1 Yamalheke, Apwiiya Nlhuku yaheerelha ashinna Musa wiira, 2 "Anottwara alha phi malheheriyo anomwaacha ntu o makutulha, nihuku no uttukuriya wawe. Alhamakaru, eehaniyeke opochera ishaani, 3 ni ayo arweeke ammweheke yoyo ntu uyo uchereshere nikambi uwo. Yakhalhaka makutulha ayo aholhama, 4 paahi, opochera ishaani alhehereke wiira attu aawiihe ashinuni elhi akumi anorumelhelhiya umihoolho wa Apwiiya Nlhuku, ikipande yo mwiri wo mwerezi, nttoche no irangi yo khwiilha, ni nritta wo mwiri wo ihisopo, wo nlhatu no yoyo ntu nothanana uttukuriya uyo. 5 Yamalhakaru, opochera ishaani alhehereke wiira mwaanuni mmoka ahithiyeke nnyoopweni nrii ni maashi oombone o umaraponi. 6 Yamalhaka vavawo, opochera ishaani ankusheke mwaanuni nkina ri nkumi ulhe, ikipande yo mwiri wo mwerezi, nttoche no irangi yo khwiilha ilhe ni nritta no mwiri wo ihisopo, ni uruwiaa chonkhaye mphomeni mwo mwaanuni hithiye ulhe. 7 Yathamaka vavawo, ammichamichereke iphome iyo mikwaha saba ntu nottukuriya uyo. Amalhihaka, anhimiacheke yoyo ntu uyo wiira vano noorumelhelhiya wo iphiro cho waalhapelha Apwiiya Nlhuku. Yamalhaka vavawo, anhiyerereke mwaanuni nkumi ulhe avaveke arweeke wiithuphini.

8 "Ni ntu ttukuriye uyo apuputteke ikuwo chawe, owulheke ikharari chawe ni urapa. Amalhihakaru, ahokolhieke vawani, nansho akhalheke vathe wo nihema nawe wo mahuku saba. 9 Nihuku no saba owulheke tho ikharari chawe chonkhaye, irori, makhwikwi ni ikharari chikina chonkhaye. Yamalhaka apuputteke ikuwo chawe ni urapa, ni uyo noopocheriya ni attu awe.

10 "Nihuku no nane awiiheke ikhondoro chilhopwana piilhi cho uhiremara, ikhondoro ithiyana yo iyaakha imoka yo uhiremara, ikilo ttaaru cho iphepa yo ushilhia ithakanihiye ni makhura wo nlhatu no ukumiha isadaka yo choolhia vamoka ni makhura ikikombe imoka ikani. 11 Opochera ishaani anohalha unttukuria yoyo ntu uyo ammwiiheke umihoolho wa Apwiiya Nlhuku vanaatameria nlhako wo Nihema Nitakatifu, vamoka ni chittu chiwiihilhe awe. 12 Opochera ishaani akusheke ikhondoro ilhopwana imoka ni ukumiha isadaka yo uthamiha uwonya vamoka ni makhura ikikombe imoka ikani. Atheesheke ni wooniha wiira hokumiha isadaka umihoolho wa Apwiiya Nlhuku. 13 Yamalhakaru, ahitheke ikhondoro iyo vakittu vatakatifu, vanohithelhiya ashinama o isadaka yo uthamiha uwonya ni isadaka yo waathanihiya. Thoko chiri aya isadaka yo uthamiha uwonya, ni ikina ilha phi yawaya opochera ishaani, phi isadaka itakatifu chinene. 14 Opochera ishaani akusheke iphome vakani yo isadaka yo uthamiha uwonya iyo ni unhika ntu nottukuriya uyo indewe yo nnyaru nawe no wiimonono ni nikokho nuulhupalhe no moono awe wo wiimonono ni nikokho nuulhupalhe no mweto awe wo wiimonono. 15 Yamalhaka, opochera ishaani akusheke makhura vakani o ikikombe imoka yo makhura alhe, ni uhelha nthatha naya no wiimushi. 16 Ahikeke yayo makhura ayo nikokho naya no wiimonono, ni unnyunyihera ntu nottukuriya uyo mikwaha saba nari umihoolho wa Apwiiya Nlhuku. 17 Akusheke makhura anohalha munthathani ayo, ni unhika yoyo ntu nottukuriya uyo indewe yo nnyaru nawe no wiimonono ni nikokho nawe nuulhupalhe no moono wo wiimonono ni nikokho nuulhupalhe no mweto awe wo wiimonono, vavalhe vakittu vanhikhilhe aya iphome yo isadaka yo uthamiha uwonya valhe. 18 Akusheke makhura ahanlhe alhe ni unhika yoyo ntu uyo mmuruni. Wo yeyo iphiro iyo, opochera ishaani anompangelha aya ittu yo waathanihiya umihoolho wa Apwiiya Nlhuku.

