1 Yeyo ikatema iyo, ahokhalha ntu mmoka o iyari i Nalawi arwelhe unthelhani mwalhi mmoka o iyari i Nalawi nttunanawe, 2 ni mwalhi uyo nkaarupalha irukulhu nkannyara mwaana mwanlhopwana. Amwooneke wiira mwaana uyo aari orera, ahommitha mpaani mieri miraru. 3 Nansho vonne awe wiira khanooria ummitha wo mahuku menchi ahonkoroshelha ikikapu yo itende, nkaahika ilami, nkaamwesha mwommo mwaana uyo mwommo. Nkeesha ikikapu iyo mmahushini vachereshere mwoolhoko wo Naili. 4 Arokorawe mwaana uyo nkayeevitha wiira yoone ittu inohalha umpatta mwaana uyo.

5 Paahi abiti Farao ahowa urapani umwoolhokoni, uno anamitheko aya ashithiyana yaalhitelhelhaka vachereshere mwoolhoko uyo. Gafula, abiti Farao ayo nkayoona ikikapu ilhe mmahushini vaavithiye aya valhe, nkayanruma namitheko aya akushe. 6 Nkayaapatakulha, nkayaamwoona mwaana mwankani onlhaka. Paahi nkayaamwonelha ikiriri, nkayeera, "Ulha mwaana ulha mmoka a achishaana a Aebraniya."

7 Vavawo vavawo arokorawe mwaana ulhe nkayeechooniha, nkayeerelha abiti Farao alhe wiira, "Chani kowiihanelhekeni nthiyana Muebraniya olhelheni mwaana ulha?"

8 Abiti Farao nkayeera, "Eiyo! Nrweeke mwamwiihaneke." Ni uyo nkaarwa, nkeehana anumwanawe mwaana ulhe. 9 Abiti Farao nkayaamwiirelha nthiyana uyo, "Munkushe mwaana ulha, mwanlhelhe, ni mii kinoulhivani." Nthiyana uyo nkankusha mwaana ulhe, unlhelhani. 10 Mwaana vaahihiye awe nipelhe, ahonhokolhosha wa abiti Farao, ni ayo nkayankusha ni ukhalha mwaamwanaya. Nkayeera, "Ukhalhawaya kinkuminhe mmaashini, paahi kinomwiihana nchina nawe Musa."

11 Nihuku nimoka ashinna Musa vaari aya anonnuwilhe rata, ahorwaa waashikuriani ashilhoko aya, Aebraniya, nkayoona uhuva waya. Nkayaamwoona Mmisri amwiivaka Muebraniya, nlhoko aya mmoka. 12 Paahi ashinna Musa ahoweha uno ni uno. Yooneke wiira khaawo ntu noona, ahomwaata ni umwiiva Mmisri ulhe, nkammuhelha munhaavani. 13 Washeelhe waya, ashinna Musa ahorwaa tho, nkoona Aebraniya elhi akhomakana. Paahi, nkankoha ampangelha ittu yo uhilhoka nkhunanawe uyo, "Nlhatu waani wo unkhomakacha Muebraniya nkhunaninyu?"

14 Uyo nkaakhulha, "Apani owensheni inyuva ukhalha o unitawara ni o unaamuka hii? Chani nnothanana ukiiva thoko chimwiivilhe inyu nchana Mmisri ulhe?"

Wo chiichammo etu ashinna Musa nkayoova ni wuupuwelha, "Veekinaka nenne nlhove nne niheewania!" 15 Paahi Nafarao yeewekeru yayo malhove ayo ahothanana weeva ashinna Musa. Nansho ashinna Musa nkayaattawa ukhuma wa Nafarao, nkayaarwa ukhalhani ilhapo yo Umidiyani, vakhiviru ilhushi.

16 Nihuku nimoka, achishaana ashithiyana saba, a opochera ishaani o Umidiyani ahowaacha urikani maashi, o uhelhiya mmakulhani mwaawureria ikhondoro ni ipuri cha athumwanaya. 17 Nansho attu o uchunga mihuwo akina nkayaawa ni uwomolha achishaana ashithiyana ayo, nansho ashinna Musa nkayeemelha, nkayaakaviha uwuriha mihuwo chaya. 18 Achishaana ashithiyana alhe vaahokolhelhe aya, Nayethro, athumwanaya, wo nchina nikina Nareuli, ahaakoha, "Yiirelhe chani woonaka nnohokolhia chitema lhelho?"

19 Nkayaakhulha wiira, "Mmisri mmoka ahonoopolha mmathathani mwa attu o uchunga ikhondoro. Ni uthepa yayo, ahonirikelha maashi, nkaawuriha mihuwo chihu."

20 Nayethro nkayaakoha achishaana ashithiyana ayo, "Rivayi etu yoyo ntu uyo? Woonaka nhonhiya wowo? Mwamwiihane, awe aalhia yolhia." 21 Ashinna Musa nkayaarwaa nkayaalhia. Nkaachivelhiya ukhalha uwannyawe yoyo ntu uyo. Ni uyo nkaavaha ashinna Musa mwaamwanaya mwanthiyana, Zipora, akhalhe ahanu aya. 22 Nazipora ayo nkaayarelha ashinna Musa mwaana mwanlhopwana. Nkayeera mii ki nlheto wono, paahi nkayaamwiihana nchina nawe Gershomu, maana aya "Nlheto."

23 Chavireke iyaakha chinchi amwene o Umisri ahokhwa, achishaana o Aisraeli nkayonlhacha chinene athananaka wiira yoopolhiye. Nlhuku nkeewa ikutto aya. 24 Nkeewa ichuku chaya, nkoopuwelha malhehano aapangilhe awe ni Aburahimu ni Naisaka ni Nayakhobo. 25 Nlhuku ahaaweha Aisraeli chineera aya wo uttwaruwa, nkoonelha ikiriri.