1 "Nhikooroshe isinyago cho milhuku cho woothachiya, nhivare isinyago chaya cho uhemiya wala mikurio wala isinyago cho malhuku ahemiye velhaponi winyu ni wooromelha. Mii phi Apwiiya Nlhuku inyu. 2 Nvarechesheke Nihuku no Wiittuwa naka ni uthimicha Nihema Nitakatifu naka, vanokilhapelha inyu. Mii phi Apwiiya Nlhuku inyu.

3 "Mwattwaraka malhehero aka ni urumelhelha malheheriyo aka, 4 kinoorupiha ipulha iyiitha, wiira ilhapo iruwerie choolhia chinchi, ni miri cho mmamatani chinooyara maphepu aya. 5 Nnoothepa ukhungura choolhia mpaka nlhalha wo urukulha izabibu, ni nlhalha wo izabibu unoothepa mpaka ikatema yo waalha imbeyu. Ni inyu nnolhia yolhia inothanana inyu ni ukhalha wo mpuha velhaponi.

6 "Nnookhalha wo mpuha velhaponi winyu, ni inyu nnoorupa wo uhikhalha ntu riyoothe o uwoopopihani. Kinoothamiha mashene velhaponi, ni ilhapo inyu khinaatakana ikhoto. 7 Nnowoomolha amalhaponi inyu ni weeva wo uphanga. 8 Attu athanu munlhokoni mwinyu anowoomolha amalhaponi imia imoka, ni attu imia imoka munlhokoni mwinyu anowoomolha amalhaponi maelufu khumi. Amalhaponi inyu anoowulhuwa umihoolho winyu wo uphanga. 9 Kinouvahani ibarakha wiira mwaapatte achishaana enchi ni wunchereria, ni mii kinoolhipiha malhehano kilhenhe aka uwannyu mwaatti. 10 Nnooruweria choolhia chinchi, ni nlhalha wo ukhungura bado nnoothepa ulhia choolhia chishunnge inyu mmakhupini. Tho, nnookukhulhulha choolhia chihanlhe mmakhupini, wiira mpatte nipesha no uhelha choolhia cho naanano. 11 Kinookhalha munlhokoni mwinyu mu Nihema Nitakatifu naka, akinoohiyani mena. 12 Kinoweeta iriyari inyu, kinookhalha Nlhuku inyu ni mwaattiva nnookhalha attu aka. 13 Mii phi Apwiiya Nlhuku, kuuthaminheni ilhapo yo Umisri wiira nhikhalhe ipotta cho Umisri. Mii kihouthaphulhani nikongwa noutwarushani, ni uweetihani wo wookwaa."

14 Apwiiya Nlhuku nkayeera tho, "Nansho mwaahikiwelhelheke wala uttwara malheheriyo onkhaye alha, 15 ni mwaakhotaka malhehero aka ni uhiya wiinanelha malheheriyo onkhaye ni wuntha malhehano aka, 16 paahi mii kinowaatani. Kinouwiiherani mariro molhupalhe wo ghafula ni inyu nnowoova, mareta molhupalhe ni ikwerere chihineewa nrete, chinohalha uttukani miitho nhoone ni uwootihani. Nnowaalha imbeyu chinyu nansho khannopatta ittu ukhalhawaya amalhaponi inyu phi nohalha ulhia. 17 Mii kinoorukunuwa ni uhiyani ni inyu nnowaatiya ni amalhaponi inyu, nnootawariya ni attu anoovengani alhe. Nnowoopopihiya ni uttawa, hikhalhaka ntu riyoothe nootoporani.

18 "Ni yakhalhaka bado khannokiiwelhelha ata baada yo wowo utwarushiya uwo, paahi kinoothepiha chinene ntwarusho ninyu mikwaha saba, wo nlhatu no uwonya winyu. 19 Kinoopwesha itiyamaru inyu, ni irimu yo uchulhu winyu iyo inoolhipa thoko iyuuma. Ipulha khinowa yaarupa, ni ilhapo inookhalha yo ulhipa thoko ishaaba. 20 Nnoopanga chittu wo machiri inyu wo uhipatta ittu ukhalhawaya imata chinyu khachinowa chemma choolhia ni ilhapo khinoyara maphepu.

21 "Mwathepaka ukivaanyiha ni ukhota ukiiwelhelha, kinoothepiha utwarushiya winyu mikwaha saba, wo ulhikaana ni winchiva wo uwonya winyu. 22 Kinowawiiha mashene munlhokoni mwinyu anohalha waakhuura achishaana inyu, ni wiivakacha mihuwo chinyu, ni uwukulhani mpaka mitalha chinyu khachinowa choonia attu, ni ukhalha thoko uthako.

