1 Apwiiya Nlhuku nkayeerelha ashinna Musa ni Naharuni tho wiira, 2 "Mwaahimerie attu o Israeli, wiira nlhopwana riyoothe akhumaka uwooru, uwooru uyo uhonnanariha, khanorumelhelhiya wo iphiro cho waalhapelha Apwiiya Nlhuku. 3 Wakhumaka ama wakhalhaka nhina, baado khanorumelhelhiya wo iphiro cho waalhapelha Apwiiya Nlhuku. Unyalha uwo unohalha umpanga ntu wiira, 4 ikori iriyoothe inohalha awe urupelha ama ukhalhelha, khinorumelhelhiya wo iphiro cho unlhapelha Nlhuku. 5 Ntu riyoothe nohalha uvara ikori awe yoyo ntu uyo, apuputteke ikuwo chawe ni urapa, ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho. 6 Ntu riyoothe nohalha ukhalhelha ittu iriyoothe ikhalhenlhe awe yoyo ntu nokhumiya uwooru uyo, apuputteke ikuwo ni urapa ni uyo noonyalha, khanorumelhelhiya wo iphiro cho waalhapelha Apwiiya Nlhuku mpaka uchechilho. 7 Ntu riyoothe nohalha ummara ntu nokhumiya uwooru, apuputteke ikuwo chawe ni urapa, ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho. 8 Ntu riyoothe ashuwelhiyaka ishenye ni ntu nokhumiya uwooru, yoyo ntu shuwelhiye ishenye uyo apuputteke ikuwo chawe, ni urapa ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho. 9 Chittu chiriyoothe cho ukhalhelha chinaathalhiya vachulhu mwannama, chikhalhelhiye ni ntu nokhumiya uwooru khachinorumelhelhiya wo iphiro cho waalhapelha Apwiiya Nlhuku mpaka uchechilho. 10 Ntu riyoothe nohalha uvara ittu iriyoothe ikhalhenlhe awe ntu uyo, noonyalha, khanorumelhelhiya wo iphiro cho waalhapelha Apwiiya Nlhuku mpaka uchechilho. Ni ntu riyoothe akushaka chechiyo chittu chikhalhelhiye chiyo, yoyo ntu uyo noonyalha, apuputteke ikuwo chawe ni urapa, ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho. 11 Yakhalhaka ntu riyoothe nokhumiya uwooru nommara ntu wo uhinyawa thoko miono chawe ama urapa, variye uyo noonyalha, khanorumelhelhiya wo iphiro cho waalhapelha Apwiiya Nlhuku mpaka uchechilho. 12 Ittu iriyoothe yuupiye ni ulhoko yavariyaka ni ntu nokhumiya uwooru ipweshiyeke. Nansho ittu iriyoothe ikooroshiye wo imbau ihapihiyeke ni maashi.

13 "Nlhopwana riyoothe nokhumiya uwooru alhamaka ureta awe, yoyo ntu uyo akhalheke mahuku saba hinaya uttukuriya. Apuputteke ikuwo chawe ni urapa maashi o umwolhokoni, ni uyo noorumelhelhiya wo iphiro cho waalhapelha Apwiiya Nlhuku. 14 Nihuku no nane awiiheke machiya meelhi ama ikhunda piilhi umihoolho wa Apwiiya Nlhuku untenjeni u Nihema Nitakatifu ni waavaha opochera ishaani. 15 Opochera ishaani anowaakumiha yayo, mmoka wo nlhatu no isadaka yo uthamiha uwonya ni nkina wo nlhatu no isadaka yo upahiya vamooroni, ni ayo opochera ishaani anompangelha yoyo ntu uyo ittu yo waathanihiya umihoolho wa Apwiiya Nlhuku ni unttukuria wiira arumelhelhiye wo iphiro cho waalhapelha Apwiiya Nlhuku, wo nlhatu wo ukhuma wawe uwooru.

16 "Yakhalhaka nlhopwana hokhumiya ikhanja chawe, arapeke maashi iruttu yonkhaye, ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho. 17 Ikuwo iriyoothe ama ikuwo ikooroshiye wo nrapalha inomorelhiya ikhanja inoonyalha, ipuputtiyeke, ni iyo khinorumelhelhiya wo iphiro cho waalhapelha Apwiiya Nlhuku mpaka uchechilho. 18 Yakhalhaka nlhopwana noorupa ni nthiyana, nkaakhumiya ikhanja, paahi onkhaye oyeelhi arapeke maashi, ni ayo khanorumelhelhiya wo iphiro cho waalhapelha Apwiiya Nlhuku mpaka uchechilho.

