1 Apwiiya Nlhuku nkayeerelha ashinna Musa wiira, "Mmweeke umwaakoni, inyuva ni Naharuni ni Naabihu vamoka ni ashulhupalhe makhumi saba a Aisraeli, mwakhoromeke vanaatameria inyu mwaako ni ukithimicha. 2 Inyuva ashinna Musa vekha inyu phi nohalha ukaatameria, nansho akina ahiwe ukaatameria, ni mena Aisraeli ayo ahiwelhache umwaakoni vamoka ni inyu."

3 Paahi, ashinna Musa nkayarwaa uwaahimeriani attu onkhaye malhove ni malhehero onkhaye a Apwiiya Nlhuku alheheriye aya. Attu onkhaye nkayaakhulha wo nlhove nimoka yeeraka, "Ninoopanga chonkhaye chihimiye ni Apwiiya Nlhuku." 4 Ashinna Musa aholhepa malhehero onkhaye aavahiye aya ni Apwiiya Nlhuku.

Mapikoosha o nihuku no nayelhi, ahotheka madhubahu o malhuku wuuthi mwaako. Nkayeemesha ni mapoto o malhuku khumi ni meelhi wo ulhikaana ni makosho khumi ni meelhi a Aisraeli. 5 Yamalheke ahaaruma ashimirawo Aisraeli wiira yakumihe isadaka cho upahiya wa Apwiiya Nlhuku, ni waahithelha ashing'ope madume o isadaka cho ulhiya ni attu. 6 Ashinna Musa nkayaarika iphome vakani ya ashinama ayo ni weesha nnibirikani, ni iphome ikina iyo nkayaamicha vamadhubahuni. 7 Yamalheke ahokusha ikitabu yo malhehano a Apwiiya Nlhuku, nkayaashoma umihoolho wa attu. Ni attu ayo nkayeera, "Ninoopanga chonkhaye chihihimiye ni Apwiiya Nlhuku, ni urumelhelha." 8 Paahi ashinna Musa nkayaakusha iphome yaari nnibirikani ilhe ni waamichera attu, yiiraka, "Ilha phi iphome yo malhehano a Apwiiya Nlhuku, enshe aya ni inyu mwaatti thoko malhove aya onkhaye alha."

9 Yamalheke ashinna Musa yahowelha umwaakoni, vamoka ni Naharuni, Naadabu ni Naabihu ni ashulhupalhe makhumi saba o Aisraeli, 10 nkayaamwona Nlhuku a Aisraeli. Vaanyikanlhe awe mieto chawe, wahokhalha ittu thoko mmuto wo malhuku o johari, o woonia nkwee thoko irimu. 11 Nansho Nlhuku khaapannge ittu iriyoothe yo uhilhoka wo yayo ahoolhelhi a Aisraeli ayo. Yahomwoona Nlhuku, nkayaalhia ni uwuria.

12 Apwiiya Nlhuku nkayeehana ashinna Musa, "Mmweeke uwannyaka umwaakoni uno, nkilhitelhelhe wowo. Mii kinouvahani ivibau piilhi cho malhuku chilhepiye malhehero ni malheheriyo kilhempe aka wo nlhatu no weettuchiha Aisraeli." 13 Paahi, ashinna Musa nkayaarwa vamoka ni Nayoshua, namitheko aya, nkayaawelha umwaakoni wa Nlhuku.

14 Nansho ahinaya urwaa, ashinna Musa yaheerelha ashulhupalhe alhe wiira, "Nnilhiteke va mpaka vanohohalha ihu uhokolhelhani. Naharuni ni Nahuri ari vamoka ni inyu, riyoothe rii ni nlhove aarwelheke yayo manyaattu ayo."

15 Paahi, ashinna Musa nkayaarwa umwaakoni, ni nihute nkanaakhunelha mwaako. 16 Nthimicho wa Apwiiya Nlhuku nkawaakhuruwa vachulhu mwaako wo Usinai ni nihute nahokhunelha mwaako uyo wo mahuku sita. Nihuku no saba Nlhuku aheehana ashinna Musa ukhuma variyari nihute nne. 17 Nthimicho wa Apwiiya Nlhuku wahaaria mmiithoni mwa Aisraeli thoko mooro unoparelha vachulhu mwaako. 18 Ashinna Musa nkayaawelha umwaakoni, nkayaakelha nnihuteni mmo. Nkayaakhalha wowo mahuku makhumi ncheshe, uthana ni uhiyu.