1 Apwiiya Nlhuku nkayeerelha ashinna Musa ni Naharuni, vaari aya Umisri wiira, 2 "Ulha mweeri ulha phi nohalha ukhalha mweeri wo upacha wo kila iyaakha uwannyu. 3 Mwaahimerieke attu onkhaye o Israeli wiira, vanolhoha aya uphiya nihuku no khumi no ulha mweeri ulha wiira, kila mmoka ankusheke mwaakhondoro mmoka ama mwaapuri wo kila inupa. 4 Yakhalhaka iwani iyo ikaani chinene mena ihinoria aya umalhiha ikhondoro imoka, ikavihaneke ni amwaatamana aya ulhikaana chiri aya attu ayo. Munthanlheke mwannama nohalha inyu wooria kila ntu ukhura ni umalhiha inama awe. 5 Munthanlheke mwaakhondoro ama ipuri. Ni uyo akhalheke n'dume ni o iyaakha imoka, hikhalhe oremara vakittu variyoothe. 6 Munshungeke rata yoyo mwannama uyo mpaka nihuku no khumi ni ncheshe no ulha mweeri ulha. Nenno nihuku nno, nlhoko wonkhaye wo Aisraeli aahitheke ashinama ayo uchechilho. 7 Yamalhaka, attu akusheke iphome ya ashinama ayo ni uhikahika miimo ni vachulhu mikhora chonkhaye cho kila inupa chinohalha aya ukhurelhiya yayo ashinama ayo. 8 Yoyo uhiyu uyo, inama iyo yooshiyeke, ikhuriyeke ni nkatte wo uhihelhiya ihengedure ni mathapa o mathaakhuru o waawa. 9 Nhikhuure inari ikithi ama inaapeiye ni maashi. Nansho yooshiyeke yonkhaye, vamoka ni muru, mweto ni inama cho mmirimani. 10 Chiicho etu tho, nhishunge mmithe inama iriyoothe mpaka wichishu. Inama iriyoothe inohalha mpaka wichishu yeyo ipahiyeke mooro. 11 Ni cho phi nohalha inyu ukhura inama iyo. Nlhieke nneettukilhe mishipi nnyununi mwinyu, nnawanre iratu chinyu ni uvarelha ikopo chinyu mmathathani, tayari wo nkwaha. Tho nkhureke wo waakuvihacha. Yeyo phi nihuku nulhupalhe no Pasaka a Apwiiya Nlhuku.

12 "Yoyo uhiyu uyo, kinoovira vachulhu ilhapo yo Umisri ni uweevakacha achishaana o nttara ashilhopwana o Umisri, attu mpaka ashinama. Kinotwarusha milhuku chonkhaye cho attu o Umisri. Mii phi Apwiiya Nlhuku. 13 Paahi iphome inohalha uhikiya mmilhakoni phi yo wooniha inupa chinohalha inyu ukhalhacha. Ni mii vanohalha aka woona yeyo iphome iyo, mwaattiva kinoupwahani, khannothuriya variwoothe ikatema vanohalha aka utwarusha ilhapo yo Umisri. 14 Nenno nihuku nulhupalhe nno mmweeke mwoopuwelha wo ukithimicha mii Apwiiya Nlhuku. Yayo akhalheke malheheriyo o mahuku o uhimalha uwaninyu mwaatti, iyari ata iyari."

15 Apwiiya Nlhuku nkayeera, "Wo mahuku saba, nhilhie mikatte cho uhelhiya ihengedure. Nihuku no upacha no mahuku saba ayo, nthamiheke ihengedure mmanupani mwinyu. Ntu riyoothe alhiaka ittu ihelhiye ihengedure nhina yayo mahuku saba ayo, yoyo athamihiyeke munlhokoni mwa Aisraeli. 16 Nihuku no upacha ni nihuku no saba, nnookumaana mikutano mitakatifu cho ukithimicha mii, Apwiiya Nlhuku. Wo yayo mahuku meelhi ayo nhivare ntheko uriyoothe yaahikhalhe ntheko wo uterekhacha choolhia. 17 Mmweeke mwaattapelhelha nna nihuku nulhupalhe no mikatte cho uhihelhiya ihengedure ilha, muupuwelhaka nihuku nothaminheakani mwaattiva, Aisraeli, mmikutironi ukhuma Umisri. Yeyo isikukuu iyo ittapelhelhiyeke ni iyari chinyu chonkhaye chinottwara, ukhalha phi malheheriyo o mahuku o uhimalha uwaninyu. 18 Paahi, nlhieke mikatte cho uhihelhiya ihengedure toka uchechilho wo nihuku no khumi ni ncheshe no mweeri wo upacha, mpaka uchechilho wo nihuku no makhumi meelhi ni moka, no yoyo mweeri wo upacha uyo. 19 Wo yayo mahuku saba ayo, nheeshe ihengedure mmanupani mwinyu. Ntu riyoothe, akhalhe nlheto mena nnenchi, alhiaka ittu ihelhiye ihengedure, noothamihiya munkutironi mwa Aisraeli. 20 Nhilhie ittu iriyoothe ihelhiye ihengedure mmanupani mwinyu. Nlhieke tu mikatte cho uhihelhiya ihengedure yayo mahuku saba ayo."

