1 Apwiiya Nlhuku nkayeerelha ashinna Musa, "Nrweeke u Nafarao, ukhalhawaya mii kihaathepiha itiyamaru, koonihe yayo vamoka ni anamitheko aya olhupalhe cho ushangiha cho woopiha munlhokoni mwaya, 2 wiira ni inyu mmwe mwaahimiachera achishaana inyu ni ashichulhu inyu, chinre aka wo waapangelha mattepwa attu o Umisri, wo upanga chechiyo cho ushangiha cho woopiha chiyo munlhokoni mwaya. Vavawo nchuwelhe wiira, mii phi Apwiiya Nlhuku."

3 Paahi ashinna Musa ni Naharuni ahorwaa u Nafarao, ni waahimeria wiira, "Apwiiya, Nlhuku a Aebraniya, aneera cho, ‘Chani! Nnohalha ukhota ukhalha makhalhelho oombone umihoolho waka mpaka iyaakhani? Mwaahiyerereke attu aka wiira arwaache akithimiche. 4 Mwakhotaka waahiyerera attu aka ayo wiira arwaache, paahi meelho kinowaakurusha anashombe akhuruwe mwiilhaponi mwinyu. 5 Ilhapo yonkhaye yo Umisri inookhunelhiya ni yayo anashombe ayo. Anoolhiacha kila ittu yookokwelhe ipulha yo malhuku ilhe, ni mena khanohiya nnyepu uriyoothe umenlhe mmamatani. 6 Anashombe ayo anoocharacha unupani winyu, inupa cha anamitheko inyu olhupalhe, ni inupa cha attu o Umisri onkhaye. Anowinchiva wo uhikhalha ittu yo waalhikaaniha ata manyaathumwaninyu mena manyaathumwanaya, khayoonne toka uyaria waya mpaka nna.’ " Paahi ashinna Musa nkayaathama u Nafarao.

7 Paahi anamitheko olhupalhe nkayaakoha Nafarao, "Yolha ntu ulha nohalha unihuviha mpaka iyaakhani? Mwaahiyerereke attu alha arwaache, yaathimiche Apwiiya Nlhuku, Nlhuku aya. Chani khannoona wiira, ilhapo yo Umisri inootanganyia?"

8 Vavawo ashinna Musa ni Naharuni nkayeehaniya wiira ahokolhie tho u Nafarao. Nafarao nkayeerelha, "Nrwaacheke etu mwathimiche Apwiiya Nlhuku inyu. Nansho kinokoha wiira, phi apani anohalha urwaa vamoka ni inyu mwaatti?"

9 Ashinna Musa nkayaakhulha, "Ninorwaa ni kila ntu, ashimirawo, ashulhupalhe, ni achishaana ihu ashilhopwana ni ashithiyana. Ninookusha ni ikhondoro chihu, ipuri chihu ni ingo'pe chihu, ukhalhawaya nihothananiya naapangelhe nihuku nulhupalhe Apwiiya Nlhuku."

10 Nansho wo ncheche Nafarao nkayeera, "Apwiiya Nlhuku akhalhe vamoka ni inyu mwaatti, yakhalhaka kinouhiyani wiira nrwaache vamoka manyaahanu inyu ni achishaana inyu. Ukhalhawaya wo ikekhiaye minikwa chinyu khachiri choombone, wiira nhihokolhie tho. 11 Mena khinokhalha chiicho! Manyaalhopwana vekha aya phi nohalha urwaa uwaathimichani Apwiiya Nlhuku, ukhalhawaya nenno phi nlhove naathanana inyu." Vavawo ashinna Musa ni Naharuni yahoomolhiya athame umihoolho u Nafarao.

12 Apwiiya Nlhuku nkayeerelha ashinna Musa, "Ntheesheke moono inyu vachulhu ilhapo yo Umisri, anashombe akhuruwe vachulhu ilhapo yo Umisri, alhie mikoko chonkhaye vachulhu ilhapo, yaani chonkhaye chaahalhakalhihiye ni ipulha yo malhuku ilhe."

