1 Nkayaakoorosha madhubahu o upaheriya isadaka, ni ayo aakooroshiye wo imbau cho n'johoro. Aari o urekama miono nthanu, ukhanuwa waya miono nthanu, yaani yaari yo nraba. Nchusha naari miono miraru. 2 Kila ikhona yo madhubahu ayo ahokoorosha inyaka yaakhanlhe ittu imoka ni madhubahu ayo, nkayaakhunelha wo uhika ishaaba. 3 Tho, ahokoorosha ikaruma chonkhaye cho madhubahu ayo, yaani, iyoopwe, isepetu, inyipo, iyuma cho urukunushelha inama, ni isahani cho uvalhelha mooro. Chonkhaye chiyo aakooronshe wo shaaba. 4 Tho, ahokoorosha nttavi no shaba no ukhalhiheriya ikhuni ni makhalha. Nkayeesha wuuthi madhubahu ayo wo variyari. 5 Nkayaakoorosha ni ibangili ncheshe cho uvirihiya mishaamu cho uthathelha nsegasega madhubahu ayo, chaawarihiye ikhona ncheshe chiyo. 6 Ahokoorosha ni mishaamu cho n'johoro cho uthathelha madhubahu ni uhika ishaaba, 7 nkayaaviriha mishaamu chiyo mbangilini mwaawarihiye ikhona cho madhubahu chilhe. Madhubahu ayo aakooroshiye thoko nisanduku no imbau ni ukhalha mwaari nhina mmo.

8 Yamalheke, Nabezaleli ni anamitheko akhunanaya ahokoorosha inyipo yulhupalhe yo ishaaba ni ikhalhelho aya yo shaaba chiicho. Inyipo yulhupalhe iyo yaari yo ivipande cho shaaba chaakumihiye ni manyoopani aakavihera ntheko vanlhakoni u Nihema Nitakatifu, chaapanga aya ikioo cho wiiwehera.

9 Tho, amalhihekeru vavawo, ahotheka ntenje no mapaziya o ikuwo yorera yoteelha. Mapaziya o mpata wo uchawa aari o utalhiva miono imia imoka. 10 Mikurio chaya chaari cho miuru cho shaaba makhumi meelhi, ni ikhalhelho makhumi meelhi cho ishaaba chiicho. Nansho mapoopola ni ivibaniyo cho uvarelhelha nipaziya chaari cho isiliva. 11 Mpata wo uchulhu mapaziya aari o utalhiva miono imia imoka, ni ikhalhelho makhumi meelhi cho shaaba, nansho mapoopola ni ivibaniyo chaya cho uvarelhelha nipaziya chaari cho isiliva. 12 Mapaziya o mpata uneelha nchuwa, aari o utalhiva miono makhumi nthanu, mikurio khumi ni ikhalhelho chaya khumi, mapoopola ni ivibaniyo chaya cho uvarelhelha nipaziya chaari cho isiliva. 13 Unosha nchuwa, waari nlhako uwo, ukhanuwa waari miono makhumi nthanu. 14 Nipaziya no kila mpata vanlhakoni naari, miono khumi ni nthanu utalhiva waya, ni mikurio miraru, ni ikhalhelho ttaru, 15 tho mpata nkina uyo chiicho. Vanlhakoni vawo nipaziya naari no miono khumi ni nthanu utalhiva waya, mikurio miraru ni ikhalhelho ttaru uno ni chiichammo ukina uwo. 16 Mapaziya onkhaye o ntenje nno yaari o ikuwo yottaviya yorera yoteelha. 17 Ikhalhelho chonkhaye cho mikurio chaari cho ishaaba, nansho ivibaniyo chaya cho uvarelhelha nipaziya ni ivibaniyo cho uttukelha chiyo chaari cho isiliva. Mikurio chonkhaye cho ntenje chiyo chaalhutaanihiye ni mapoopola o isiliva. 18 Nipaziya no vanlhakoni naari no ikuwo yorera yoteelha naattavelhiye ni nttoche no irangi yo kibuluu, no irangi yo zambarau ni yo khwiilha. Naari no urekama miono makhumi meelhi, naakhunelha miono nthanu, wo ulhikaana ni mapaziya makina o ntenje nno chaari aya.

