1 Paahi Nabezaleli ahokoorosha Nisanduku no Malhehano wo imbau cho n'johoro, no urekama miono miilhi ni nusu, ukhanuwa moono mmoka ni nusu ni nchusha naya moono mmoka ni nusu. 2 Nkayaakhunelha wo uhika idhahabu yorera nhina ni vachulhu, nkayeesha ni nreko wo idhahabu wo urukureria mipata chonkhaye. 3 Tho, ahokoorosha ibangili ncheshe cho idhahabu cho uvirihelhiya mishaamu cho uthathelha nisanduku nno. Nkayaawarihelha ikhona ncheshe chiyo, kila ikhona imoka ibangili imoka. 4 Nkayaakoorosha mishaamu miilhi cho uthathelha nisanduku nno nsegasega, cho n'johoro ni uhika idhahabu vachulhu. 5 Nkayaaviriha chechiyo mishaamu chiyo mbangilini mmwe munisandukuni mmo uno ni uno, wiira chithathelhiye nisanduku nno. 6 Nkayaakoorosha ikifuniko yo idhahabu yorera, vaneehaniya nipuro yo woonelhiya attu ikiriri, yo urekama miono miilhi ni nusu, ni uchara waya moono mmoka ni nusu. 7 yamalheke, ahaakoorosha amakerubi eelhi wo uhana idhahabu, ni weesha vachulhu ikifuniko yo nisanduku vawo, 8 mmoka uno ni nkina uno. Onkhaye aakooroshiye wo ukhalha ittu imoka ni ikifuniko iyo. 9 Yayo amakerubi ayo eeshiye wo uwehana, mapupha aya anookolhiye ni ukhunelha vachulhu nisanduku nno.

10 Tho Nabezaleli ahokoorosha imeza yo n'johoro yo urekama miono miilhi, ukhanuwa moono mmoka ni nchusha naya moono mmoka ni nusu. 11 Nkayaakhunelha wo uhika idhahabu yorera ni urukureriha nreko wo idhahabu. 12 Tho ahorukureriha ubau, ukhanuwa waya makokho macheshe mipata chonkhaye. 13 Nkayaakoorosha ibangili ncheshe cho uvirihiya mishaamu cho uthathelha nisanduku ni uwarihelha ikhona ncheshe vanomalhelha aya mieto cho imeza iyo. 14 Chechiyo ibangili cho uthathelha imeza chiyo chaalhutanihiye vakhiviru ni ubau waarukurerihiye ulhe. 15 Nkayaakoorosha mishaamu miilhi cho n'johoro cho uthathelha nisanduku nno, nkayaahika idhahabu. 16 Tho wo idhahabu yorera iyo ahokoorosha ikaruma chonkhaye cho weeshiya vachulhu imeza iyo, yaani isahani ni ivisahani cho weesheriya ubani, ikikombe chaya ni inyipo chaya cho uhelhiya isadaka yo cho uwuriya.

17 Tho, ahokoorosha iphata yo uthomeiya ikhandiri wo idhahabu yorera. Nkayaakoorosha ni ikhalhelho aya ni nkupu aya waahaniye ni idhahabu, maua aya, yaari ni ikhuche chaya ni ituva chaya, chonkhaye chikhalhaka ittu imoka ni iphata iyo. 18 Iritta sita chikhalhaka kila mpata wo nreko nno, iritta ttaru mpata mmoka ni iritta ttaru mpata nkina. 19 Kila iritta imoka chahokhalha ikikombe ttaru cho ulhikaana ni maua o mwiri wo mlozi. Kila imoka ni ituva aya ni niuwa naya. 20 Vankupuni vawo vahokhalha ikikombe ncheshe chaakooroshiye wo ulhikaana ni maua o mwiri wo mlozi, vamoka ni ituva chaya ni maua aya. 21 Kila vaakhumme iritta ttaru vawo wo vathi, wahokhalha ituva imoka. 22 Ituva chiyo ni iritta chaya chiyo yaari ittu imoka ni iphata iyo, yaakooroshiye wo uhaniya idhahabu yorera. 23 Ahokoorosha ni ikhandiri chaya saba, ikoleo chaya ni ivisahani chaya cho idhahabu yorera. 24 Nkayaakoorosha iphata ni chittu chaya wo ikilo makhumi mararu ni nthanu cho idhahabu yorera.

25 Nabezaleli ahokoorosha madhubahu o utumiherelhiya ubani o imbau cho n'johoro. Madhubahu ayo aari o ulhikaana, kila mpata waari moono mmoka. Yaani urekama waya, ukhanuwa waya ni nchusha naya. Inyaka cho ikhona chaya chiyo chaari ittu imoka ni madhubahu anene ayo. 26 Nkaahika idhahabu yorera chonkhaye chiyo, uchulhu, mpararini, ni inyaka chaya. Tho ahokooroshelha nreko wo idhahabu. 27 Ahokoorosha ni ibangili piilhi cho idhahabu wuuthi nreko wo madhubahu uyo uno ni uno. Chechiyo ibangili chiyo chaari cho uvirihiya mishaamu cho uthathelha madhubahu ayo. 28 Tho, ahokoorosha mishaamu miilhi ni uhika idhahabu vachulhu.

29 Yamalheke, ahokoorosha makhura matakatifu o uhikiya ni ubani worera wo unukhelha chinene. Nkayaathakaniha ubani uyo ni makhura o unukhelha thoko chinopangiya ni attu o wooria yoyo ntheko uyo.