21 Paahi, ashinna Musa nkayeehana ahoolhelhi onkhaye o Aisraeli, nkayaahimeria wiira, "Kila mmoka inyu anthanlheke mwaakhondoro ama mwaapuri wo ulhikaana ni attu arii unupani wawe, wo nlhatu no unhitha isikukuu yo Pasaka. 22 Nkusheke mathaakhuru o hisopo, ni upapha mphomeni munsiniani, ni uhika vachulhu ni miimo chonkhaye miilhi cho milhako cho inupa chinyu. Ntu riyoothe hikhume vathe yoyo uhiyu uyo mpaka wichishu. 23 Ukhalhawaya mii Apwiiya Nlhuku kinoovira ni weevakacha attu o Umisri. Nansho vanohalha aka woona iphome inahikiye vachulhu ni miimo cho inupa chinyu kinoopwaha, ni mena akinonhiyerera o wiiva akelhe mmanupani mwinyu ni uwiivani. 24 Mvarechesheke nna nlhove nna mwaattiva ni iyari chinyu ukhalha phi malheheriyo o mahuku o uhimalha. 25 Vanohalha inyu ukelha ilhapo inohalha aka uuvahani ilhe, thoko mii Apwiiya Nlhuku chenre aka wo ulheha, mmweke mwaapanga chiicho. 26 Kila ikatema achishaana inyu vanohalha aya ukohani, ‘Nenna nlhove nna maana aya phi ishiyani?’ 27 Mmweeke mweerelha wiira, ‘Ilha isadaka yo Pasaka yo waathimicha Apwiiya Nlhuku. Ukhalhawaya ahovira vachulhu inupa cha Aisraeli, Umisri. Ikatema veevilhe aya attu o Umisri, nansho hii ahoniinanelha, khaniivilhe.’ "

Aisraeli yahokhoromacha ni waathimicha Apwiiya Nlhuku. 28 Yamalheke Aisraeli yahorwaacha, nkayaapangacha thoko Apwiiya Nlhuku chaalhehenre aya ashinna Musa ni Naharuni.

29 Uhiyu iriyari, Apwiiya Nlhuku ahevakacha mattara onkhaye o Umisri. Achokholhaka wo mwaana o nttara a Nafarao, ohiyeriya umwene uyo, mpaka mattara a attu attukiye ujerani. Ata mattara a ashinama ni ayo yahokhwacha. 30 Paahi uhiyu variyari, Nafarao ni anamitheko aya olhupalhe ni attu akina onkhaye o Umisri yahonkwacha. Nkawaanyuwa ikutto yulhupalhe ilhapo yonkhaye yo Umisri, ukhalhawaya khayaahanlhe inupa ata imoka yahaakhwilhe ntu.

31 Vavawo Nafarao nkayeehana ashinna Musa ni Naharuni, uhiyu yoyo yoyo, nkayeerelha wiira, "Munkwache! Nthamache! Nthamacheke, mwaattiva vamoka ni Aisraeli ayo, nrweeke mwaathimicheke Apwiiya Nlhuku thoko chinre inyu wo uhimia. 32 Nkusheke mikutiro chinyu cho ikhondoro, ipuri ni ingope chinyu chiyo, nthamacheke. Tho, mwakilhapelhelheke ni mii ibarakha."

