1 Tho, Apwiiya Nlhuku yahoolhumana ashinna Musa umwaakoni Usinai ni weerelha, yeerelhe attu o Israeli wiira, 2 "Vanohalha aya uphiya ilhapo kinaavaha aka mii Apwiiya Nlhuku, kila iyakha yo saba eettuwiheke ilhapo, ahilhime wo waathimicha Apwiiya Nlhuku. 3 Iyaakha sita alhimeke ni waalha, alhimelheke izabibu chaya akhwachereke ni ukhungura. 4 Nansho iyaakha yo saba ikhalheke phi iyaakha yo wiittuwiha ilhapo wo nlhatu wa Apwiiya Nlhuku. Ahaalhe ittu iriyoothe wala ukhwachera mizabibu chaya. 5 Ahikungure wala urukulha ittu iriyoothe inomelha ineeneru, ama izabibu cho miri chinyu chihikhwacheriye. Yeyo ikhalheke iyaakha yo wiittuwiha ilhapo. 6 Inakhalhaka chiicho etu, ilha iyaakha yo wiittuwihiya ilhapo ilha, ilhapo inouvahani choolhia, mwaattiva mwaashinene, ipotta chinyu, anamitheko inyu vamoka ni alheto anokhalha mmawannyu. 7 Tho, mihuwo chinyu ni ashinama o mwiithuphini anokhalha munlhokoni mwinyu, anoopatta choolhia. Ittu iriyoothe inohalha uyara velhaponi, ilhiyeke.

8 "Aalhakelheke iyaakha saba mikwaha saba ni iyo inaakhalheke iyaakha makhumi ncheshe ni tisa. 9 Yamalhakaru, nihuku no khumi no mweeri wo saba, niri phi nihuku no waathanihiya, munrumeke ntu oopeke nipalhapata ilhapo yonkhaye. 10 Nthimicheke iyaakha yo makhumi nthanu, wo waavaha uneethi ipotta chonkhaye velhaponi. Phi isikukuu yo wuupusheriya iyaakha yo makhumi nthanu. Kila mmoka aya ahokolhelheke nhakhu awe, ahokolhieke wa ashilhoko awe. 11 Ukhalhawaya ilha iyaakha ilha phi yo isikukuu yo wuupuwelhiya iyaakha makhumi nthanu, paahi etu nhaalhe imbeyu ama ukhungura iriyoothe inomelha ineneru wala urukulha izabibu cho miri chihikhwacheriye. 12 Ni ukhalhawaya ilha iyaakha ilha phi yo isikukuu uwannyu, ikhalheke iyaakha itakatifu. Paahi etu nlhieke chittu chinomelha chineneru mmatani mwinyu.

13 "Ilha iyaakha yo isikukuu ilha, kila mmoka inyu aholhosheke imata iriyoothe yaathumilhe awe wa mwanene. 14 Paahi nhaanyenge owaatamana inyu, vanothuma inyu ama vanaathumihera inyu imata. 15 Ibei yo imata iyo iromolhiyeke wo uwehiya iyaakha chihanlhe ihinaya uphiya iyaakha yo isikukuu yo makhumi nthanu yo uhokolhoshiya wa mwanene. 16 Yakhalhaka iyaakha chihanlhe phi chinchi muncherereke ibei. Ni yakhalhaka iyaakha chihanlhe chiyo chiri vakani mmukulheke ibei iyo, ukhalhawaya ibei aya inohalha uphimiya wo ulhikaana ni choolhia chinohalha ukhunguriya. 17 Nhinyengane nansho mmwoveke Nlhuku inyu. Mii phi Apwiiya Nlhuku inyu.

18 "Paahi etu nvarechesheke malheheriyo aka onkhaye ni upanga, wiira nthepeke ukhalha rata velhaponi. 19 Ilhapo inooyara choolhia chinchi chinene, ni inyu nnoopatta choolhia nkamwaawona, ni ukhalha rata.

