1 Apwiiya Nlhuku nkayeerelha ashinna Musa ni Naharuni wiira, 2 "Mwaahimerieke attu o Israeli wiira, mwaakhureke ashinama onkhaye o velhaponi, 3 ni munlhokoni mwa ashinama onkhaye o velhaponi ayo, nhovahiya ashinama o inyaa cho uparuwa mipata miilhi, ni ashinama anochukhulha wiira mwaakhuure.

4 "Inakhalhaka chiicho, nhinkhuure mwannama riyoothe nochukhulha nansho inyaa chawe khachiparuwilhe mipata miilhi, ama homiania inyaa chawe nansho khanochukhulha. Nhikhuure ingamiya ukhalhawaya inoochukhulha nansho inyaa chaya khachiparuwilhe mipata miilhi, uwannyu yeyo mwooneke ukhalha mwannama hivahiye inyu wiira munkhuure. 5 Nhinkhuure nnyapa, ukhalhawaya noochukhulha nansho inyaa chawe khachiparuwilhe, yoyo khanorumelhelhiya umihoolho wa Apwiiya Nlhuku. 6 Nhinkhuure hukulha, yoyo noochukhulha nansho kharina inyaa cho uparuwa, yoyo khanorumelhelhiya umihoolho wa Apwiiya Nlhuku. 7 Mena nhikhuure ikulhuwe, inakhalhaka ihanaa inyaa chihoparuwa nansho khinochukhulha, yeyo khinorumelhelhiya umihoolho wa Apwiiya Nlhuku. 8 Ukhalhawaya yayo ashinama ayo khanorumelhelhiya umihoolho wa Apwiiya Nlhuku, nhikhuure inama aya mena ni wala nhivare mitembo chaya.

9 "Ihopa chiriyoothe cho ubaharini ama cho umwoolhokoni chirii ni mapezi ni makakahapa, chechiyo nkhuureke. 10 Nansho ittu iriyoothe inokhalha ubaharini ama umwoolhokoni, ihirii ni mapezi ni makakahapa, yaani chuupiye chonkhaye chinolhokelha mmaashini ni chuupiye chikina chonkhaye chinokhalha mmaashini chechiyo nsheru uwannyu, khachinorumelhelhiya umihoolho wa Apwiiya Nlhuku. 11 Chechiyo cho wuupiya chiyo nsheru uwannyu, khachinorumelhelhiya wo iphiro cho waalhapelha Apwiiya Nlhuku. Nhilhie inama aya, mena nhivare mitembo chaya mahuku onkhaye o uhimalha, chechiyo nsheru uwannyu mwaatti. 12 Yowuupiya iriyoothe inokhalha mmaashini ihirii ni mapezi ni makakahapa khinorumelhelhiya umihoolho wa Apwiiya Nlhuku.

13 "Tho, alha ashinuni onkhaye alha nsheru uwannyu, nhaakhuure, khanorumelhelhiya umihoolho wa Apwiiya Nlhuku, iwuku, ampicha, ikipungu, 14 irumaachi ni makosho onkhaye o inaka, 15 makosho onkhaye a anakhuku, 16 imbuni, waanda, matipitipi, ashaaka, 17 achichi, minandi, achichi olhupalhe, 18 anthiki, miolholho, itumbusi, 19 ikorongo, ikoikoi, ahudihudi ni anlhema.

20 "Nhaakhuure ashimweettu onkhaye anovava, aneeta mieto micheshe, yayo nsheru uwannyu, khanorumelhelhiya umihoolho wa Apwiiya Nlhuku. 21 Nansho ashimweettu akina ari ni mapupha, aneeta uno athupathuphaka vathi wo mieto micheshe, yayo mwaakhureke. 22 Munlhokoni mwo yayo ahaawo, kila nikosho no anashombe, makosho a achepuche, makosho o matetenka, ni kila nikosho no ichorope. 23 Nansho ashimweettu akina onkhaye o mapupha, anothupha ni o mieto micheshe yayo nsheru uwannyu, khanorumelhelhiya umihoolho wa Apwiiya Nlhuku.

24 "Ntu riyoothe nohalha uvara mitembo cha alha ashinama alha, khanorumelhelhiya umihoolho wa Apwiiya Nlhuku. Ni ntu riyoothe nohalha uvara chechiyo mitembo chiyo, haavare attu akina mpaka uchechilho. 25 Ntu riyoothe nokusha mpatta wo mitembo cho yayo ashimweettu ayo, yoyo khanorumelhelhiya umihoolho wa Apwiiya Nlhuku mpaka uchechilho ni ikuwo chawe chipuputtiyeke. 26 Ntu riyoothe ammaraka mwannama rii ni mieto chiparuwilhe nansho khanochukhulha, yoyo khanorumelhelhiya umihoolho wa Apwiiya Nlhuku mpaka uchechilho. Ni ntu riyoothe akushaka mitembo chaya, apuputteke ikuwo chawe, ni uyo khanorumelhelhiya mpaka uchechilho. 27 Ashinama onkhaye aneeta ni inyaa chaya inakhalhaka ahanaa mieto micheshe, yayo nsheru uwannyu, khanorumelhelhiya umihoolho wa Apwiiya Nlhuku. Ntu riyoothe nohalha uvara ntembo wo mwannama thoko yoyo khanorumelhelhiya umihoolho wa Apwiiya Nlhuku. Ni uyo apuputteke ikuwo chawe ni ukhalha chiicho mpaka uchechilho. 28 Ntu riyoothe nohalha ukusha mitembo chaya khanorumelhelhiya umihoolho wa Apwiiya Nlhuku. Ni uyo apuputteke ikuwo chawe, yayo nsheru uwannyu, ukhalhawaya khanorumelhelhiya umihoolho wa Apwiiya Nlhuku.