23 "Yakhalhaka ata baada yo wowo utwarushiya uwo khannokihokolhelha mii, nansho nthepaka ukivaanyiha, 24 paahi ni mii kinoovengana ni inyu, ni utwarushani chinene mikwaha saba wo nlhatu no uwonya winyu. 25 Kinouwiiherani ikhoto inohalha ulhivelhelhiha mwaha wo malhehano ahiilhe inyu uttwara. Mwattawelhaka mmawani mwinyu, kinouwiiherani mareta ahineewa nrete, ni inyu nnoovarakachiya ni amalhaponi inyu. 26 Kinoowukulha yoolhia inyu, mpaka manyaathiyana khumi anowa uterekha niikho nimoka tu woosha mikatte chonkhaye ni ukawelhani vakani vakani. Ni ata mwalhiaka, khannowona.

27 "Ni yakhalhaka baada yo yayo onkhaye ayo khannokiiwelhelha nkamwaathepa ukiivanyiha, 28 paahi ni mii kinouvingani inyu wo urushiya chinene, ni utwarushani chinene mii kimwanene mikwaha saba wo nlhatu no uwonya winyu. 29 Ithalha inowa uthepa chinene, ni inyu nnoowa mwaakhura achishaana inyu ashilhopwana ni ashithiyana. 30 Kinootanganyacha mapuro inyu o ulhapelhelha umiakoni, kinoophomolha madhubahu inyu o ututumihera ubani ni urihelha mitembo chinyu vachulhu isinyago cho milhuku chinyu. Ni mii kinouvengani chinene. 31 Kinorimeelhiha iwani chinyu, kinorimeelhiha vakittu vatakatifu vanolhapelha inyu, vakhalhe mathalha, ni mahiriri inyu o nukhelha o isadaka chinyu khanorumelhelhiya mena. 32 Kinoopaha mooro ilhapo inyu wiira ata amalhaponi anohalha uthamelha mwommo ayo anooshanga. 33 Kinowiiha ikhoto mwiilhaponi winyu ni umwarushachani mwaattiva wa attu o ilhapo chikina, ni waalhehera amalhaponi inyu owoomolhachekeni wo uphanga. Ilhapo inyu inookelhiya nipoohu ni iwani chinyu chinookhalha mathalha.

34 "Mwaattiva vanohalha inyu ukhalha mmathathani mwa amalhaponi inyu, vavawo ilhapo phi nohalha aya uchivelhiya nihuku no wiittuwa waya ikatema vanohalha aya ukelhiya nipoohu. Ilhapo inowiittuwa ni uchivelhiya nihuku naya no wiittuwa. 35 Ikatema yonkhaye vanohalha aya ukelhiya nipoohu, inowiittuwa, wiittuwa uhinapacha ukhalha vaari inyu nkhalhaka mwommo.

36 "Ni akina inyu anowa uhalha ayo, kinowaapanga akhalhe owoova munrimani mwaya, mwiilhaponi mwa aya amalhaponi aya, ata nthaakhuru namoraka ninowaattawiha. Anoottawa thoko ntu nottawa ikhoto, ni uwulhuwa inakhalhaka khaawo ntu naatoporaniha. 37 Anoowulhuwelhana pufia thoko ntu nottawa ikhoto inakhalhaka khaawo ntu naatoporaniha. Paahi khannowa mwaakhalha ni machiri ariyoothe o weemelha umihoolho wa amalhaponi inyu. 38 Nnookhwelha mwiilhaponi mwa amalhaponi inyu, ni uvithiya wowo. 39 Akina inyu anohalha uhalhelha velhaponi ayo, anookhwa vakani vakani wo nlhatu no uwonya waya, ni wo nlhatu wo uwonya wa manyaathumwanaya.

40 "Nansho akhoromaka uwonya waya ni uwonya wa manyaathumwanaya, yaakikhonte ni ukiwonya, 41 nkakaarukunuwa ni waahelha mmathathani wa amalhaponi aya. Ni mirima chaya cheetimarikhaka, ni ukhoroma uwonya ni ukikhota waya, 42 kinoowa koopuwelha malhehano kaalhupenlhe aka Aburahimu, Naisaka ni Nayakhobo ni wuupuwelha ilhapo yaavanhe aka ilhe. 43 Wo upacha, yayo ahinaaya ukhumelhelha, attu aka anowa ukhalha uchereshere ilhapo aya, ni yeyo ilhapo iyo inoowa yaateelhiya vanohalha aya ukhalha ni nipoohu. Yeyo ikatema iyo, ayo anowa ukhoroma uwonya waya, waapannge aya wo uhiya ulhoha malhehero aka ni uhivarechesha malheheriyo aka. 44 Nansho vamoka ni yayo onkhaye ayo, vanohalha aya ukhalha ilhapo ya amalhaponi aya vawo, mii akinaariha wala waavenganana, wiira kaarimeelhihe ni uhiya malhehano aka. Ukhalhawaya mii phi Apwiiya Nlhuku aya. 45 Nansho wo nlhatu waya, kinoowa koopuwelha malhehano apannge aka ni manyaathumwanaya vaathaminhe aka ilhapo yo Umisri, attu o ilhapo chikina oonecheshaka wiira mii kikhalhe Nlhuku aya. Mii phi Apwiiya Nlhuku."

46 Yayo phi malhehero, malheheriyo ni ikano cha Apwiiya Nlhuku chaavanhe aya attu o Israeli umwaakoni Usinai ulhe wo iphiro ya ashinna Musa.