1 Nayethro opochera ishaani o Umidiyani, ahokohaya ashinna Musa, yaheewa mwaha wonkhaye Apwiiya Nlhuku waapangenlhe aya ashinna Musa ni Aisraeli vaathamihiya aya Umisri. 2 Paahi Nayethro, yahorwaa wa ashinna Musa, anari ni Nasipora, ahanu a ashinna Musa, aahiye ni ashinna Musa utulhi, 3 vamoka ni achishaana elhi a ashinna Musa. Mwaana o nttara ehaniya Gershomu. Nchina no yoyo mwaana uyo aavahiye ni athumwanawe, ashinna Musa, wo nlhatu no wiira, "Kihottawelha ulhetoni." 4 Mwaana o nayelhi ehaniya Eliezeri, ukhalhawaya ashinna Musa yeera, "Nlhuku a athumwanaka phi kinkenlhe kihiiviye ni Nafarao."

5 Nayethro ahokohaya ashinna Musa, yahowa vamoka ni anaya, yaani ahano a ashinna Musa vamoka ni achishaana, nkayaaphwanya ashinna Musa uthakoni vaamakilhe aya uri mwaako wa Nlhuku. 6 Ashinna Musa vaahimeriye aya wiira ahokohaya vamoka ni Nasipora, anoowa vamoka ni achishaana aya oyeelhi, 7 ahothama urwa weekamelha ahokohaya ayo, nkayooromelha ni waakumbatira, ni ukohanacha. Yamalheke nkayaakelha nnihemani. 8 Ashinna Musa nkayeerelha ahokohaya malhove onkhaye Apwiiya Nlhuku yaapannge aya wa Nafarao ni attu o Umisri wo nlhatu wa Aisraeli. Tho, ahaahimeria mwaha wo uhuva wonkhaye waapantte aya munkwahani, ni Apwiiya Nlhuku chenre aya wo woopolha. 9 Nayethro nkayaatelhiya veewilhe aya mwaha wonkhaye upangilhe aya Apwiiya Nlhuku, wo nlhatu wa Aisraeli, wo wookholha mmathathani mwa attu o Umisri. 10 Nayethro nkayeera, "Athimichiye Apwiiya Nlhuku ookhonlhe Aisraeli mmathathani mwa attu o Umisri ni waakumiha upottani u Nafarao. 11 Vano kihochuwelha wiira Apwiiya Nlhuku phi olhupalhe upwaha milhuku chonkhaye, ukhalhawaya ahookholha attu alha mmathathani mwa attu o Umisri yaapangelha mattepwa." 12 Vavawo Nayethro, ahokohaya ashinna Musa, nkayaakumiha isadaka cho upahiya wa Nlhuku ni isadaka chikina. Naharuni ni ayo ahowa vamoka ni ashulhupalhe Aisraeli wiira alhie yolhia ikumihiye isadaka, vamoka ni Nayethro, wo waathimicha Apwiiya Nlhuku.

13 Waashelhe waya, ashinna Musa yahokalha wiiwelhelha milhatu cha Aisraeli. Attu yaari aneemenlhe anarukurenrie, toka wichishu mpaka uchechilho. 14 Nayethro ahokohaya ashinna Musa, yahoona chittu chonkhaye ashinna Musa chaapanga aya wa Aisraeli, nkayaakoha, "Nlhatuwaani wo waapangelha attu chittu thoko chii? Woonaka nnokhalha vekha inyu uno attu anorukurenrieni toka wichishu mpaka uchechilho?"

15 Ashinna Musa nkayaakhulha ahokohaya, "Ukhalhawaya attu anowa uwannyaka ukoherera malhove a Nlhuku. 16 Attu yaanaka indewo iriyoothe, anoowacha uwannyaka, ni mii kinowaamulha, kila ntu ni nkhunanawe. Tho, kinoweettuchiha malheheriyo a Nlhuku ni malhehero aya."

17 Paahi Nayethro nkayeerelha ashinna Musa wiira, "Chinopanga inyu khachinlhoka! 18 Nnowiiweria mwaanene, vamoka attu alha, nnowoochaa. Ukhalhawaya ulha ntheko ulha uhorika uhinooria inyu upanga vekha inyu. 19 Mwiiwelhelheke nlhove naka, ni Nlhuku akhalhe vamoka ni inyu. Inyuva mwemelhelheke attu umihoolho wa Nlhuku ni unhimeria Nlhuku ichuku chaya. 20 Tho, mweettuchiheke malhehero ni malhove o waamulha a Apwiiya Nlhuku, ni wooniha iphiro chinothananiya aya ukhalha ni upanga. 21 Nansho wo mwaha wo malhove makina, mwaathanlheke munlhokoni mwa attu onkhaye, attu anonthimicha Nlhuku, anokhulhuvelhiya ni ahinottuna uhongiya. Mwaavaheke yayo ntheko, akhalheke ni o waamulha milhatu ni owemelhelha attu munkutironi mwa attu elufu, imia imoka, makhumi nthanu, ni khumikhumi. 22 Yayo phi nohalha ukhalha kila nihuku ni waamulha milhatu cha attu. Malhove orikarika anouwiiherani inyuva, nansho makanimakani alhe anowaamulhacha ashinene. Wo yeyo phiro iyo nnowooria waalhuwiha ntheko inyu ukhalhawaya anoukavihani inyuva yoyo mwaha uyo. 23 Mwapangaka chiicho, thoko chinothanana awe Nlhuku, nnowooria upanga chittu rata. Ni attu onkhaye alha anowooria uhokolhiacha mmawannyaya wo mpuha."

24 Ashinna Musa yaheewelhelha nlhove no ahokohaya nno, ni upanga thoko chaahimeriye aya. 25 Paahi ashinna Musa ahaathanlha attu yaari o wooria chittu munlhokoni mwa Aisraeli. Nkayaapangacha ukhalha ahoolhelhi o mikutiro cha attu elufu, attu imia imoka, attu makhumi nthanu, ni attu khumikhumi. 26 Ni yayo etu nkayaakhalha o waamulha milhatu cha attu kila ikatema. Milhatu cho urikarika ahowiiheriya ashinna Musa, nansho cho uhirikarika chilhe yahaamulha yayo ashineneru ayo.

27 Yamalheke upanga chiicho, ashinna Musa ni ahokohaya waholhehaniya, ni Nayethro nkayaaholhia wiilhaponi waya.