1 Apwiiya Nlhuku nkayeerelha ashinna Musa wiira, 2 "Mwaahimerie attu o Israeli wiira, mahuku o isikukuu chithanlhilhe aka, phi mahuku o ukhalha vamoka ni ukithimicha mii.

3 "Mahuku o uvara ntheko arii sita, nansho nihuku no saba phi no wiittuwa, nhivare ntheko uriyoothe. Nenno phi nihuku nitakatifu, Nihuku no Wiittuwa wa Apwiiya Nlhuku mmapuroni mwinyu mwonkhaye. 4 Isikukuu chaka chikina mii Apwiiya Nlhuku chinohalha inyu ukhalha ni nkutano ntakatifu wo ukithimicha chipangiyeke ikatema chinttwara chipangiye.

5 "Uchechilho wo nihuku no khumi ni ncheshe no mweeri wo upacha mpangeke Isikukuu yo Pasaka wo ukithimicha mii Apwiiya Nlhuku. 6 Nihuku ninottwara yaani no khumi ni nthanu, Isikukuu yo Mikatte Cho Uhihelhiya Ihengedure ichokholheke. Wo mahuku saba, nlhieke mikatte cho uhihelhiya ihengedure. 7 Nihuku no upacha munlhokoni mwo mahuku saba ayo, mpangeke nkutano ntakatifu. Nenno nihuku nno nhivare ntheko. 8 Wo yoyo mahuku saba onkhaye ayo nkikumihereke isadaka cho upahiya vamooroni mii Apwiiya Nlhuku. Nihuku no saba mpangeke nkutano ntakatifu. Ni mena nhipange ntheko uriyoothe."

9 Tho Apwiiya Nlhuku yaheerelha ashinna Musa, 10 "Mwaahimerieke attu o Israeli wiira, vanohalha aya ukhalha ilhapo inaavaha aka, nkayaaruweria choolhia chaya, yaawiihereke opochera ishaani ihiru yo milhipu cho choolhia chiyo. 11 Opochera ishaani atheesheke uchulhu ihiru wooniha wiira anaakumihera Apwiiya Nlhuku, nihuku ninottwara Nihuku no Wiittuwa, wiira nrumelhelhiye. 12 Nenno nihuku nno vanooniha aya yeyo ihiru ikumihiye iyo umihoolho waka, nnothananiya wiira mwaakumihereke Apwiiya Nlhuku isadaka yo upahiya yo mwaakhondoro nlhopwana o iyaakha imoka hiremanre. 13 Vamoka ni yeyo isadaka iyo, akumiheke isadaka yo choolhia ikilo piilhi cho iphepa yo shilhia ithakanihiye ni makhura o izeituni, inokumihiya wa Apwiiya Nlhuku wo mooro, nihiriri naya nno ninookichivelha. Isadaka aya yo uwuriya ikhalheke idivai ilita imoka. 14 Nihinaaya nenno nihuku no waawiihera Apwiiya Nlhuku isadaka iyo, nhilhie milhipu cho choolhia chinyu, chikithi, cho waarikiya ama chooshiye ukhalha mikatte. Alha phi malheheriyo aya o uttwara mahuku onkhaye wo iyari chaya chonkhaye vakittu variwoothe vanohalha aya ukhalha.

15 "Mwaalhakelheke ijuma saba ukhuma nne nihuku ninottwara Nihuku no Wiittuwa nne vaatheshilhe inyu ihiru yo isadaka wooniha wiira nnokikumihera mii Apwiiya Nlhuku. 16 Mwaalhakelheke mpaka nihuku no makhumi nthanu, yaani nihuku no nayeelhi, baada yo Nihuku no Wiittuwa no saba, nkikumihereke mii Apwiiya Nlhuku isadaka yo choolhia cho naanano. 17 Kila inupa, attu awiiheke mikatte miilhi cho isadaka yo utheeshiya wooniha wiira inokumihiya umihoolho waka mii Apwiiya Nlhuku. Kila nkatte unothananiya wiira ukooroshiye wo ikilo piilhi cho iphepa yo shilhia ihelhiye ihengedure ukikumihera mii Apwiiya Nlhuku isadaka yo milhipu chinyu. 18 Vamoka ni yayo, mwaakumiheke ashikhondoro saba o iyaakha imoka ahiremanre, n'dume no ing'ope nimoka ni ikhondoro chilhopwana piilhi. Yayo ashinama ayo anookhalha isadaka yo upahiya vamooroni vamoka ni isadaka yo choolhia ni isadaka yo uwuriya. Nihiriri no chechiyo isadaka chiyo ninookichivelha mii Apwiiya Nlhuku. 19 Nkumiheke ipuri ilhopwana imoka yo isadaka yo uthamiha uwonya ni ikhondoro piilhi chilhopwana cho iyaakha imoka wo nlhatu no isadaka cho uwiiha mpuha. 20 Opochera ishaani atheesheke uchulhu umihoolho waka, ukikumihera mii Apwiiya Nlhuku, vamoka ni nkatte wo milhipu cho choolhia ni ikhondoro piilhi chilhe. Chechiyo chinohalha ulhiya ni opochera ishaani. 21 Nenno nihuku nno mwiihaniheke nkutano ntakatifu, nhivare ntheko. Alha phi malheheriyo inyu o uttwara mahuku onkhaye ni iyari chinyu chonkhaye, mmapuroni winyu.

