1 "Nkoorosheke madhubahu o imbau cho n'johoro o ututumiheriya ubani. 2 Akhalheke o ulhikaana mipata chonkhaye. Urekama mmono mmoka ni nusu, makhuvi moono mmoka ni nusu, ni utalhiva moono mmoka ni nusu. Inyaka chaya chikhalheke ittu imoka ni madhubahu ayo. 3 Nkhunelheke wo idhahabu yorera vachulhu, mpararini ni inyaka chaya. Tho, nrukureriheke nreko wo idhahabu. 4 Mwamalhaka, mwaakoorosheke apete acheshe o idhahabu o uwariha miri cho nsegasega cho uthathelha madhubahu. Eeshiyeke wo vathi, eelhi uno ni eelhi akina mpata wo nayelhi. 5 Chechiyo miri chiyo chinaakhalheke cho n'johoro, chihikiye idhahabu. 6 Madhubahu ayo eeshiyeke uhoolho wo nipaziya, vachereshere Nisanduku no Malhehano ni ikifuniko aya. Vavawo phi nohalha aka uukumaanani. 7 Kila nihuku Naharuni vanohalha aya ukelha uwehawehani ikhandiri, atutumiherelheke ubani wo unukhelha vachulhu madhubahu ayo. 8 Tho, atutumihereke ubani uchechilho vanoparihelha aya ikhandiri. Yeyo isadaka iyo ikumihiyeke mahuku onkhaye wo iyari chinyu chonkhaye wo uheemelha. 9 Vamadhubahuni vawo, nhiwuchelhelhe mena ubani uchiichihiye wiira uhipahiye, ama umpaha mwannama riyoothe ama isadaka yo choolhia vachulhu vawo, ama umichera idivai iriyoothe ukhalha isadaka vavawo. 10 Nkwaha mmoka kila iyaakha, Naharuni attukurieke inyaka ncheshe cho madhubahu ayo wo iphome ya ashinama akumihiye isadaka yo uthamiha milhatu cho uwonya. Ipangiyeke chiicho iyaakha chonkhaye chinowa. Ukhalhawaya madhubahu ayo matakatifu chinene, uwannyaka mii Apwiiya Nlhuku."

11 Apwiiya Nlhuku nkayeerelha ashinna Musa wiira, 12 "Kila vanohalha inyu waalhakelha attu o Israeli, kila ntu akilhiveke ikhodi yo wiilhivelha mwanene, wiira uhikhalhe mareta mahuku attu vanaalhakelhiya aya. 13 Kila ntu naalhakelhiya akilhiveke nchurukhu wo ulhikaana ni malhivo aromolhiye ulhiviya. Yoyo nchurukhu uyo phi isadaka uwannyaka mii, Apwiiya Nlhuku. 14 Kila mmoka nohalha waalhakelhiya, toka o iyaakha makhumi meelhi ni uthepa, akumiheke yayo malhivo ayo. 15 Attu o nhakhu mwinchi ahilhive wo uthepa, mena nshikini hiwukulhe ikhodi awe iyo. 16 Mpochereke yoyo nchurukhu uyo ukhuma wa attu o Israeli, ni waavaha attu anovara ntheko wo uwehaweha Nihema Nitakatifu. Ni uyo unookhalha malhivo o ukumi aya, ni mii kinowoopuwelha wiira keenanelhe."

17 Apwiiya Nlhuku nkayeerelha ashinna Musa wiira, 18 "Nkoorosheke inyipo yulhupalhe yo shaaba yo uhelhiya maashi o ukhucha. Neeshiyeke variyari Nihema Nitakatifu ni madhubahu, ni ucharihiya maashi. 19 Naharuni ni achishaana aya yiiwulhulheke mieto ni unyawa miono chaya yayo maashi ayo, 20 ahinaaya ukelha Nihema Nitakatifu, ni ahinaaya waatameria madhubahu wiira akumihe isadaka yo upahiya uwannyaka mii, Apwiiya Nlhuku. Yaahireke chiicho, anookhwa. 21 Inothananiya wiira yiiwulhulheke mieto ni unyawa miono chaya ahiwe yaakhwa. Yayo anookhalha phi malhemalhelho o mahuku onkhaye, toka Naharuni ni iyari aya mpaka iyari chinowa."

