1 "Mweehaneke onninyu Naharuni vamoka ni achishaana aya, Nanaadabu, Naabihu, Naeliezeri ni Naithamari, wiira awe aavara ntheko wo upochera ishaani. 2 Ni inyu mwaatottelheke onninyu Naharuni ayo ikuwo chitakatifu wiira oonie anashichinre ni ukhalha ni nthimicho. 3 Mwaahimerieke attu o utotta ikuwo rata kaavahilhe aka irusho, yaatottelhe Naharuni ikuwo wiira, avaheriye ukhalha opochera ishaani aka. 4 Mweerelheke attoteke nrupa wo uwara vakhakaachani, ikuwo yo ukhunelha ikhakacha, ikanzu, nkogo utottiye uttaviye rata, mphumburu ni nshipi. Naharuni vamoka ni achishaana aya awareke chechiyo wiira avare ntheko aka wo upochera ishaani. 5 Attu o utotta ikuwo ayo, atotteke wo ikuwo yorera yo irangi yo kibuluu, yo zambarau, yo khwiilha ni yorera yoteelha.

6 "Atotteke ikuwo yo ukhunelha ikhakacha yo ikuwo yorera yootelha, ni uphwanelhiha rata wo irangi yo kibuluu, yo zambarau, ni yo khwiilha. 7 Chikhalhaneke mikaanda miilhi cho uttukelhiya vamakhathani, chilhutaanihiye uno ni uno wiira chittukiyeke vamoka. 8 Nkaanda uyo chiicho utottiyeke wo nttoche no idhahabu, utottiyeke ni ukhalha ittu imoka ni ikuwo yo ukhunelha ikhakacha iyo, ni uphwanelhihiya ni ikuwo yorera yo kibuluu, yo zambarau, yo khwiilha ni yorera yoteelha. 9 Tho nkusheke malhuku meelhi o isadoniki, nnohalha inyu ukheria machina o makosho a achishaana khumi ni elhi a Nayakhobo vachulhu waya. 10 Machina sita nlhuku no upacha ni makina sita ayo nlhuku nikina nno. Machina ayo attwaraaneke thoko chinre aya wo uyaria waya. 11 Nkherieke yayo machina ayo vachulhu vawo thoko ntu o uhema chittu chinohema awe nhuri. Mwamalhaka, nreeriheke ni uwariha nhina ittu inovarelhelha ikooroshiye wo idhahabu iyo. 12 Yayo malhuku meelhi ayo eeshiyeke vachulhu mikaanda cho ikuwo yo ukhunelha ikhakacha iyo wo woopuwelha makosho khumi ni meelhi a Aisraeli. Paahi Naharuni awareke yayo machina ayo mmakhathani mwaya umihoolho waka mii Apwiiya Nlhuku, wo woopuwelha. 13 Nkoorosheke chittu piilhi cho uvarelhelha, cho idhahabu, 14 ni mikufu miilhi cho idhahabu yorera, chittaviye thoko ikhwambalha. Nttukelhelheke chechiyo mikufu chiyo nhina ittu yo idhahabu inovarelhelha mmo.

15 "Ntotteke nrupa wo uwariya vakhakaachani, wo uchuwelha mathananelho a Nlhuku. Ukooroshiye rata thoko chitottiye aya ikuwo yo ukhunelha ikhakacha ilhe. Utottiyeke wo ikuwo yorera yoteelha ittaviye rata, ni uphwanelhihiya wo nttoche no idhahabu, no irangi yo kibuluu, yo zambarau ni yo khwiilha. 16 Nrupa uyo ulhikaaneke, kila mpata ukhalheke makokho mararu. 17 Upambiyeke wo misitari ncheshe cho malhuku o nhakhu. Nsitari wo upacha ukhalheke wo malhuku o iakiki, itopazi ni almasi yo khwiilha. 18 Nsitari wo nayelhi upambiyeke malhuku o zumaridi, iyakuti yo kibuluu ni almasi. 19 Nsitari wo neraru ukhalheke wo malhuku o yasintho, iakiki yo khwiilha ni amethesito. 20 Wo necheshe uyo ukhalheke wo malhuku o zabarajadi, shohamu ni yaspi. Onkhaye ahelhiyeke nhina ittu yo idhahabu inovarelhelha mmo. 21 Paahi akhalheke malhuku khumi ni meelhi alhepiye machina o makosho a Aisraeli. Kila nlhuku nimoka neemelhelheke makosho khumi ni meelhi alhe. 22 Nrupa wo vakhakaachani uyo nkooroshelheke mikufu cho idhahabu yorera ittaviye thoko ikhwambalha. 23 Tho mwaakoorosheke apete elhi o idhahabu o uwarihiya nrupa wo vakhakaachani ni uwariha ikhona piilhi cho nrupa uyo. 24 Mmwariheke mikufu miilhi cho idhahabu chittaviye chiyo ikhona piilhi cho pete chiri vachulhu nrupa wo vakhakaachani uyo. 25 Ikhona chikina piilhi cho nkufu wo idhahabu chiyo nvaraaniheke chittu cho idhahabu chinovarelhelha piilhi chiyo, ni ikibati ilhe wiira chihihiyane ni ikipande yo ikuwo yo ukhunelha ikhakacha uhoolho waya uwo. 26 Tho, mwaakorosheke apete elhi o idhahabu, mmwariheke ikhona piilhi cho nrupa wo vakhakaachani, wo nhina nrupa uyo vachulhu ikuwo yo ukhunelha ikhakacha. 27 Tho, mwaakorosheke apete elhi akina o idhahabu mmwariheke ikhona piilhi cho vathi vakizibauni, vanokumaana ikishikizo ni nshipi uttaviye rata uyo. 28 Mwamalhaka, ntukelhelheke nrupa uyo vakizibauni wo utukaaniha apete ayo ni nripwe wo kibuluu, wiira nrupa uyo uhithaphuwe nansho ukhalheke vachulhu nshipi uttaviye rata uyo.