20 "Nansho paanepa nnowuupuwelha wiira, ‘Ninaalhiekeni iyaakha yo saba yakhalhaka ninoochichihiya waalha wala ukhungura choolhia chihu?’ 21 Eiyo! Mii kinoovahera ibarakha ilhapo iyaakha yo sita, ni iyo inouvahani choolhia cho uthosha wo iyaakha ttaaru. 22 Vanohalha inyu waalha iyaakha yo nane vanoweherera inyu ukhungura, nnaalhieke choolhia cho iyaakha chivinre chiyo, mpaka iyaakha yo tisa, vanohalha inyu uchokholha ukhungura tho.

23 "Ilhapo ihithumihiye mena mena, ukhalhawaya yeyo yawaka, ni mwaattiva alheto ni inyu attu o uvira velhaponi waka va. 24 Phi nlhatu etu ilhapo inyu yonkhaye nnookhalhana iphiro cho woopolha imata.

25 "Yakhalhaka Muisraeli naninyu nookhalha mmashikini, nkaathumiha imata awe, paahi mmuchi awe oopolheke. 26 Yakhalhaka yoyo ntu uyo kharina mmuchi nohalha wooria woopolha, nansho kaanyuma aya nowa ukhalha ntu o nhakhu, ni wooria woopolha ilhapo awe, 27 paahi aalhakelheke iyaakha chonkhaye ukhuma vaathumihilhe awe, alhiveke, ni ntu thumme noothananiya wiira anhokolhoshereke mwanene. 28 Nansho yakhalhaka khanooria woopolha, paahi, inoohalha mmathathani mwa ntu thumilhe ulhe mpaka iyaakha yo isikukuu yo wuupusheriya iyaakha makhumi nthanu. Yeyo iyaakha iyo, yoyo nhakhu uyo uhiyereriye ni uhokolhosheriya ntu thumihilhe ulhe.

29 "Ntu athumihaka inupa inokhalha awe, irii nhina iwani ithekelhiye ukucho, nowooria woopolha wo ikatema yo iyaakha imoka ukhuma vaathumihilhe awe. Wo yeyo iyaakha yonkhaye iyo nookhalha ni ikekhia yo woopolha. 30 Nansho inupa irii iwani ithekelhiye ukucho wo ishiri yaahopolhiyeke wo ikatema yo iyaakha imoka, paahi inookhalha yawawe thumilhe ulhe iyaakha chonkhaye iyari chaya chonkhaye. Wala khinohokolhoshiya iyaakha yo isikukuu yo wuupusheriya iyaakha makhumi nthanu. 31 Nansho inupa chiri iwani chihirukurerihiye ukucho chinowaalhakelhiya thoko imata. Chinowooria woopolhiya wo iyaakha imoka, nansho chiyo chinothananiya wiira chihokolhoshiyeke iyaakha yo wuupusheriya iyaakha makhumi nthanu. 32 Ata inakhalhaka chiicho etu, inupa chiri iwani cha Alawi, chinowooria woopolhiya ikatema iriyoothe. 33 Paahi etu yakhalhaka inupa ya Nlawi inoothumihiya ni uhihokolhoshiya, iweeke etu yaahokolhoshiya iyaakha yo makhumi nthanu, ukhalhawaya phi chiyo chivahiye aya ukhalha chawaya munlhokoni mwa attu o Israeli ikatema yonkhaye. 34 Nansho ilhapo chinohuwelha aya Alawi mihuwo vamoka, chihithumihiye, ukhalhawaya chechiyo phi ilhapo chihiyeriye aya ikatema yonkhaye.

35 "Yakhalhaka Muisraeli nkhunaninyu hokhalha mmashikini ama hiinooria wiipattelha mwanene uno akhalhaka vamoka ni inyuva, nnothananiya wiira, munshungeke athepe ukhalha ni inyuva, thoko chinopanga inyu wa nlheto ama ntu ovira rii munlhokoni mwinyu. 36 Mwankopihaka nhithanane ulhiviya ifaida yo iphiro iriyoothe. Nansho mmwooveke Nlhuku, ni inyu nthepeke unkhalhana munlhokoni mwinyu. 37 Nhinkopihe nchurukhu wiira mpatte ifaida ama unvaha yoolhia wiira olhiveni. 38 Muupuwelheke wiira, Mii phi Apwiiya Nlhuku inyu, kuuthaminheni ilhapo yo Umisri wiira kuuvaheni ilhapo yo Ukanaani wiira ni mii kikhalhe Nlhuku inyu.