19 "Yamalhakaru, opochera ishaani akumiheke isadaka yo uthamiha uwonya ni umpangelha yoyo ntu nottukuriya uyo ittu yo waathanihiya wiira arumelhelhiye ni Apwiiya Nlhuku. Amalhihaka chiicho, ahitheke ikhondoro yo isadaka yo upahiya iyo, 20 ni ukumiha isadaka yo upahiya vamooroni ni isadaka yo iphepa vachulhu madhubahu. Paahi etu, opochera ishaani anompangelha yoyo ntu uyo ittu yo waathanihiya, ni uyo noottukuriya ni urumelhelhiya wo iphiro cho waalhapelha Apwiiya Nlhuku.

21 "Nansho yakhalhaka yoyo ntu uyo mmashikini, khanooria ukumiha chechiyo chittu chiyo, paahi amwiiheke mwaakhondoro mmoka nlhopwana, ukhalha ittu yo ulhivelhelhiha isadaka yo uthamiha utteka. Awiiheke chiicho ikilo imoka yo iphepa yo shilhia ithakanihiye ni makhura wo nlhatu no isadaka yo choolhia ni makhura o izeituni ikikombe imoka ikani. 22 Tho, awiiheke machiya meelhi ama makhandi meelhi o ikhunda thoko chinooria awe. Mmoka akhalheke o nlhatu no isadaka yo uthamiha uwonya ni nkina wo nlhatu no isadaka yo upahiya.

23 "Nihuku no nane, aawiihereke opochera ishaani chechiyo chittu chiyo uhoolho wo nlhako wo Nihema Nitakatifu wo nlhatu wo uttukuriya waya umihoolho wa Apwiiya Nlhuku. 24 Opochera ishaani ankusheke yoyo mwaakhondoro nlhopwana o isadaka yo uthamiha uwonya uyo vamoka ni makhura ikikombe imoka ikani alhe ni utheesha wooniha wiira chihokhalha isadaka umihoolho wa Apwiiya Nlhuku. 25 Anhitheke mwaakhondoro nlhopwana o isadaka yo uthamiha utteka uyo, ni ukusha iphome ikina ni unhika yoyo ntu nottukuriya uyo indewe yo nnyaru nawe no wiimonono, nikhoko nuulhupalhe no moono awe wo wiimonono ni nikokho nawe nuulhupalhe no mweto awe wo wiimonono. 26 Amalhihaka, amiineke makhura makina vanthathani waya wo wiimushi, 27 ni unnyunyihera yoyo ntu uyo wo nikokho naya no wiimonono makhura vakani arii nthatha naya no wiimushi mikwaha saba umihoolho wa Apwiiya Nlhuku. 28 Opochera ishaani anhikeke yoyo ntu nottukuriya uyo, makhura nnyaru nawe no wiimonono, nikokho nawe nuulhupalhe no moono awe wo wiimonono, ni nikokho nawe nuulhupalhe no mweto awe wo wiimonono. Anhikeke vakittu vanhinke aya iphome yo isadaka yo uthamiha utteka valhe. 29 Makhura anohalha munthathani mwawe ayo anhikeke yoyo ntu uyo mmuruni wiira ampangelhe ittu yo waathaanihiya wawe umihoolho wa Apwiiya Nlhuku. 30 Opochera ishaani amalhihaka vavawo, akusheke nchiya nimoka no machiya meelhi alhe ama makhandi o ikhunda thoko yoyo ntu uyo chinooria awe uwiiha. 31 Nchiya nimoka nikhalheke wo nlhatu no isadaka yo uthamiha uwonya ni nikina wo nlhatu no isadaka yo upahiya. Vamoka ni yayo, akumiheke isadaka yo choolhia, ni ayo opochera ishaani ampangelheke yoyo ntu uyo ittu yo waathanihiya umihoolho wa Apwiiya Nlhuku. 32 Yayo phi malheheriyo nohalha awe upanga ntu rii ni makutulha hinooria ukumiha isadaka chinothananiya wiira attukuriye."