19 "Nthiyana riyoothe vanoona awe mahuku awe noonyalha, khanorumelhelhiya wo iphiro cho waalhapelha Apwiiya Nlhuku mahuku saba. Ni ntu riyoothe nohalha ummara yoyo nthiyana uyo noonyalha, khanorumelhelhiya wo iphiro cho waalhapelha Apwiiya Nlhuku mpaka uchechilho. 20 Ittu riyoothe inorupelha awe ama ukhalhelha vari awe ni yayo mahuku ayo, khinorumelhelhiya wo iphiro cho waalhapelha Apwiiya Nlhuku mpaka uchechilho. 21 Ntu riyoothe nohalha uvara ikori awe yoyo nthiyana uyo noonyalha, apuputteke ikuwo chawe ni urapa maashi, ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho. 22 Ntu riyoothe nohalha uvara ittu iriyoothe inokhalhelha awe yoyo nthiyana uyo apuputteke ikuwo chawe ni urapa maashi, ni uyo khanorumelhelhiya wo iphiro cho waalhapelha Apwiiya Nlhuku mpaka uchechilho. 23 Nlhopwana riyoothe nohalha uvara ittu iriyoothe irupenlhe awe ama ikhalhenlhe awe yoyo nthiyana uyo noonyalha, khanorumelhelhiya wo iphiro cho waalhapelha Apwiiya Nlhuku mpaka uchechilho. 24 Yakhalhaka nlhopwana noorupa ni yoyo nthiyana uyo ni iphome ya nthiyana uyo yammorelhaka nlhopwana uyo, paahi, nlhopwana uyo noonyalha, khanorumelhelhiya wo iphiro cho waalhapelha Apwiiya Nlhuku wo mahuku saba ni ikori inorupelha awe yo inoonyalha.

25 "Yakhalhaka nthiyana nookhumiya iphome wo mahuku menchi upwaha chiri aya malhemalhelho, ama nookhumiya iphome ihinaaya ikatema awe yo ukhuma iphome, paahi noonyalha. Ikatema yonkhaye inokhuma awe iphome khanorumelhelhiya wo iphiro cho waalhapelha Apwiiya Nlhuku, thoko chinokhalha aya mahuku awe o malhemalhelho. 26 Ikori iriyoothe inorupelha awe ama ihiche inokhalhelha awe yeyo ikatema iyo inoonyalha, khinorumelhelhiya wo iphiro cho waalhapelha Apwiiya Nlhuku thoko chinokhalha aya mahuku awe o malhemalhelho. 27 Ntu riyoothe nohalha uvara chechiyo chittu chiyo, noonyalha ni apuputteke ikuwo chawe ni urapa maashi, ni uyo nookhalha chiicho mpaka uchechilho.

28 "Baada yo utondova ukhuma iphome, aweherereke thoko mahuku saba wiira akhalhe rata. 29 Nihuku no nane akusheke machiya meelhi ama makhandi meelhi o ikhunda ni waawiihera opochera ishaani vanlhakoni vo Nihema Nitakatifu. 30 Opochera ishaani anonkumiha mmoka wo nlhatu no isadaka yo uthamiha uwonya ni nkina wo nlhatu no isadaka yo upahiya. Wo yeyo iphiro iyo etu opochera ishaani anompangelha yoyo nthiyana uyo ittu yo waathanihiya umihoolho wa Apwiiya Nlhuku ni unttukuria unanara wawe wo ukhumiya iphome."

31 "Phi chiichammo chinohalha inyu waamuka attu o Israeli mwaha wo unanara, ahiwe yaananariha nipuro naka nitakatifu nirii munlhokoni mwaya. Ukhalhaka wiira, akelhakha mwommo anananre anowiiviya.

32 "Yayo phi malheheriyo wa nlhopwana nokhumiya uwooru ni nokhumiya ikhanja ni uhirumelhelhiya wo iphiro cho waalhapelha Apwiiya Nlhuku, 33 ni yayo malheheriyo ayo anokhalha chiicho wa nthiyana nokhuma iphome ni unanara. Tho anomwaacha nlhopwana ama nthiyana riyoothe nokhumiya ni ittu iriyoothe ni chiicho inomwaacha nlhopwana norupa ni nthiyana noona mahuku awe."