1 Yamalheke, Apwiiya Nlhuku yaheerelha ashinna Musa wiira, 2 "Mwaahimerie attu o Israeli wiira, yakhalhaka ntu ahottuka ishaani yo waakumihera Apwiiya Nlhuku ntu wo unhika makhura, yoyo ntu uyo athaphulheke ishaani awe wo ulhiva nchurukhu uromolhiye, thoko chinolhikaana aya. 3 Nlhopwana o iyaakha makhumi meelhi mpaka makhumi sita oopolhiyeke wo isiliva ivipande makhumi nthanu, wo ulhikaana ni maphimelhiyo o Nihema Nitakatifu. 4 Yakhalhaka nthiyana, oopolhiyeke wo isiliva ivipande makhumi mararu. 5 Yakhalhaka yoyo ntu uyo o iyaakha uchokholha iyaakha nthanu mpaka makhumi meelhi oopolhiyeke wo isiliva ivipande makhumi meelhi, ni akhalhaka mmirawo oopolhiyeke wo isiliva ivipande makhumi meelhi, ni akhalhaka mwalhi isiliva ivipande khumi. 6 Yakhalhaka mwaana o mweeri mmoka mpaka iyaakha nthanu, oopolhiyeke wo isiliva ivipande nthanu akhalhaka mwanlhopwana. Ni akhalhaka mwanthiyana isiliva ivipande ttaru. 7 Akhalhaka yoyo ntu uyo iyaakha chawe chihothepa iyaakha makhumi sita, oopolhiyeke wo isiliva ivipande khumi ni nthanu akhalhaka nlhopwana, ni akhalhaka nthiyana isiliva ivipande khumi.

8 "Nansho akhalhaka yoyo ntu uyo mmashikini hinooria ulhiva nhakhu awe, paahi yoyo ntu uyo arweehiyeke wa opochera ishaani. Opochera ishaani aphimeke wo ulhikaana ni wooria wo yoyo ntu ttunke ishaani uyo.

9 "Yakhalhaka ishaani ene inaacha mwannama anonkumiha aya attu isadaka wa Apwiiya Nlhuku, paahi yoyo mwannama uyo nookhalha ittu itakatifu. 10 Khinothananiya umwakakaniha yoyo mwannama uyo ni nkina riyoothe, orera ni onanara ama onanara ni orera. Yakhalhaka anomwaakakaniha ni mwannama nkina, onkhaye oyeelhi anookhalha atakatifu, awaya Apwiiya Nlhuku. 11 Nansho yakhalhaka yeyo ishaani iyo inomwaacha mwannama hinorumelhelhiya wo iphiro cho waalhapelha Apwiiya Nlhuku, paahi ntu nkuminhe uyo ammwiiheke wa opochera ishaani, 12 ni opochera ishaani ayo anooromolha ibei wo ulhikaana ni urera wawe. Iphiro chinohalha aya uromolha opochera ishaani, phi chechiyo chinohalha aya ukhalha. 13 Nansho yakhalhaka mwanene nothanana umwoopolha, paahi oncherereke nifungu nimoka no mafungu nthanu o ibei yo mwannama uyo.

14 "Ntu akumihaka inupa awe wa Apwiiya Nlhuku, opochera ishaani aamulheke wo ulhikaana ni urera ama uhirera waya. Ibei inohalha aya uromolha phi nohalha aya ukhalha chiicho. 15 Yakhalhaka yoyo ntu kumihilhe inupa wa Apwiiya Nlhuku uyo nothanana woopolha yeyo inupa iyo, paahi oncherereke nifungu nimoka no mafungu nthanu no ibei aya, ni iyo inookhalha yawawe.