29 "Ni Naharuni vanokelha aya Vakittu Vatakatifu, awareke nrupa ukheriye machina o makosho a Aisraeli. Wo wiira chiicho, mii Apwiiya Nlhuku akinoulhiyalhani mwaatti mena. 30 Nhina nrupa uyo nhelheke malhuku o uchuwelhiha mathananelho a Nlhuku aneehaniya Urimu ni Thumimu, wiira Naharuni akusheke vanowa aya umihoolho wa Apwiiya Nlhuku. Paahi Naharuni ikatema chonkhaye awareke, wiira achuwelhe chinothanana aka chinaacha Aisraeli.

31 "Ntotteke ikanzu yo isufu ihelhiye irangi yo kibuluu yo uwarelha ikuwo yo ukhunelha ikhakacha. 32 Ikhalheke ni vakittu wo uviriha muru variyari, ni nthotho mwaya weeshiyeke mminiko wo ufumiya wiira ihaahuwe. 33 Mminiko wo vathi, uwarihiyeke makomamanga o kibuluu, o zambarau ni o khwiilha. 34 Tho, chirukurerihiyeke injuga cho idhahabu variyari makomamanga ayo. 35 Naharuni awareke yeyo ikanzu iyo vanovara aya ntheko wo opochera ishaani. Injuga chiyo chiiwanieke vanokelha aya ni ukhuma Vakittu Vatakatifu, umihoolho waka Apwiiya Nlhuku, ni ayo khaneeviya.

36 "Mwamalhaka, nkoorosheke ikibati yo idhahabu yorera, ni ukheria vachulhu waya thoko ntu chinokheria awe ni nhuri, ‘Ntakatifu wa Apwiiya Nlhuku.’ 37 Nttukelhelheke yeyo ikibati yo idhahabu iyo vamphumburuni, uhoolho, wo nripwe wo kibuluu. 38 Naharuni awareke yeyo ikibati idhahabu iyo vayuchi. Wo yeyo iphiro iyo anookusha milhatu cha Aisraeli yakhalhaka ahopangacha vanokumiha aya isadaka chaya chitakatifu, ni mii kinoopochera isadaka chaya.

39 "Mwaatottelheke Naharuni nkogo woteelha worera ulhepiye rata, ni waatottelha ikofiya yorera yoteelha, ni nshipi uttaviye rata.

40 "Mwaatottelhacheke achishaana a Naharuni mikogo, mishipi, ni ikofiya wiira yoonie ahaana nthimicho ni oreracha. 41 Mwaawariheke onninyu Naharuni ni achishaana aya chechiyo ikuwo chiyo. Mwamalhaka, mwaahikeke makhura ni weeshera miono wiira oorie uvara ntheko aka. 42 Tho mwaatottelheke isuruwali fupi choteelha cho waakhunelha toka nnyununi mpaka mmakuthani, wiira eetiyelhelhe. 43 Naharuni ni achishaana aya awareke chechiyo isuruwali fupi chiyo kila vanokelha aya Nihema no nkutano ama vanaatameria aya madhubahu, uvara ntheko wo opochera ishaani Vakittu Vatakatifu. Vavawo anowiitiyelhelha ni woopwaa wiira ahiiviye. Yayo akhalheke malheheriyo o mahuku onkhaye wa Naharuni ni iyari chaya."