1 Apwiiya Nlhuku nkayeerelha ashinna Musa wiira, 2 "Yakhalhaka ntu riyoothe howonya wo waathepiacha amwaatamana awe vachulhu ittu yeeshiye imboote uwannyawe, ama, unthurulha ama umwaakha nkhunanawe, yoyo hotteka. 3 Ama uvitha ittu ya amwaatamana awe yaapotenre, eeraka wiira khoonne, ama noolhupelha wo woothacha wo ittu iriyoothe nkaaattekiha attu, yoyo hotteka. 4 Yoyo vanowonya awe munlhokoni mwo yayo, noothananiya wiira anhokolhoshereke mwanene ittu iyilhe awe ama ipantte awe wo waakha iyo, ama ittu yeesheriye awe imboote, ama ittu ya amwaatamana awe yaapotenre ni uyo nkaavitha, ama ittu iriyoothe ilhupenlhe awe wo woothacha. 5 Vanohalha uchuwelha utteka wawe vawo, anlhiveke mwanene uyo ittu yoothene ni wuncherera mpatta mmoka wo mipatta nthanu vachulhu waya, nihuku ninorweeha awe isadaka awe yo uthamiha utteka. 6 Yamalhaka awiiheke wa opochera ishaani ikhondoro ilhopwana ama ipuri ilhopwana ihiremanre, akumiheke wa Apwiiya Nlhuku isadaka yo uthamiha uwonya, inolhikaana ni ibei inothananiya u Nihema Nitakatifu wo mwannama o isadaka yo uthamiha utteka wawe. 7 Opochera ishaani anompangelha yoyo ntu uyo ittu yo waathanihiya umihoolho wa Apwiiya Nlhuku, ni uyo noohiyereriya utteka wawe."

8 Apwiiya Nlhuku nkayeerelha ashinna Musa, 9 "Mwaavaheke Naharuni ni achishaana aya alha malheheriyo alha. Alha phi malheheriyo anaacha ukumihiya isadaka yo upahiya vamooroni. Isadaka yo upahiya vamooroni ikhalheke vamooroni vachulhu madhubahu uhiyu wonkhaye mpaka wichishu, ni mooro aya uthotheriyeke, upharelheke wo uhitiphia. 10 Washaakaru, opochera ishaani anawanre nkogo aya wo opochera ishaani, ikuwo yooteelha ni isuruwali fupi aya yo ikuwo yooteelha, akusheke itura yo isadaka ilhe ukhuma umadhubahuni ni weesha uchereshere madhubahu. 11 Tho, amalhaka vavawo, arulheke nkogo aya ni uwara nkina, arweeheke itura iyo vathe, uchereshere nikambi vakittu varumelhelhiye ni Apwiiya Nlhuku valhe. 12 Mooro wo madhubahu uyo uthepeke upharelha, uhitipihiye mena. Kila nihuku wichishu opochera ishaani athotherieke ikhuni vamooroni vawo ni vachulhu vaya vawo, eesheke isadaka yo upahiya iyo, ahinaaya upaha makhura o isadaka yo uwiiha mpuha. 13 Mooro unothananiya wiira uthepeke upharelha ikatema yoothe vachulhu madhubahu vawo wo uhitipihiya mena.

14 "Anottwara alha phi malheheriyo makina anaacha isadaka cho choolhia. Iyari i Naharuni phi o ukumiha isadaka wa Apwiiya Nlhuku, vachulhu madhubahu. 15 Ni mmoka a opochera ishaani ayo akusheke nthatha nimoka no iphepa yo isadaka yo choolhia vamoka ni makhura ni ubani wonkhaye ni urimeelhihiya vachulhu madhubahu thoko isehemu yo nuupusho, nihiriri naya ninowaachivelha Apwiiya Nlhuku. 16 Opochera ishaani Naharuni ni iyari aya, akusheke iphepa inohalha iyo ni ukoorosha nkatte wo uhihelhiya ihengedure. Alhelhieke untenjeni, u Nihema Nitakatifu. 17 Uhihelhiye ihengedure mena vanooshiya aya. Kihaavaha yeyo ukhuma isadaka chinokikumihera aya wo mooro. Thoko chiri aya isadaka chikina cho uthamiha uwonya ni cho uthamiha utteka, ni iyo phi isadaka itakatifu chinene. 18 Achishaana ashilhopwana a Naharuni phi vekha aya anophwanelhiya ulhia yeyo, ukhalhawaya yeyo phi yolhia yeeshiye wo nlhatu waya mahuku onkhaye, ukhuma isadaka chinokumiheriya Apwiiya Nlhuku wo mooro. Ntu riyoothe nkina nohalha uvara yeyo yolhia iyo, nookhalha ntakatifu."

19 Tho, Apwiiya Nlhuku nkayeerelha ashinna Musa wiira, 20 "Mwaahimerieke Naharuni ni achishaana aya ashilhopwana wiira, anoothananiya ukumiha wa Apwiiya Nlhuku ikilo imoka yo iphepa yo shilhia nihuku naya no uhikiya makhura ukhalha opochera ishaani, wichishu akumiheke nusu, ni uchechilho nusu ikina. 21 Yeyo iphepa iyo athakaniheke ni makhura ni wooshiya viikho nchikalaangoni. Yamalhaka, mmwiiheke inamianihiye ivipande vipande ni ukumihiya wa Apwiiya Nlhuku wo upahiya vamadhubahuni. Ni nihiriri no isadaka iyo ninowaachivelha Apwiiya Nlhuku. 22 Mwaamwana mwanlhopwana a Naharuni thanlhiye uvara ntheko wo Opochera ishaani Olhupalhe, akumiheke wa Apwiiya Nlhuku yeyo isadaka iyo. Yayo phi malheheriyo o mahuku o uhimalha, ni isadaka yonkhaye inoopahiya vamooroni mpaka uvia. 23 Isadaka iriyoothe yo choolhia ikumihiye ni opochera ishaani, inoopahiya yonkhaye, khinolhiya mena."

24 Apwiiya Nlhuku nkayeerelha ashinna Musa wiira, 25 "Mwaahimerieke Naharuni ni achishaana aya wiira anottwara alha phi malheheriyo anaacha isadaka yo uthamiha uwonya. Vakittu mwannama o isadaka yo upahiya vanohithelhiya awe, phi vavawo vanohalha uhithiya mwannama o isadaka yo uthamihiya uwonya. Yeyo phi isadaka itakatifu chinene. 26 Opochera ishaani anokumiha yeyo isadaka iyo phi nohalha ukhuura, untenjeni, u Nihema Nitakatifu. 27 Ntu ama ittu iriyoothe inohalha uvara yeyo inama iyo inookhalha itakatifu. Ikuwo iriyoothe inohalha umorelhiya ni iphome yo yeyo isadaka iyo, paahi yeyo ikuwo iyo ipuputtiyeke vakittu varumelhelhiye ni Apwiiya Nlhuku. 28 Iyoopwe inohalha uterekhelhiya yeyo inama iyo, inoopweshiya. Nansho yakhalhaka ivyombo chiyo cho shaba, paahi chinookuttiya ni uhapihiya ni maashi. 29 Kila nlhopwana o iyari ya opochera ishaani yeekha aya phinohiyeriya ulhia yeyo inama iyo, ukhalhawaya yeyo phi isadaka itakatifu chinene. 30 Nansho kila isadaka iriyoothe yo uthamiha uwonya iphome aya inowiihiya u Nihema Nitakatifu, wiira ilhapelhelhiye wo nlhatu no waathanihiya, inama aya ihikhuuriye, ipahiyeke vamooroni mpaka uvia."