16 "Yakhalhaka ntu noomia imata awe ihiyeriye awe, ni ukumiha wa Apwiiya Nlhuku, paahi ibei aya iphimiyeke wo ulhikaana ni imbeyu chinaalhiya yeyo imata iyo, wo kila ikilo makhumi meelhi o ishayiri ibei aya ikhalheke isiliva makhumi nthanu. 17 Akumihaka wa Apwiiya Nlhuku imata awe iyaakha yo isikukuu yo wuupusheriya iyaakha yo makhumi nthanu, ibei aya inothananiya wiira ilhikaaneke ni maphimelhiyo inyu. 18 Nansho yakhalhaka nokumiha yaviraka yeyo iyaakha iyo, paahi opochera ishaani aamulheke ibei aya wo ulhikaana ni iyaakha chihanlhe uphiyelha iyaakha yo wuupusheriya iyaakha yo makhumi nthanu ni ibei aya iwukulhiyeke. 19 Yakhalhaka mwanene noothanana woopolha, paahi nothananiya wiira oncherereke nifungu nimoka no mafungu nthanu o ibei yo yeyo imata iyo, ni iyo inookhalha yawawe. 20 Nansho aahittuneke woopolha ama yakhalhaka opochera ishaani ahonthumihera ntu nkina, paahi yeyo imata iyo ihoopolhiye tho mena. 21 Iyaakha yo wuupusheriya iyaakha yo makhumi nthanu, yeyo imata iyo inoohiyereriya ni ukhalha ya Apwiiya Nlhuku, ni uvahiya opochera ishaani.

22 "Yakhalhaka ntu nookumiha wa Apwiiya Nlhuku imata ithumme awe, yaani kihiwe ya ashilhoko awe, 23 opochera ishaani aromolheke ibei yo yeyo imata iyo wo ulhikaana ni iyaakha ihanlhe uphiyelha iyaakha yo wuupusheriya iyaakha yo makhumi nthanu. Yoyo ntu uyo alhiveke nenno nihuku ibei aya, thoko ittu itakatifu wa Apwiiya Nlhuku. 24 Nansho iyaakha yo wuupusheriya iyaakha yo makhumi nthanu, yeyo imata iyo ahokolhosheriye ntu athumihilhe ulhe.

25 "Kila ibei iphimiyeke wo ibei iromolhiye u Nihema Nitakatifu, ulhemelha wo igera makhumi meelhi unolhikaana ni ulhemelha wo isiliva imoka.

26 "Nhikumihe nttara no mwannama. Wo ikekhiaye yoyo homalha ukhalha awaya Apwiiya Nlhuku, ikhalhe ing'ope ama ikhondoro. 27 Akhalhaka mwannama uyo khanorumelhelhiya wo waakumihera isadaka Apwiiya Nlhuku, ntu mwanene uyo anthumeke wo ulhiva ibei yonkhaye ni wuncherera nifungu nimoka no mafungu nthanu o ibei yo yoyo mwannama uyo. Yakhalhaka khanoopolhiya, paahi athumihiyeke wo ulhikaana ni ibei yeeshiye.

28 "Nansho ittu iriyoothe ikumihiye wa Apwiiya Nlhuku, ikhalhe ntu, ama mwannama ama ittu yo uhiyeriya, khinothumihiya wala woopolhiya. Ittu iriyoothe ikumihiye wa Apwiiya Nlhuku phi ittu itakatifu chinene. 29 Khaawo ntu riyoothe hukumulhiye wiiviya wo upanga ittu yo uhilhoka umihoolho waka, nohalha woopolhiya, eeviyeke.

30 "Nifungu nimoka no mafungu khumi o chittu cho mmatani, nikhalhe choolhia ama maphepu o miri, chonkhaye chawaya Apwiiya Nlhuku, phi chitakatifu wa Apwiiya Nlhuku. 31 Ni yakhalhaka ntu nothanana woopolha nifungu nimoka no mafungu khumi nikumihilhe awe nno, alhiveke ibei aya ni wuncherera vachulhu nifungu nimoka no mafungu nthanu o ibei aya iyo. 32 Vanaalhakelha inyu mihuwo, kila mwannama o khumi phi ntakatifu, awaya Apwiiya Nlhuku. 33 Ni ntu hiwehewehe wiira yoyo mwannama uyo orera ama onanara, ni mena yoyo mwannama uyo haakakhanihiye ni nkina. Aakakhanihiyaka ni nkina, ashinama onkhaye oyeelhi anookhalha a Apwiiya Nlhuku, anookushiya, khanooria woopolhiya."

34 Yayo phi malheheriyo a Apwiiya Nlhuku yaalheheriye attu o Israeli, umwaakoni Usinai wo iphiro ya ashinna Musa.