1 "Ntu eiyaka ing'ope ama ikhondoro nkaahitha ama nkaathumiha, noolhivihiya ing'ope nthanu wo kila ing'ope, ni ikhondoro ncheshe wo kila ikhondoro iyilhe awe. 2 Ntu o wiiya avariyaka aphomolhaka inupa uhiyu, aatiyaka mpaka ukhwa, ntu mwiivilhe uyo khanohukumulhiya wiira heeva. 3 Nansho owiiya uyo avariyaka nchuwa ninashilhe ni wiiviya, owiiva uyo nookhalha ni nlhatu wo uhukumulhiya.

"O wiiya avariyaka, alhiveke, nansho akhalhaka kharina ittu yo ulhiva, paahi etu athumihiyeke mwanene uyo wiira alhive ittu iyilhe awe. 4 Yakhalhaka mwannama eeiye uyo noophwanyiya wa yoyo owiiya uyo nari nkumi, paahi owiiya uyo noolhiva mikwaha miilhi, ikhalhe ing'ope, iphuta ama ikhondoro.

5 "Ntu aalhihaka ashinama awe mmatani mwaalhiye izabibu ama unhiyerera mwannama awe ulhia mmatani mwa ntu nkina, noolhiva choolhia chonkhaye cho mmatani mwawe ama imata awe yo izabibu.

6 "Ntu apharihelhaka mooro mmatani mwawe, nkawaavara ithuphi ni uwanelha mpaka nkawaapaha makhupi o choolhia, ama choolhia cha ntu nkina chihinakhunguriya mmatani, ama imata yoothene nkayaavia, ntu pahilhe mooro uyo alhiveke ihasara yonkhaye.

7 "Ntu ammahaka nkhunanawe nchurukhu ama nhakhu nkina wiira anshungelhe, nkaiyeriya unupani wawe, owiiya uyo avariyaka alhiveke mikwaha miilhi nchurukhu wiiyiilhe awe uyo. 8 Nansho owiiya uyo aahivariyeke, anene inupa ayo arweeke inupa yo ulhapelhiya Apwiiya Nlhuku, yoonie wiira kahii yayo eyilhe nhakhu wa nkhunanaya uyo.

9 "Yakhalhaka attu elhi anowaatakanelha ing'ope ama iphuta ama ikhondoro ama ikuwo ama ittu iriyoothe yaapotenre ni kila mmoka nohimia wiira yawawe, oyelhi awiihiyeke inupa yo ulhapelhiya Apwiiya Nlhuku. Uyo nohalha uhukumulhiya wiira hotteka uyo, anlhiveke nkhunanawe uyo mikwaha miilhi.

10 "Ntu ammahaka nkhunanawe iphuta ama ing'ope ama ikhondoro ama mwannama nkina riyoothe wiira anhuwe, ni mwannama uyo nkaakhwa ama nkaarakalha ama nkayaaweiya wo uhikhalha ntu riyoothe onne, 11 arweeke inupa yo ulhapelhiya Apwiiya Nlhuku ni ulhupelha, wo waamulha variyari aya, wooniha wiira ntu aavahiye uyo kheiyilhe nhakhu wa nkhunanawe uyo. Mwanene mwannama uyo arumelhelheke naapo nno, ni nkhunanawe uyo khanolhivihiya ittu iriyoothe. 12 Nansho yakhalhaka mwannama eeiye uwannyawe, anlhiveke mwanene mwannama uyo. 13 Yakhalhaka yoyo mwannama uyo eeviye ni nshene, ntu aavahiye unhuwa mwannama uyo awiiheke mahalhahalha o mwannama uyo wiira oonecheshe. Khanolhiva ittu iriyoothe ukhalhawaya eeviye ni nshene.

14 "Ntu amwaashimaka mwannama a nkhunanawe, mwannama uyo nkaarakalha ama nkaakhwa mwanene uyo hiriwo, ntu mwaashimme mwannama uyo alhiveke. 15 Nansho yakhalhaka mwanene uyo ahaatama, paahi ntu aashimihe uyo khanolhivihiya ittu iriyoothe. Yakhalhaka mwannama uyo aari o waashimihiya wo malhivo, mwanene uyo apochereke malhivo eewananiye mpacho ayo.

16 "Ntu antongosaka mwalhi hinaatameriya ni nlhopwana, nkanrupana, akumiheke mahari ni unthelha mwalhi uyo. 17 Nansho athumwanawe mwalhi uyo akhotaka menamena unthelhiha mwaamwanaya uyo, ntu uyo alhiveke nchurukhu wo mahari unothananiya wo mwalhi hinaatameriya ni nlhopwana.

18 "Nthiyana nkhwiri hihiiye ukhalha nkumi, eeviyeke.

19 "Ntu nonthelha mwannama, eeviyeke.

20 "Ntu riyoothe nokumiha isadaka wa milhuku chikina, aahikhalhe Apwiiya Nlhuku, yoyo eeviyeke.

21 "Nhimpangelhe ichimwa nlheto, mena umpangelha ittu yo uhilhoka, ukhalhawaya ni inyu mwaatti mwaari alheto chiicho Umisri. 22 Nhipangelhe chittu cho uhilhoka nankhwelhi ama mwaana ohiiya. 23 Mwaapangelhaka chittu cho uhilhoka yayo manyaattu ayo, ni mii nkakeewa ikutto aya, wo ikekhiaye kinoweewelhelha ikutto aya. 24 Ni mii kinoorushiya, kinoowiivani mwaatti vanorwaa inyu ukhotoni, manyaahanu inyu anookhalha manyanankhwelhi, ni achishaana inyu anookhalha ohiiya chiicho.

25 "Mwamwaashimihaka ntu riyoothe nchurukhu munlhokoni mwa attu aka amashikini, nkhalheke thoko khannamwaashimiha, ni mena nhikohe ifaida yo vachulhu. 26 Mwakushaka ikuwo yo nkhunaninyu nkamwaavarelha imboote, munhokolhoshereke nchuwa nihinaaya wiilha, 27 ukhalhawaya yeyo phi ikuwo inokhulhuvelha awe, phi nekhunelha awe. Ama nnaanyihera nohalha wiikhunelhani? Vanohalha awe ukunlhelha vawo, kinowiiwa ikutto awe, ukhalhawaya mii o ikiriri.

28 "Nhinruwane Nlhuku, mena nhinruwane nholhelhi a attu inyu.

29 "Nhipiche ukumiha mpatta unokhuma nchoolhiani nruwenrie inyu ni idivai inyu.

"Nkivaheke achishaana inyu ashilhopwana o nttara. 30 Nkivaheke chiicho mattara o ing'ope ni ikhondoro chinyu. Munhiyeke mwannama nlhopwana o nttara uyo akhalheke ni anumwanawe mahuku saba, nihuku no nane nkivaheke mii.

31 "Mwaatti phi attu aka athanlhiye. Paahi nhikhure inama yo mwannama eeviye ni nshene. Yeyo inama iyo arihelhiyeke ashipwa.