13 Paahi ashinna Musa ahothesha ikopo aya vachulhu ilhapo yo Umisri. Apwiiya Nlhuku nkayaawukiha iphioo ukhuma unosha nchuwa uthana ni uhiyu wonkhaye. Waashelhe waya iphioo ilhe nkayaakurusha anashombe. 14 Ni anashombe nkayaakhuruwa ni uwanelha kila vakittu ilhapo yonkhaye yo Umisri. Yaari enchi chinene, ahinapacha ukhalha thoko yayo ikatema ivinre mena khanowa yaakhumelhelha thoko yayo tho. 15 Ahokhuneelha ilhapo yonkhaye yo Umisri, ata khiiwo ittu yoonia, nkawaakhalha ipiphi ilhapo yonkhaye. Nkayaalhia minyepu chonkhaye cho velhaponi, ni maphepu onkhaye o miri yahalhenlhe baada yo ipulha yo malhuku ilhe. Khanahalhenlhe ata nthakhuru nimoka, mena mwiri ama nkoko wo mmamatani ilhapo yonkhaye yo Umisri. 16 Paahi Nafarao wo uhipicha, aheehana ashinna Musa ni Naharuni nkayeera, "Kihaapangelha mwo uhilhoka Apwiiya Nlhuku inyu ni inyu mwaattiva chiicho. 17 Paahi vano, kinoulhepelhani wiira, nkilhevelhelhe uwonya waka ulha nkwaha mmoka ulha tu, nkilhapelhelheke wa Apwiiya Nlhuku inyu, anthamihe nookhwa ulha uwannyaka."

18 Ashinna Musa nkayaathama u Nafarao, nkayaarwa uwalhepelhani Apwiiya Nlhuku. 19 Apwiiya Nlhuku nkayaawukiha iphioo yo machiri menchi uneelha nchuwa, nkayaathamiha anashombe alhe ni waarihelha ibahari yo Shamu. Khaahalhenlhe ata nashombe mmoka mwiilhaponi mwonkhaye Umisri. 20 Nansho Apwiiya Nlhuku ahaathepiha itiyamaru Nafarao, ni ayo khaahiyerenre Aisraeli wiira arwaache.

21 Apwiiya Nlhuku nkayeerelha ashinna Musa, "Ntheeshe moono inyu wiirimu, ipiphi yulhupalhe ikhalhe vachulhu ilhapo yo Umisri, attu yaapapelhe mwiipiphini." 22 Paahi ashinna Musa nkayaathesha moono aya wiirimu, nkayaakhalha ipiphi totoro ilhapo yonkhaye yo Umisri wo mahuku mararu. 23 Attu khayoonrie woonana ntu ni nkhunanawe, mena uthama ntu vakitu vaaria awe wo mahuku mararu. Nansho Ugosheni, waakhalha aya Aisraeli, waari nkwee, wo uhikhalha ipiphi.

24 Yamalheke, Nafarao aheehana ashinna Musa, ni waahimeria wiira, "Haya, nrwaacheke, mwaathimicheke Apwiiya Nlhuku. Ata achishaana inyu ayo mwaattukaneke. Nansho ikhondoro, ipuri ni ing'ope chinyu chiyo, chechiyo nhiyeke."

25 Nansho ashinna Musa nkayeera, "Nnihiyeke naakusheke etu ashinama o waakumiha isadaka yo upahiya naahithe, wiira naakumihe isadaka wa Apwiiya Nlhuku ihu. 26 Ninookusha ni mikutiro cho ing'ope chihu, khanohalha ata mwannama mmoka utulhi, ukhalhawaya wo mihuwo chihu chiyo phi nohalha ihu waavaha isadaka Apwiiya Nlhuku ihu. Ni mena khanichuwenlhe mwannama ani ninohalha ihu unkumiha isadaka, mpaka vanohalha ihu uphiya wowo."

27 Nansho Apwiiya Nlhuku nkayaathepiha itiyamaru Nafarao, ahittune waahiyerera wiira arwaache. 28 Nafarao nkayeerelha ashinna Musa, "Nthameke umihoolho waka etu! Mwiishungeke rata, nhikoone tho, ukhalhawaya nenno nihuku ninohalha inyu ukoona nno, nnookhwa!"

29 Ashinna Musa nkayaakhulha, "Eiyo, nholhumacha rata! Ukhalhawaya akinowa umihoolho winyu tho."