33 Attu o Umisri nkayoomolhacha Aisraeli wiira athamache chitema, yiirachaka, "Wo ikekhiaye mwaahithameke, ninookhwaacha onkhaye!" 34 Paahi Aisraeli nkayaakusha iphepa aya yaakandiye ihinaya uhelhiya ihengedure, ni inyipo chaya cho ukandelha anattukanche nkuwoni ni ukusha vamakhathani. 35 Aisraeli yaari anapangilhe thoko chaahimeriye aya ni ashinna Musa katashi vawo. Yahaalhepelha attu o Umisri yaavahe chittu chikooroshiye wo isiliva, ni idhahabu ni ikuwo. 36 Apwiiya Nlhuku ni ayo yaari anaavahenre Aisraeli uttuniya ni attu o Umisri. Paahi attu o Umisri yahaavahacha Aisraeli kila ittu yaavekenlhe aya. Phi chiichammo Aisraeli chaathurulhanche aya attu o Umisri nhakhu aya.

37 Aisraeli yahothamacha Uramesesi, nkayeeta wo mieto urwa Usukothi. Yaari manyaalhopwana yaaphiyelha maelufu imia sita, wo uhaalhakelhiya manyaathiyana ni achishaana. 38 Wahokhalha tho nkutiro nkina wa attu yaattukanne aya vamoka ni mihuwo chinchi, ikhondoro ni ing'ope. 39 Vaari aya munkwahani, ahooshacha mikatte cho iphepa yaakandiye wo uhihelhiya ihengedure ilhe. Tho, ukhalhawaya yaathamilhe Umisri wo waakuvia, paahi khayaaterekhilhe choolhia cho ulhia munkwahani.

40 Aisraeli yaari anakhanlhe Umisri iyaakha imia ncheshe ni makhumi mararu. 41 Nihuku no umalhelha iyaakha yo imia ncheshe ni makhumi mararu, phi nihuku Apwiiya Nlhuku naathamihilhe aya mahimo onkhaye a Aisraeli, ukhuma Umisri. 42 Yoyo uhiyu Apwiiya Nlhuku waashelhelhihilhe aya wiira aathamihe Aisraeli Umisri uyo, uhokhalha wo wuupuwelhiya ni Aisraeli onkhaye ni iyari chaya chonkhaye wo mahuku o uhimalha. Ukhalha phi uhiyu wo Aisraeli ushelhelhiha wo nlhatu no waathimicha Apwiiya Nlhuku.

43 Yamalheke, Apwiiya Nlhuku aheerelha ashinna Musa ni Naharuni wiira, "Anottwara alha phi malheheriyo aka anaacha nihuku no Pasaka. Nlheto riyoothe hilhie yolhia yo Pasaka. 44 Nansho ipotta iriyoothe muthumilhe inyu wo nchurukhu, yakhalhaka heenelhiya unyawo, yoyo ahiiyeke alhieke. 45 Ntu riyoothe ri munkwahani, mena ntu o kibarua riyoothe, hilhie yeyo yolhia iyo. 46 Inama yo mwaakhondoro o Pasaka ikhuriyeke inupa imoka waapeiye awe. Nhikumihe inama iriyoothe ukhuma inupa ihithiye awe yoyo mwannama uyo, mena nhipweshe ata nikhuva nimoka no mwannama o Pasaka uyo. 47 Aisraeli onkhaye attapelhelheke yeyo isikukuu iyo. 48 Nlheto riyoothe nokhalha vamoka ni inyu mwaattiva athananaka unlhia Pasaka unupani wawe, achokholheke weenelha unyawo manyaalhopwana onkhaye o unupani wawe. Vavawo nowaalhakelhelhiya thoko nnenchi ni uhiyereriya unlhia Pasaka. Nlhopwana riyoothe hiinelhiye unyawo hinlhie Pasaka mena. 49 Malheheriyo yayo anonttuka Muisraeli nnenchi ayo, phi yayo anaattuka alheto anohalha ukhalha munlhokoni mwinyu."

50 Aisraeli onkhaye yahorumelhelha yayo malheheriyo ayo nkayaapanga thoko Apwiiya Nlhuku chaalhehenre aya ashinna Musa ni Naharuni. 51 Nenno nihuku nno, Apwiiya Nlhuku yahaathamiha mahimo onkhaye a Aisraeli ukhuma Umisri, mmikutironi mwaya.