1 Apwiiya Nlhuku yaheehana ashinna Musa ni waarerihana u Nihema Nitakatifu, 2 nkayaalhehera malheheriyo o waahimeria attu o Israeli wiira,

"Ntu athananaka ukumiha isadaka yo mwannama wa Apwiiya Nlhuku, yoyo mwannama uyo anthanlheke ukhuma nkutiro awe wo ing'ope, wo ikhondoro ama wo ipuri.

3 "Yakhalhaka ntu nookumiha isadaka awe wo upahiya vamooroni, athanlheke ndume no mwannama o uhiremara ukhuma munkutironi mwawe. Akumihereke vakhiviru ni nlhako wo Nihema Nitakatifu wiira arumelhelhiye ni Apwiiya Nlhuku. 4 Eesheke moono awe vamuruni wo mwannama o isadaka yo upahiya, inothanana awe irumelhelhiye wo nlhatu no uthamiha uwonya wawe yoyo ntu uyo. 5 Yamalhaka ahitheke nenno nd'ume no ing'ope nno umihoolho wa Apwiiya Nlhuku. Ni ayo opochera ishaani o iyari i Naharuni anookusha iphome ni umichamicha vamadhubahuni mipata chonkhaye, vakhiviru ni nlhako wo Nihema Nitakatifu. 6 Amalhihaka, ankusheke yoyo mwannama o isadaka yo upahiya uyo ni unkhavan nrapalha ni untupulhacha ipilhipicha chinchi. 7 Ni yayo opochera ishaani o iyari i Naharuni ayo aphakeke ikhuni vachulhu madhubahu ni uparihelha vamooroni. 8 Yamalhaka, opochera ishaani o iyari i Naharuni ayo akusheke ivipande cho inama, muru ni makhura ni weesha vachulhu ikhuni vachulhu madhubahu vawo. 9 Ntu nokumiha isadaka uyo ahapiheke marupo ni mieto cho utulhi cho yoyo mwannama uyo wo maashi. Yamalhaka opochera ishaani apaheke isadaka vamadhubahuni. Yeyo phi isadaka yo upahiya wo mooro irii ni nihiriri noombone ninaachivelha Apwiiya Nlhuku.

10 "Yakhalhaka ntu nookumiha isadaka awe yo upahiya vamooroni iyo ukhuma nkutiro awe wo ikhondoro ama wo ipuri, paahi athanlheke n'dume no uhiremara variwoothe. 11 Anhithelheke mpata wo uchulhu wo madhubahu, umihoolho wa Apwiiya Nlhuku, ni opochera ishaani o iyari i Naharuni ayo anoomichamicha iphome vamadhubahuni mipata chaya chonkhaye. 12 Yamalhaka ntu uyo antupulhacheke ipilhipicha ni weesha muru vamoka ni makhura aya, ni opochera ishaani ayo yeesheke vamooroni vachulhu madhubahu vawo. 13 Nansho ntu uyo ahapiheke marupo ni mieto cho utulhi wo maashi. Opochera ishaani apaheke mpaka uvia chonkhaye chiyo vachulhu madhubahu vawo. Yeyo phi isadaka yo upahiya vamooroni yo nihiriri noombone ninaachivelha Apwiiya Nlhuku.

14 "Yakhalhaka nokumiha wa Apwiiya Nlhuku isadaka yo upahiya yo ashaanuni, paahi awiiheke isadaka yo nchiya ama nikhandi no ikhunda. 15 Opochera ishaani ammwiiheke yoyo mwaashanuni uyo umadhubahuni, anchipulheke muru awe ni umpaha vachulhu madhubahu. Iphome awe imichiyeke mpararini mwo madhubahu. 16 Athamiheke ithothohiro awe vamoka ni chittu cho unanara chaya ni urihelha mpata unosha nchuwa wo madhubahu unorihelhiya ituura. 17 Ammareke mapupha ni umphulha, nansho ahintupulhanihe ivipande piilhi. Yamalhaka opochera ishaani ampaheke vamadhubahuni, vachulhu ikhuni. Yeyo phi isadaka yo upahiya vamooroni yo nihiriri noombone ninaachivelha Apwiiya Nlhuku."