1 Ashinna Musa nkayaakumaaniha attu onkhaye o Uisraeli, nkayeerelhacha wiira, "Alha phi malhove akilhenhere aya Apwiiya Nlhuku wiira mpangeke. 2 Nvareke ntheko mahuku sita, nansho nihuku no saba ninookhalha Nihuku no Wiittuwa winyu. Phi Nihuku no Wiittuwa Nitakatifu neeshiye ni Apwiiya Nlhuku. Ntu riyoothe novara ntheko nenno nihuku nno nowiiviya. 3 Nhiparihelhe ata mooro mmanupani mwinyu Nihuku no Wiittuwa nno."

4 Ashinna Musa nkayoolhumacha malhove wa Aisraeli onkhaye wiira, "Apwiiya Nlhuku alhehenre wiira, 5 Nkumiheke isadaka wa Apwiiya Nlhuku. Kila ntu ri ni nrima woombone akumiheke wa Apwiiya Nlhuku idhahabu, isiliva, ishaaba, 6 nttoche no mapururu o ikhondoro o kibuluu, o zambarau ni o khwiilha, ikuwo chitottiye ni nttoche no mapururu o ipuri, 7 marapalha o ikhondoro chilhopwana chihelhiye irangi yo khwiilha, marapalha o ipuri, imbau cho n'johoro, 8 makhura o uhelhiya nkhandirini, ikiungo cho uthakanihiya makhura o unukhelha ni cho uthakanihiya ubani wo unukhelha chinene, 9 malhuku o nhakhu o isadoniki ni malhuku makina o nhakhu o uphwanelhihiya vachulhu ikuwo yo ukhunelha ikhakacha ni vachulhu nrupa wo vakhakaachani.

10 "Attu onkhaye anooria uvara ntheko wo urata munlhokoni mwa attu inyu, aweeke akoorosheke kila ittu thoko chilhehenre aya Apwiiya Nlhuku. 11 Nihema Nitakatifu ni ikifuniko aya, nipaziya naya, ivibaniyo chaya cho uvarelhelha nipaziya, mikurio chaya, mapoopola aya, ikhalhelho chaya, 12 Nisanduku no Malhehano vamoka ni mishaamu chaya, ikifuniko aya, nipaziya no umwalhaaniha Vakittu Vatakatifu chinene nne, 13 imeza, mishaamu chaya ni ikaruma chaya chonkhaye, mikatte chineeshiya umihoolho wa Apwiiya Nlhuku, 14 iphata yo uthomeiya ikhandiri ni ikaruma chaya, akhandiri ni makhura aya, 15 madhubahu o utumiherelha ubani ni mishaamu chaya, makhura o uhikiya, ubani wo unukhelha, nipaziya no nlhako wo Nihema Nitakatifu, 16 madhubahu o ututumiheriya isadaka, vamoka ni nttavi naya no shaaba, mishaamu chaya ni ikaruma chaya chonkhaye, inyipo yulhupalhe yo uhelhiya maashi o ukhucha mmietoni ni ikhalhelho aya, 17 mapaziya o ntenje, ikuwo chaya ni ikhalhelho chaya, nipaziya no nlhako wo ntenje, 18 ikhomo cho Nihema Nitakatifu, cho ntenje vamoka ni ivibaniyo chaya cho uvarelhelha nipaziya, 19 ikuwo chorera chitottiye rata, cho uwariya Vakittu Vatakatifu, yaani ikuwo cho uwara Naharuni ni achishaana aya ashilhopwana, vanovara aya ntheko wo opochera ishaani."

20 Paahi amalhihekeru, nlhoko wonkhaye wa Aisraeli wahothama umihoolho wa ashinna Musa ni uhokolhia umapuroni waya. 21 Kila mmoka aateelhiye munrimani wawe, ahowiiha isadaka wa Apwiiya Nlhuku. Nkayaawiihacha chittu chaathananiya wo ukavihera ntheko wo uthekiya Nihema Nitakatifu ni chittu chikina chonkhaye chaathananiya. Tho, ni chiyo cho utottiya ikuwo cho uwara opochera ishaani. 22 Attu onkhaye, manyaalhopwana ni manyaathiyana yaateelhiye munrimani, ahowiiha ichipini, ivipuli, apete, ibangili, mikufu, ni chittu chikina chikooroshiye wo idhahabu, nkayaakumiha isadaka wa Apwiiya Nlhuku. 23 Tho, kila mmoka aakhalhanne ikuwo yoombone yoteelha, yo kibuluu, yo zambarau ni yo khwiilha, ama yo mapururu o ipuri ama yo marapalha o ikhondoro ihelhiye irangi yo khwiilha, ahowiiha. 24 Attu yonrie ukumiha isiliva ama ishaaba ahowiiha chechiyo isadaka wa Apwiiya Nlhuku. Ni ntu riyoothe aarina imbau cho n'johoro, ni uyo ahowiiha chiicho. 25 Manyaathiyana onkhaye yaachuwenlhe uritha rata nttoche, ahowiiha mattoche orera oteelha, o kibuluu, o zambarau, ni o khwiilha aarinthe aya. 26 Ni manyaathiyana onkhaye ooria ntheko wo uritha, ahoritha nttoche no mapururu o ipuri. 27 Aholhelhi onkhaye ahowiiha malhuku o nhakhu o isadoniki ni malhuku makina o nhakhu o uphwanelhiha vachulhu ikuwo yo ukhunelha ikhakacha ni vachulhu nrupa wo vakhakaachani. 28 Tho, ahowiiha iviungo, makhura o uhelhiya nkhandirini, makhura o uhikiya, ni ubani wo unukhelha chinene. 29 Attu onkhaye manyaalhopwana ni manyaathiyana, yaateelhiye munrimani mwaya ahowiiha wo uhikhanyererihiya ittu iriyoothe yaarina aya ni ukumiha isadaka wa Apwiiya Nlhuku, thoko chaalheheriye aya ashinna Musa wiira ipangiye chiicho.

30 Ashinna Musa nkayeerelha Aisraeli wiira, "Mwiiwelhelheke rata. Apwiiya Nlhuku ahaathanlha Nabezaleli, anaaya Nauri, yaani uchulhu u Nanahuri, o ukhuma nihimo ni Nayuda. 31 Apwiiya Nlhuku ahaaholhelha yayo wo machiri aya ni waavaha irusho, wooria ni uvara ntheko uriyoothe rata. 32 Wiira etu oopuwelhe chittu cho ukheria wo urata ni uhana idhahabu, isiliva ni ishaaba, 33 ahemache chittu cho uphwanelhiha wo malhuku o nhakhu, ni uhemacha imbau cho upangelhiya mitheko chikina chonkhaye. 34 Tho ahaavaha yayo manyaattu ayo, ni Naoholiabu, anaaya Naahisamaki, o ukhuma nihimo ni Nadani, wooria, wiira yeettuchihe attu akina mitheko chaya chiyo. 35 Ahovahiya irusho cho upanga kila ittu inaacha ntheko wo attu anokoorosha chittu rata, attu anoritha mattoche o mapururu o ikhondoro o irangi cho kibuluu, zambarau ni o khwiilha. Attu anooria utotta ikuwo choteelha chorera chirithiye rata, ni attu anopanga yoyo ntheko uyo rata."