39 "Yakhalhaka Muisraeli nkhunaninyu nokhalha munlhokoni mwinyu hokhalha mmashikini, ethumihaka uwannyu, nhimpange thoko ipotta. 40 Mumpangelheke uwannyu thoko namitheko ama thoko ntu o uvira. Munvariheke ntheko mpaka iyaakha yo isikukuu yo iyaakha makhumi nthanu. 41 Yeyo iyaakha iyo mummaheke uneethi, munhiyerereke vamoka ni achishaana awe, ahokolhie wa manyaalhoko awe, urii nhakhu awe wo uhiyeriya ni manyaathumwanawe. 42 Ukhalhawaya attu o Israeli phi anamitheko aka kaathaminhe aka ilhapo yo Umisri, paahi etu ahithumihiye thoko ipotta. 43 Nhaataware attu o Israeli wo ushilhilhi, nansho mmwooveke Nlhuku inyu. 44 Mwaathananaka ipotta, mwaathumeke attu o ilhapo chikina cho waatamana. 45 Tho, mwaathumeke ipotta ukhuma wa alheto anokhalha munlhokoni mwinyu ni ashilhoko aya ayareelhe mwiilhaponi winyu ni ayo anookhalha awinyu. 46 Yayo mwakhwaaka, nnowooria waahiyera achishaana inyu, akhalhe ipotta chaya mahuku onkhaye. Yayo aapangeke ipotta chaya, nansho nhaataware ashilhoko inyu attu o Israeli wo ushilhilhi.

47 "Yakhalhaka nlheto ama ntu ovira nokhalha munlhokoni winyu hokhalha ntu o nhakhu, ni nlhoko inyu hokhalha mmashikini nkeethumiha wa yoyo nlheto ama ntu o uvira uyo ama wa nlhoko awe, 48 nowooria woopolhiya baada yo wowo wiithumiha uwo, nlhoko awe mmoka nowooria umwoopolha. 49 Athatha awe chiicho anowooria umwoopolha, ama nshivani awe, ama nlhoko awe o nihimo nawe, ama nowooria wiichoopolha mwanene akhalhaka ni nhakhu. 50 Yoyo avaraanaka ni ntu nthumme uyo, aalhakelhelhiyeke toka veethuminhe awe mpaka iyaakha yo upangiya isikukuu yo wuupusheriya iyaakha makhumi nthanu. Malhivo o uhiyereriya wawe alhikaaneke ni iyaakha chivanre awe ntheko. Mahuku nokhalha awe ipotta ya ntu iphimiyeke thoko a ntu rii munthekoni. 51 Yakhalhaka iyaakha mpaka iyaakha yo wuupusheriya iyaakha yo makhumi nthanu chinookhalha chinchi chinene, paahi ahokolhosheke nifungu nuulhupalhe chinene no ibei ilhivelhiye awe. 52 Ni vavawo yakhalhaka iyaakha chihanlhe vakani ihinaya uphiyelha isikukuu yo wuupusheriya iyaakha yo makhumi nthanu, aalhakelhelhiyeke nifungu nihanlhe ninolhikaana ni iyaakha chiyo, ni unlhiva ifidiya. 53 Ikatema yonkhaye vanokhalha awe wa ntu, akhalhaniyeke etu thoko namitheko o ulhiviya kila iyaakha. Ni ntu nthumilhe uyo hinkhalhane wo ushilhilhi. 54 Nansho yakhalhaka yoyo ntu uyo ni alhoko awe khoopolhiye wo chechiyo iphiro chiyo, paahi etu avahiyeke uneethi iyaakha yo wuupusheriya iyaakha yo makhumi nthanu. 55 attu o Israeli phi anamitheko aka, ukhalhawaya kaathamihilhe ilhapo yo Umisri. Mii phi Apwiiya Nlhuku inyu."