22 "Vanokhungura inyu choolhia chinyu mmatani, mena nhikungure chonkhaye mpaka mmwiinanoni mwo imata inyu wala nhihokolhie utulhi urokottacha chihanlhe. Mwaahiyereke amashikini ni alheto. Mii phi Apwiiya Nlhuku inyu."

23 Apwiiya Nlhuku nkayeerelha ashinna Musa wiira, 24 "Mwaahimerieke attu o Israeli wiira, nihuku no upacha no mweeri wo saba nikhalheke nihuku no wiittuwa, nihuku ninohalha uhimiachiya wo woopiya nipalhapata ni upangiya nkutano ntakatifu. 25 Nhivare ntheko nenno nihuku nno, nansho nnothananiya wiira nkikumihereke isadaka yo upahiya vamooroni mii Apwiiya Nlhuku."

26 Apwiiya Nlhuku yaheerelha ashinna Musa, 27 "Nihuku no khumi no mweeri ulha wo saba ulha phi nihuku no waathanihaniya. Nenno nihuku nno phi nihuku no ukhalha ni nkutano ntakatifu. Nttukeke, ni ukumiha isadaka chinokumiheriya Apwiiya Nlhuku wo mooro. 28 Nhivare mitheko chinyu chiriyoothe nenno nihuku nno. Ukhalhawaya nenno phi nihuku no waathanihaniya, nihuku no uwaathanihani umihoolho wa Apwiiya Nlhuku inyu. 29 Ntu riyoothe hinohalha uttuka nenno nihuku nno, eeviyeke ni manyaalhoko awe. 30 Ntu riyoothe nohalha uvara ntheko uriyoothe nenno nihuku nno kinonrimeelhiha ukhuma wa attu awe. 31 Nhivare ntheko mena! Alha phi malheheriyo o uttwara mahuku onkhaye, iyari chinyu chonkhaye, ni mmapuroni mwinyu mwonkhaye. 32 Nenno nihuku nno, ninaakhalheke uwannyu phi nihuku no wiittuwa ni uttuka. Nihuku no Wiittuwa phi nihuku no khumi no ulha mweeri ulha, ukhuma uchechilho mpaka uchechilho wo nihuku ninottwara."

33 Apwiiya Nlhuku aheerelha ashinna Musa tho wiira, 34 "Mwaahimerie attu o Israeli, Ukhuma nihuku no khumi ni nthanu no ulha mweeri wo saba ulha mwaapangelheke Apwiiya Nlhuku isikukuu yo marapatta wo mahuku saba. Yeyo phi isikukuu ya Apwiiya Nlhuku. 35 Nihuku no upacha no yayo mahuku saba ayo, nkhalheke nkutano ntakatifu ni vavawo mena nhivare ntheko uriyoothe. 36 Wo mahuku saba nkumiheke isadaka chinovahiya aya Apwiiya Nlhuku. Baada yo mahuku saba, nihuku ninottwara yaani nihuku no nane, nkhalheke nkutano ntakatifu ni waakumihera Apwiiya Nlhuku isadaka yo upahiya vamooroni. Yoyo nkutano uyo phi ntakatifu. Ni nenno nihuku nno nhivare ntheko uriyoothe.

37 "Chilha phi isikukuu cha Apwiiya Nlhuku cheeshiye chinohalha inyu uhimiacha wiira nkhalhe nkutano ntakatifu wo waakumihera Apwiiya Nlhuku isadaka chinokumihiya wo mooro. Yaani isadaka cho urimeelhihiya, ni cho choolhia, idhabihu ni isadaka cho uwuriya, kila isadaka imoka wo nihuku no vekha aya. 38 Chechiyo isadaka chiyo phi vamoka ni chilhe chinokikumihera inyu mii Apwiiya Nlhuku nihuku no Wiittuwa ukhalha thoko isadaka cho mahuku ene chiyo, isadaka cho uthapulha ishaani chinyu, ni isadaka chaya cho uttuna winyu chinaakumihera inyu Apwiiya Nlhuku.

39 "Mwamalhihaka ukhungura mmamatani mwinyu mpangeke isikukuu wo mahuku saba ukhuma nihuku no khumi ni nthanu no mweeri wo saba, nihuku no upacha nikhalheke no wiittuwa ni chiicho nihuku no nane. 40 Nihuku no upacha nkusheke maphepu o miri chinyu chorera ni maritta o mittende, ni maritta arii ni mathaakhuru menchi ni maritta o miri chinomelha nchereshere mwoolhoko, ni uttapelhelha isikukuu umihoolho wa Apwiiya Nlhuku, Nlhuku inyu wo mahuku saba. 41 Kila iyaakha nnothananiya nttapelhelheke ilha isikukuu ilha wo mahuku saba wo waathimicha Apwiiya Nlhuku. Alha phi malheheriyo o uttwara mahuku onkhaye wo iyari inyu. Mpangeke mweeri wo saba. 42 Wo ikatema yo mahuku saba nkhalheke mmarapattani. Anenchi onkhaye o Israeli akhalheke mmarapattani yayo mahuku ayo. 43 Yeyo ittu iyo inowoopusha iyari chinyu wiira vaathaminhe aka manyapwiiya inyu ilhapo yo Umisri, kahaakhalhiha mmarapatani. Mii phi Apwiiya Nlhuku inyu."

44 Paahi ashinna Musa yahaahimiachera attu o Israeli malheheriyo o isikukuu cho waathimicha Apwiiya Nlhuku.