29 "Tho, nhaakhuure alha ashinama alha, ukhalhawaya khanorumelhelhiya wo iphiro cho waalhapelha Apwiiya Nlhuku, Anahuwo, makhulhe, kila nikosho no anaakoko olhupalhe, 30 ing'oto chulhupalhe, anaakoko ashikani, achikhuvi ni mariiya. 31 Yayo onkhaye ayo nsheru uwannyu, khanorumelhelhiya wo iphiro cho waalhapelha Apwiiya Nlhuku. Ni ntu riyoothe nohalha uvara mitembo chaya khanorumelhelhiya wo iphiro cho waalhapelha Apwiiya Nlhuku, mpaka uchechilho. 32 Yakhalhaka ntembo wo chechiyo cho wuupiya chiyo unowulhuwelha ittu iriyoothe ikhalhe ittu yo mwiri ama ikuwo ama yo nrapalha ama yo niguniya ama ittu iriyoothe inotumika wo nlhatu uriyoothe, yeyo ittu iyo khinorumelhelhiya wo iphiro cho waalhapelha Apwiiya Nlhuku mpaka uchechilho. Yathananiyaka wo ntheko uriyoothe tho, ihapihiyeke ni maashi. 33 Yakhalhaka ntembo aya uhowulhuwelha ittu yuupiye wo ulhoko, paahi, iriyoothe irii nhina yeyo ittu iyo khinorumelhelhiya wo iphiro cho waalhapelha Apwiiya Nlhuku, ni yeyo ittu yo ulhoko iyo ipweshiyeke. 34 Yakhalhaka maashi ama yo uwuriya iriyoothe irii nhina yeyo ittu iyo yamorelhaka yolhia iriyoothe, khinorumelhelhiya wo iphiro cho waalhapelha Apwiiya Nlhuku. Ni inyu nhilhie wala nhiwurie chechiyo ukhalhawaya ihokelha nsheru. 35 Kila ittu iwulhuwelhiye ni yoyo ntembo uyo khinorumelhelhiya wo iphiro cho waalhapelha Apwiiya Nlhuku. Yakhalhaka ntanuru ama niikho, chikwanyulhiyeke. Khachinorumelhelhiya wo iphiro cho waalhapelha Apwiiya Nlhuku, ni uwannyu mwaatti chiicho. 36 Ata inakhalhaka chiicho, ilhushi ama nrapo no maashi nitumbuchenre mwannama uyo, chinoorumelhelhiya umihoolho wa Nlhuku. Nansho ntu riyoothe novara ntembo uyo khanorumelhelhiya wo iphiro cho waalhapelha Apwiiya Nlhuku. 37 Yakhalhaka ntembo unoowulhuwelha imbeyu cho waalha, chechiyo imbeyu chiyo chinoorumelhelhiya wo iphiro cho waalhapelha Apwiiya Nlhuku. 38 Nansho yakhalhaka imbeyu chihoruweiya mmaashini wiira chimelhe ni induri iriyoothe yo ntembo nkayaawulhuwelha mwommo, paahi chechiyo imbeyu chiyo chihokelha nsheru, khachinorumelhelhiya wo iphiro cho waalhapelha Apwiiya Nlhuku.

39 "Yakhalhaka mwannama riyoothe vahiye inyu wiira munkhuure, nowiikhwelha mwanene, ntu riyoothe nohalha uvara ntembo awe, hokelha nsheru mpaka uchechilho, khanorumelhelhiya wo iphiro cho waalhapelha Apwiiya Nlhuku. 40 Ntu riyoothe akhuuraka inama yo yoyo ntembo uyo ama akushaka, apuputteke ikuwo chawe ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho.

41 "Yowuupiya iriyoothe ineepurulha velhaponi va, khinorumelhelhiya wo iphiro cho waalhapelha Apwiiya Nlhuku uwannyu, nhikhuure mena. 42 Ittu iriyoothe ineepurulha, ama ineeta wo mieto chonkhaye micheshe ama mieto chinchi, eiyo iriyoothe ineepurulha, nhikhuure mena, ukhalhawaya yeyo khinorumelhelhiya wo iphiro cho waalhapelha Apwiiya Nlhuku. 43 Paahi etu, nhiwe mwaakhalha ntu hinorumelhelhiya wo iphiro cho waalhapelha Apwiiya Nlhuku, wo nlhatu no ukhuura chuupiye chineepurulha. 44 Ukhalhawaya mii Apwiiya Nlhuku phi Nlhuku inyu, mwiichesheke ni wiilhokiha wo iphiro chinorumelhelha aka, ukhalhawaya mii ki ntakatifu. 45 Ukhalhawaya mii Apwiiya Nlhuku phi mii kuuthaminheni ilhapo yo Umisri wiira kikhalhe Nlhuku inyu, paahi etu nkhalheke iphiro chinorumelhelha aka, ukhalhawaya mii ki ntakatifu.

46 "Yayo etu, phi malheheriyo anaacha mwaha wo ashinama, ashinuni ni cho wuupiya chonkhaye chirii chikumi chinokhalha mmaashini ni velhaponi, 47 wiira nchuwelhe umwalhaaniha iriyari, cho wuupiya chinorumelhelha aka ni chihinorumelhelha aka, chineera aka wiira chikhuuriye ama chihikhuuriye."