33 Apwiiya Nlhuku nkayeerelha ashinna Musa ni Naharuni, 34 "Alha phi malheheriyo vanohalha inyu ukelha ilhapo yo Ukanaani, ilhapo kinoovahaakani ukhalha yawinyu. Vanohalha inyu ukhalha vawo, ni mii nkakaawiiha ikutihi inohalha ukelha imoka yo manupa inyu, 35 paahi mwanene yeyo inupa iyo oonakaru, anhimerieke opochera ishaani wiira ittu thoko ikutihi ihoonia unupani wawe. 36 Paahi opochera ishaani alhehereke wiira chittu chonkhaye chithamihiyeke nnupani mmo ahinaaya urwaa ni uwehaweha, chihiwe chonkhaye chaahimiya wiira chihonanara. 37 Yamalhaka opochera ishaani akelheke ni uwehaweha yeyo inupa iyo. Yakhalhaka ikutihi iyo yoonelhe ushirini ni weesha manepanepa o irangi yo kijani ikithi ama yokhwiilha ni woniaa wiira ahoneelha nshirini, 38 paahi opochera ishaani akhumeke vathe vanlhakoni ni uttia yeyo inupa iyo wo mahuku saba. 39 Nihuku no saba opochera ishaani ahokolhieke ni uwehaweha tho inupa iyo. Yakhalhaka ikutihi ihowanelha ishiri cho yeyo inupa iyo, 40 opochera ishaani alhehereke wiira mattupi akelhiye ikutihi ayo aphomolhiye ni urihelhiya vakittu vanorihelhiya chittu cho uhilhoka uchereshere iwani. 41 Ittaya ishiringiye yeyo inupa iyo, ni iyo iphomolhiyeke ni urihelhiya vakittu vanorihelhiya chittu cho uhilhoka uchereshere iwani. 42 Yamalhaka akusheke mattupi makina ni utheka vakittu vaphomolhiye vawo, ni ushiringa ittaya ikina yeyo inupa iyo tho.

43 "Yakhalhaka ikutihi iyo inookhumelhelha tho kaanyuma baada yo uphomolhiya mattupi ni ukwangiya ishiri iyo ni ushiringiya tho, 44 opochera ishaani aweeke ni uwehaweha tho inupa iyo. Yakhalhaka ikutihi ihowanelha yeyo inupa iyo, paahi yeyo ikutihi yo wiiva, yeyo inupa iyo ihonanara, khinolhoka wo iphiro cho waalhapelha Apwiiya Nlhuku. 45 Iphomolhiyeke, mattupi, miri chaathekelhiye ni ittaya yaashiringelhiye chirweehiyeke vakittu vanorihelhiya chittu cho uhilhoka uchereshere iwani. 46 Ni vavawo, ntu riyoothe nohalha ukelha nhina yeyo inupa iyo ikatema vanohalha aya utteiya vawo, honanara, khanorumelhelhiya wo iphiro cho waalhapelha Apwiiya Nlhuku mpaka uchechilho. 47 Ntu riyoothe norupa yeyo inupa iyo ama ulhelhia yolhia nhina mwaya, apuputteke ikuwo chawe.

48 "Nansho yakhalhaka baada yo uwehaweha yeyo inupa iyo, opochera ishaani oonaka wiira ikutihi khinawanelha baada yo ushiringiya, paahi ahimiacheke wiira yeyo inupa iyo ihokhalha yoombone ukhalhawaya ikutihi khinoonia tho. 49 Wo uthanana uttukuria yeyo inupa iyo, mwanene inupa uyo aawiiheke ashinuni eelhi vamoka ni ikipande yo mwiri wo mwerezi, nttoche no khwiilha, ni nritta no mwiri wo ihisopo. 50 Opochera ishaani anhithelheke mwaanuni mmoka nnyoopweni nrii maashi oombone o unraponi. 51 Amalhihaka, akusheke ikipande yo mwiri wo mwerezi, yo mwiri wo ihisopo ni nttoche no khwiilha no mapururu o ikhondoro ilhe vamoka ni mwaanuni nkina rii nkumi ulhe ni uruwiaa chonkhaye mphomeni mwo mwaanuni hithiye ulhe. Yamalhaka amichereke iphome yeyo inupa iyo mikwaha saba. 52 Wo yeyo iphiro iyo, phi nohalha aya uttukuria yeyo inupa iyo wo iphome yo mwaanuni, maashi oombone o unraponi, mwaanuni nkumi, ikipande yo mwiri wo mwerezi, yo mwiri wo ihisopo ni nttoche no khwiilha nne. 53 Amalhihaka, anhiyerereke mwaanuni nkumi ulhe arweeke uchereshere iwani. Wo chiichammo etu, phi nohalha aya uttukuria yeyo inupa iyo, ni iyo inookhalha yoombone wiira attu akhalhe mwommo.

54 "Alha etu phi malheheriyo anaacha ikutihi iriyoothe inowiiha ureta wo makutulha, 55 ikutihi yo nkuwoni ama mmanupani, 56 cho wiipelha, mapotte ama mavaathelha, 57 wooniha wiira phi ittu yaani inorumelhelhiya ama ihinorumelhelhiya wo iphiro cho unlhapelha Nlhuku. Yayo phi malheheriyo anaacha ureta wo makutulha ni ikutihi."