22 Tho, Apwiiya Nlhuku nkayeerelha ashinna Musa wiira, 23 "Nkusheke chittu cho unukhelha thoko chi, makhura o upophori wo mwiri wo manemane kilo sita, mdalasini wo nihiriri no unukhelha ikilo ttaru, mihalhu cho unukhelha ikilo ttaru, 24 ni mdalasini wo nikosho nikina wo unukhelha, kilo sita. Chonkhaye chiphimiyeke ni ulhikaana ikipimo cho Nihema Nitakatifu. Tho, nkusheke ni ilita ncheshe cho makhura. 25 Wo chechiyo, nkoorosheke makhura matakatifu, nthakaniheke thoko chineera aya attu anokoorosha makhura o unukhelha. Yayo akhalheke o uhikiya attu aneeshiya mmihoolho wa Apwiiya Nlhuku. 26 Yamalhaka mmiinelheke makhura ayo Nihema Nitakatifu nno, Nisanduku no Malhehano nno, 27 imeza ni ikaruma chaya chonkhaye, iphata yo ikhandiri ni ikaruma chaya chonkhaye, madhubahu o ututumiherelha ubani, 28 madhubahu o ukumiheriya isadaka chinohalha upahiya ni ikaruma chaya, inyipo yulhupalhe ni ikhalhelho aya. 29 Mweesheke wo nlhatu wo ntheko wa Apwiiya Nlhuku wo uhika makhura, wiira chonkhaye chikhalhe chitakatifu. Ni ittu iriyoothe inohalha uvara, inookhalha itakatifu. 30 Mwamalhaka, mwaahikeke makhura Naharuni ni achishaana aya ni waahaulha wo nlhatu wo ntheko wo upochera ishaani. 31 Mwaahimerieke Aisraeli wiira, ‘Alha makhura alha phi makhura aka matakatifu, ashungiyeke mmilhokoni mwo iyari chinyu chinowa mahuku onkhaye. 32 Nhaahike mwiiruttuni attu ahiri opochera ishaani, ni mena nhikooroshe makhura o ulhikaana ni alha, wo iphiro yo uthakanihacha chechiyo chittu chiromolhiye chiyo. Alha makhura alha, matakatifu, ni inyu mwooneke wiira matakatifu. 33 Ntu riyoothe nokoorosha makhura thoko alha, ama unhika ntu hinophwanelhiya uhikiya alha makhura alha, ahikhalhe opochera ishaani, yoyo haalhakelhiye munlhokoni mwa attu aka.’ "

34 Apwiiya Nlhuku nkayeerelha ashinna Musa wiira, "Mwaahimerieke attu o Israeli, akusheke makhura o unukhelha, yaani upophori wo natafi, upophori wo shekelethi, upophori wo kelbena, ni ubani woombone. 35 Chonkhaye chiyo chilhikaaneke maphimelhiyo aya nkooroshelheke ubani thoko chinokooroshiya aya ni attu o ukoorosha makhura o unukhelha. Nlhukeke maakha wiira ubani uyo urere ni ukhalha ntakatifu. 36 Mwamalhihaka, nshilheke chinene, mweesheke u Nihema Nitakatifu, ni uhikahiha Nisanduku no malhehano, vakittu vanohalha aka ukumaanani, ni uyo unookhalha ubani ntakatifu uwannyu mwaatti. 37 Nhikooroshe yoyo ubani uyo wo nlhatu winyu mwaashinene, ukhalhawaya yoyo unowa ukhalha ubani ntakatifu uwannyu mwaati. 38 Ntu riyoothe nohalha ukoorosha wiira eehike mwanene, yoyo haalhakelhiye munlhokoni mwa attu aka."