी

अर तेऊए खाखा का लागा आगीए लुपल़ै लागै दै निखल़दै।

22 तेऊओ कैल़अ आसा गेल्‍ली ज़िहअ

तेऊ भाल़ी फिरा सोभी दर्छ़णअ।

23 तेऊए घेर निं किधी का दुबल़ी आथी,

तेऊए मास्सो ज़ोल़ आसा लोहै ज़िहअ पाक्‍कअ।

24 तेऊओ दिल आसा पात्थरा ज़िहअ ज़ेथ डअर निं हंदी,

सह आसा घरटे तल़ी ज़िहअ काठअ।

25 ज़ांऊं सह खल़अ उझ़ुअ, बडै का बडै जोधै बी छ़ुटा दर्छ़णअ,

डरै-मारै लुक्‍का तिन्‍नें हैल़ी हांस ई।

26 एही निं कुंण तलबार आथी ज़ुंण तेऊओ किज़ै बगाल़ी सके,

नां कील, बर्छ़ी अर कतीरा करै तेऊए हान्‍नी हंदी।

27 लोहअ आसा तेऊ लै भुखलै ज़िहअ,

कांस्सअ आसा तेऊ लै चिजी दी झ़ुका ज़िहअ।

28 तेऊ निं कतीरा करै ठर्राऊई सकदै,

पात्थरो ढो बी ज़ाण्हिंआं इहै कि तेऊ लै शोटै नाज़े किश!

29 डांगै बी ज़ाण्हिंआं तेऊ का एही कि नाज़े काशी करै बाही,

ज़ै तेऊ लै बर्छ़ै करै बिन्हें तेता करै फिरा तेऊ च़ुंढु दैणैं ज़ेही हास्सी!

30 तेऊए पेटा हेठै ज़ाण्हिंआं गाडल़ूए फुटै दै ठिक्‍करै ज़िहै दांद निखल़ै दै,

ज़िहअ कि च़िक्‍करै जैंदरी ददाल़ होए फरेऊअ द।

31 सह लाआ डुघै समुंदरै उबल़दै पाणीं ज़िहै गाड्डू,

अर कल़ाही दी तेला ज़िहअ उबल़दअ।

32 तेऊ पिछ़ू छ़ुटा च़मच़मांदी शेफा

अर समुंदरो पाणीं शुझिआ तेता करै शेतअ।

33 तेऊ ज़िहअ निं संसारै कोहै ज़ीब आथी,

सह आसा इहअ ज़ीब ज़हा डअर ई निं आथी।

34 ज़हा ज़ीबा सोभी का बडै हणैंओ घमंड बी आसा

तेऊ लै बी भाल़ा सह उपरा का उंधै

सह आसा सोभी दैंत्तर ज़ीबा प्रैंदै राज़अ।"