19 Tho, mikurio chaya chaari ncheshe, cho miuru cho shaaba. Mapoopola aya yaari o isiliva, miuru chaya ni ivibaniyo cho uttukelhelha chaari cho isiliva. 20 Ikhomo chonkhaye cho nihema ni cho ntenje chaari cho ishaaba.

21 Alha phi maaalhakelhiyo o chittu chaathekelhiye Nihema Nitakatifu, yaani nihema weeshiye Nisanduku no Malhehano naari malhuku aalhepiye malheheriyo a Apwiiya Nlhuku. Chaalhakelhiye ni Alawi yaahoolhelhiye ni Naithamari, mwaamwanaya opochera ishaani, Naharuni, thoko chaalheheriye aya ni ashinna Musa.

22 Nabezaleli anaaya Nauri, uchulhu u Nahuri, o nikosho ni Nayuda ahopanga chittu chonkhaye Apwiiya Nlhuku chaalhehenre aya ashinna Musa wiira chipangiye. 23 Owaakaviha ntheko uyo yaari Naoholiabu anaaya Naahisamaki, o nihimo ni Nadani. Yayo yaari o wooria chinene uhema malhuku ni ukoorosha mapambo, namitheko o irusho, o wooria uphwanelhiha rata ikuwo yorera yoteelha wo nttoche no irangi yo kibuluu, yo zambarau ni yo khwiilha.

24 Idhahabu yonkhaye yaakumihiye wa Apwiiya Nlhuku, wo nlhatu wo uvarelhiya ntheko wo uthekiya Nihema Nitakatifu yaari ikilo imia nane ni makhumi saba ni saba, ni igramu imia ttaru, wo ulhikaana ni maphimelhiyo eeshiye u Nihema Nitakatifu nno. 25 Malhuku o isiliva aakumihiye ni nlhoko wa attu ayo thoko chenre aya wo waalhakelhiya, yaari ikilo maelufu mararu, ni khumi ni saba, ni igramu imia saba ni makhumi nthanu, wo ulhikaana ni maphimelhiyo eeshiye u Nihema Nitakatifu nno. 26 Kila ntu o iyaakha makhumi meelhi ni uthepa, ahaalhakelhiya, ni kila mmoka ahokumiha isiliva igramu nthanu thoko chaalheheriye u Nihema Nitakatifu. Attu onkhaye yaalhakelhiye yaari manyaalhopwana, laki sita ni maelufu mararu, ni imia nthanu ni makhumi nthanu. 27 Isiliva ikilo maelufu mararu chahotumika ukooroshelhiya ikhalhelho imia imoka cho Nihema Nitakatifu chilhe, ni nipaziya. Vavawo yaani ikilo makhumi mararu kila ikhalhelho imoka. 28 Ikilo khumi ni saba ni igramu makhumi saba ni nthanu chaahanlhe, chaatumikilhe ukooroshelha mapoopola o uttukelha mikurio, ni uhikahikiya mikurio vachulhu, ni ukooroshelha ittevereve cho uvarelhelha nipaziya. 29 Wo waalhakelhiya, ishaaba yaakumihiye ni Aisraeli wa Apwiiya Nlhuku yaari, ikilo maelufu meelhi, imia imoka ni makhumi meelhi ni ncheshe. 30 Phi iyo yaakhushilhe aya Nabezaleli ukooroshelha ikhalhelho cho nlhako wo Nihema Nitakatifu, madhubahu o upahera isadaka, nttavi naya no weeshiya ikhuni ni makhalha, ikaruma chonkhaye cho madhubahu, 31 ikhalhelho cho mikurio cho ntenje chaarukurenrie mipata chonkhaye, cho nlhako wo ntenje, ikhomo chonkhaye cho Nihema Nitakatifu.