1 Apwiiya Nlhuku nkayeerelha ashinna Musa wiira, 2 "Mweemesheke Nihema Nitakatifu nno mwaahino, nihuku no upacha no mweeri wo upacha. 3 Nhina mmo, mweesheke Nisanduku no Malhehano, mwamalhihaka mweesheke nipaziya umihoolho waya. 4 Mweesheke imeza ni uphaka chittu chaya vachulhu vawo. Tho, mmwiiheke iphata ni uthomia ikhandiri chiyo vachulhu waya. 5 Mwamalhihaka, mweesheke madhubahu o ututumiheriya ubani umihoolho wo Nisanduku no Malhehano. Mwamalhihaka vavawo, nttukelhelheke nipaziya vanlhakoni wo Nihema Nitakatifu. 6 Tho, mweesheke madhubahu o upaheriya isadaka uhoolho wo nlhako wo Nihema Nitakatifu. 7 Mweesheke ni inyipo yuulhupalhe yo maashi o unyawa variyari wo Nihema Nitakatifu ni madhubahu, ni uchariha maashi. 8 Nttukelhelheke nipaziya no urukureria ntenje, ni uttukelhelha nipaziya vanlhakoni vawo.

9 "Mwamalhaka vavawo, nkusheke makhura o uhikiya ayo ni uhikahika Nihema Nitakatifu ni ikaruma chaya chonkhaye. Vavawo phi nohalha aya ukhalha nitakatifu. 10 Tho, nhikeke makhura madhubahu o ukumiheriya isadaka chinohalha upahiya ni ikaruma chinovarelhiya ntheko, ni iyo inookhalha itakatifu. 11 Tho, nhikeke makhura inyipo yulhupalhe iyo ni ikhalhelho aya iyo chiicho.

12 "Mwamalhihaka, mwaawiiheke Naharuni ni achishaana aya awaache vanlhakoni Nihema Nitakatifu vawo, mwaakhuchiheke maashi. 13 Mwaawariheke Naharuni ikuwo chitakatifu chilhe, mwaahikeke makhura ni waahelha utakatifu, wiira avare ntheko aka wo opochera ishaani. 14 Mweehanacheke achishaana aya ayo, mwaawariheke mikogo chaya chilhe. 15 Mwamalhihaka, mwaahikeke makhura thoko aahikilhe inyu athumwanaya ayo, wiira ni ayo avare ntheko aka wo opochera ishaani. Ukhalhawaya uhikiya makhura uwo, unowaakelhiha ntheko wo opochera ishaani, wo uhimalha ni iyari chaya chonkhaye."

16 Ashinna Musa ahopanga chittu chonkhaye thoko Apwiiya Nlhuku chenre aya wo ulhehera. 17 Paahi nihuku no upacha no mweeri wo upacha wo iyaakha yo nayelhi baada yo uthama Umisri, ashinna Musa ni Aisraeli aheemesha Nihema Nitakatifu. 18 Wo uttwara malhehero a ashinna Musa, Aisraeli aheemesha Nihema Nitakatifu, weesha ikhalhelho chaya, weemesha mikurio, weemesha ifuremu chaya ni ulhutaaniha mapoopola. 19 Nkayaathaphurulha nipaziya, nkayaarukureriha, ni ukhuneelha vachulhu Nihema Nitakatifu, thoko Apwiiya Nlhuku chenre aya wo waalhehera. 20 Yamalheke, ahokusha ikipande piilhi cho malhuku chaalhepiye Malheheriyo ni uhelha nhina Nisanduku no Malhehano. Nkayaakusha mishaamu chilhe ni weesha vachulhu nisanduku, ni weesha ikifuniko vachulhu nisanduku vawo vaneehaniya nipuro no woonelhiya attu ikiriri. 21 Nkayeesha Nisanduku no Malhehano nno Nnihemani ni uttukelhelha nipaziya. Paahi wo upanga chiicho, ahotiyelhelha attu ahoone Nisanduku no Malhehano, thoko chaalheheriye aya ni Apwiiya Nlhuku. 22 Nkayeesha ni imeza Nnihemani, mpata wo uchulhu, vathe wo nipaziya. 23 Vachulhu imeza vawo aheesha mikatte chikumihiye isadaka wa Apwiiya Nlhuku, thoko chaalheheriye aya ni Apwiiya Nlhuku. 24 Nkayeemesha iphata yo uthomeiya ikhandiri Nnihemani mpata wo uchawa, waatameria imeza iyo. 25 Nkaaaparihelha ikhandiri chiyo umihoolho wa Apwiiya Nlhuku, thoko Apwiiya Nlhuku chenre aya wo ulhehera. 26 Yamalhekeru, ashinna Musa aheesha madhubahu o idhahabu alhe Nnihemani, uhoolho wo nipaziya, 27 nkayaapaha ubani wo unukhelha thoko chaalheheriye aya ni Apwiiya Nlhuku. 28 Nkayaattukelhelha nipaziya vanlhakoni wo Nihema Nitakatifu, 29 nkayeesha madhubahu o isadaka yo upahiya, ni isadaka yo choolhia, vakhiviru ni nlhako wo Nihema Nitakatifu, thoko chaalheheriye aya ni Apwiiya Nlhuku. 30 Nkayeesha inyipo yulhupalhe yo uhelhiya maashi o ukhucha, variyari Nihema Nitakatifu, nkayaachariha maashi. 31 Ashinna Musa, Naharuni, ni achishaana a Naharuni, onkhaye ahokhucha miono ni mieto chaya ni yayo maashi ayo. 32 Ni kila vaakenlhe aya Nihema Nitakatifu, ni vaatameria aya madhubahu, ashinna Musa, Naharuni ni achishaana aya, ahokhuchacha thoko Apwiiya Nlhuku chenre aya wo waalhehera ashinna Musa. 33 Wo umalhihera, ashinna Musa ni nlhoko aya, ahotheka ntenje urukureria Nihema Nitakatifu nno ni madhubahu. Nkayeesha ni nipaziya vanlhakoni wo ntenje nno. Paahi etu ashinna Musa vamoka ni attu ayo nkayaamalhiha ntheko wonkhaye.

34 Yamalhekeru, nihute nne nkanaakhunelha Nihema Nitakatifu, ni nthimicho wa Apwiiya Nlhuku nkawaaria Nnihemani mmo. 35 Ukhalhawaya nthimicho uyo waari wo waaria chinene, ashinna Musa khayonrie ukelha Nihema Nitakatifu. 36 Paahi ukhuma nenno nihuku nno, Aisraeli khayaathamme wiira eete nkwaha, yaahikhalhe nihute nne veenulhiye aya uthama vachulhu Nihema Nitakatifu nne. 37 Yakhalhaka nihute nne naari ninakhanlhe vachulhu Nihema Nitakatifu, khayaathamme, mpaka veenulhiye aya uchulhu. 38 Kila vaari aya munkwahani, Aisraeli ahooria woona nihute na Apwiiya Nlhuku nne vachulhu Nihema Nitakatifu, uthana, ni uhiyu ahoona mooro ulhe upharelhaka nnihuteni mmo vachulhu Nihema Nitakatifu vawo.