1 Nlhoko wonkhaye wa Aisraeli wahothama uthako wo Usini, nkayeeta nkwaha wo uthamathama thoko chaalheheriye aya ni Apwiiya Nlhuku. Nkayaamaka Urefidimu, nansho wowo khawaariwo maashi o uwuria. 2 Paahi attu nkayonlhelha ashinna Musa yeeraka, "Nnivahe maashi o uwuria."

Ashinna Musa nkayaakhulha, "Woonaka nnokunlhelha mii? Woonaka nnowaalhikacha Apwiiya Nlhuku?"

3 Nansho attu onkhaye yarii anawolhiye nttona, nkayonlhelha ashinna Musa yeeraka, "Nlhatuni no unithamiha Umisri ulhe wiira nniive wo nttona hiyaano onkhaye ni achishaana ihu ni mihuwo chihu?"

4 Paahi ashinna Musa nkayonlhelha Apwiiya Nlhuku yeeraka, "Kaapangelhekeni alha attu alha? Ahophiyelha ukaata malhuku!"

5 Apwiiya Nlhuku nkayeerelha ashinna Musa, "Nvireke mwaattuni, mwaawieke ashulhupalhe aya vakani. Tho, nkusheke ilha ikopo yaatenlhe inyu mwoolhoko wo Unaili ilha mmathathani mwinyu. 6 Nkiiwelhelheke rata. Mii kinoweemelha umihoolho winyu vamwalhani Uhorebu. Ni inyuva mwaateke yoyo mwalha uyo ni maashi anokookhuma wiira attu onkhaye awuriache." Paahi ashinna Musa nkayaapanga chiicho umihoolho wa ashulhupalhe a Aisraeli.

7 Ashinna Musa nkayehaana vavawo vakittu vawo Masa, maana aya "Ulhikacha" ni Meriba, maana aya "Wunlhelha." Ukhalhawaya Aisraeli yahonlhelha ni waalhikacha Apwiiya Nlhuku yeeraka, "Chani, wo ikekhiaye Apwiiya Nlhuku arii vamoka ni hii?"

8 Attu o Uamaleki yahowaacha ni waatakana ikhoto ni Aisraeli Urefidimu. 9 Ashinna Musa nkayeerelha Nayoshua wiira, "Mwaathanlheke manyaalhopwana nrwee mwaatakane ni attu o Uamaleki. Meelho mii kinoweemelha vachulhu mwaamwako ulhe, kinavarelhenlhe ikopo ya Nlhuku ilhe mmathathani mwaka." 10 Paahi Nayoshua nkayaapanga chiicho thoko chaahimmie aya ashinna Musa, nkaarwa uwaatakanani ni attu o Uamaleki. Ashinna Musa, Naharuni ni Nahuri nkayaawelha vachulhu mwaako. 11 Ikatema yonkhaye ashinna Musa vaathesha aya miono chaya uchulhu, Aisraeli yahokottolha, nansho vaakurunshe aya attu o Uamaleki ahokottolha. 12 Nansho baada yo uvira ikatema, miono cha ashinna Musa chahoochaa. Paahi Naharuni ni Nahuri yahokusha nlhuku nkayeeshera ashinna Musa ni ayo nkayaakhalhelha. Yamalheke nkayaavaracha miono chi ashinna Musa, nkayaathesha, mmoka atheeshaka moono o wiimonono ni nkina moono o wiimushi. Paahi miono cha ashinna Musa nkachaakhalha chichirikhi mpaka nchuwa velhilhe aya, ukhalhawaya chaari chinatheeshiye nchulhu. 13 Paahi Nayoshua ni attu aya, nkayaakottolha attu o Uamaleki wo uphanga waya.

14 Yamalheke Apwiiya Nlhuku nkayeerelha ashinna Musa, "Nlhepeke nna nlhove nna nkitabuni nikhalheke nuupusho. Tho, mwaahimerieke Nayoshua wiira, Mii kinowaalhakalhiha attu o Uamaleki velhaponi va." 15 Ashinna Musa nkayaatheka madhubahu ni wiihana madhubahu ayo, Yahweh Nisi, maana aya "Apwiiya Nlhuku phi Ibendera aka." 16 Yeeraka wiira, "Ntheesheke nchulhu ibendera ya Apwiiya Nlhuku! Apwiiya Nlhuku anowaatakana ni attu o Uamaleki wo mahuku onkhaye o uhimalha!"